Portrait an unknown male doctor holding a stethoscope behind
ଭୁବନେଶ୍ୱର, ୧୦।୧୦(ବ୍ୟୁରୋ) – ଡାକ୍ତରୀ ପାଠ୍ୟକ୍ରମରେ ନାମଲେଖା ପାଇଁ ଆସନ୍ତା ୧୭ ତାରିଖରୁ ରାଜ୍ୟର ମେଡିକାଲ କଲେଜଗୁଡ଼ିକରେ କାଉନ୍ସେଲିଂ ଆରମ୍ଭ ହେବ। ମୋଟ ୨,୨୦୦ ସିଟ୍ ମଧ୍ୟରୁ ୧,୭୦୦ ସିଟ୍ ୧୦ଟି ସରକାରୀ ମେଡିକାଲ କଲେଜ ଓ ଦୁଇଟି ଘରୋଇ ମେଡିକାଲ କଲେଜ ଏବଂ ୫୦୦ଟି ସିଟ୍ ଦୁଇଟି ଡିମ୍ଡ ୟୁନିଭର୍ସିଟିରେ ରହିଛି। ସୁନ୍ଦରଗଡ଼ ଏବଂ କେନ୍ଦୁଝର ସରକାରୀ ମେଡିକାଲ କଲେଜରେ ଚଳିତବର୍ଷ ପ୍ରଥମଥର ପାଇଁ ଏମ୍ବିବିଏସ୍ ପାଠ୍ୟକ୍ରମରେ ନାମଲେଖା ହେବ। ୧୦ଟି ସରକାରୀ ମେଡିକାଲ କଲେଜ ଓ ଦୁଇଟି ଘରୋଇ ମେଡିକାଲ କଲେଜର ୧,୭୦୦ଟି ସିଟ୍ରେ ନାମଲେଖା ପାଇଁ ଓଡ଼ିଶା ଯୁଗ୍ମ ପ୍ରବେଶିକା ପରୀକ୍ଷା(ଓଜେଇଇ) ପକ୍ଷରୁ କାଉନ୍ସେଲିଂ ହେବ। ସେହିପରି ଦୁଇଟି ଡିମ୍ଡ ୟୁନିଭର୍ସିଟି ନିଜସ୍ବ ପ୍ରକ୍ରିୟାରେ ନାମ ଲେଖାଇବେ। ପ୍ରଥମ ପର୍ଯ୍ୟାୟ କାଉନ୍ସେଲିଂ ୧୭ରୁ ୨୮ ତାରିଖ ମଧ୍ୟରେ ହେବାକୁ ଥିବାବେଳେ ଦ୍ୱିତୀୟ ପର୍ଯ୍ୟାୟ କାଉନ୍ସେଲିଂ ନଭେମ୍ବର ୭ରୁ ୧୮ ଏବଂ ମପ୍-ଅପ୍ ରାଉଣ୍ଡ୍ ଡିସେମ୍ବର ୬ ରୁ ୧୨ ତାରିଖ ମଧ୍ୟରେ ଅନୁଷ୍ଠିତ ହେବ।
ସୂଚନାଯୋଗ୍ୟ, କଟକ ଏସ୍ସିବି ମେଡିକାଲ କଲେଜ ଆଣ୍ଡ୍ ହସ୍ପିଟାଲ ଏବଂ ବ୍ରହ୍ମପୁର କଲେଜ ଆଣ୍ଡ୍ ହସ୍ପିଟାଲରେ ୨୫୦ଟି ଲେଖାଏ ସିଟ୍ ଥିବାବେଳେ ବୁର୍ଲା ଭିମ୍ସାରରେ ୨୦୦, କୋରାପୁଟ ଓ ବାରିପଦା ସରକାରୀ ମେଡିକାଲ କଲେଜରେ ୧୨୫ଟି ଲେଖାଏ, ବଲାଙ୍ଗୀର, ବାଲେଶ୍ୱର, ପୁରୀ, ସୁନ୍ଦରଗଡ଼ ଓ କେନ୍ଦୁଝରରେ ୧୦୦ ଲେଖାଏ ସିଟ୍ ରହିଛି। ଭୁବନେଶ୍ୱର ହାଇଟେକ୍ ମେଡିକାଲ କଲେଜରେ ୧୫୦ ଏବଂ ରାଉରକେଲା ହାଇଟେକ୍ ମେଡିକାଲ କଲେଜରେ ୧୦୦ ସିଟ୍ ରହିଛି। ସେହିପରି ଆଇଏମ୍ଏସ୍ ଆଣ୍ଡ୍ ସମ୍ ହସ୍ପିଟାଲ ଏବଂ କିମ୍ସ ଭୁବନେଶ୍ୱରରେ ୨୫୦ଟି ଲେଖାଏ ସିଟ୍ ରହିଛି।