ବିଷମ କଟକ,୨୬।୮ (ବିଭୂତି ଭୂଷଣ ନାୟକ): ରାୟଗଡ଼ାର ଉପାନ୍ତ ଅଞ୍ଚଳରେ ସ୍ବାସ୍ଥ୍ୟସେବା ମିଳୁ ନ ଥିବା ଦେଖି ଡାକ୍ତର ହେବାର ସ୍ବପ୍ନ ଦେଖିଥିଲେ ବିଷମକଟକ ବ୍ଲକ ଅନ୍ତର୍ଗତ ଥୁଆପାଢି ସଦର ପଞ୍ଚାୟତ ଗ୍ରାମର କୃଷ୍ଣଚନ୍ଦ୍ର ଅଟକା । ଚଳିତ ବର୍ଷ ନିଟ୍ ପରୀକ୍ଷାରେ ସଫଳତାର ସହ ଉତ୍ତୀର୍ଣ୍ଣ ହୋଇଥିଲେ ମଧ୍ୟ ଡାକ୍ତରୀ ପଢ଼ିବା ପାଇଁ ଅର୍ଥ ସାଜିଥିଲା ବାଧକ। ତାଙ୍କ ସ୍ବପ୍ନ କେବଳ ସ୍ବପ୍ନରେ ରହିଯିବ ବୋଲି ସେ ଭାବିଥିଲେ। ପରେ କୃଷ୍ଣ ଡାକ୍ତରୀ ପଢିବା ନିମନ୍ତେ ଆବଶ୍ୟକ ଅର୍ଥ ଲାଗି ବିଷମ କଟକ ଗୋଷ୍ଠୀ ଉନ୍ନୟନ ଅଧିକାରୀଙ୍କ ଜରିଆରେ ରାଜ୍ୟ ସରକାରଙ୍କୁ ନିବେଦନ ପତ୍ର ପ୍ରଦାନ କରିଥିଲେ। କୃଷ୍ଣଙ୍କ ସମସ୍ୟା ବିଷୟରେ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତଥା ୫-ଟି ସଚିବ ଭି.କେ. ପାଣ୍ଡିଆନ ଜାଣିବା ପରେ ଗୁରୁବାର କୃଷ୍ଣଙ୍କୁ ନବୀନ ନିବାସକୁ ଡକାଇ ତାଙ୍କ ସହ ପ୍ରାୟ ୨୦ ମିନିଟ୍ ଆଲୋଚନା କରିଥିଲେ। ରାଜ୍ୟ ସରକାର କୃଷ୍ଣଙ୍କ ପ୍ରତ୍ୟେକ ବର୍ଷର ଡାକ୍ତରୀ ଫି ବହନ କରିବେ ବୋଲି ସଚିବ ପ୍ରତିଶ୍ରୁତି ଦେବା ସହ ଚଳିତ ବର୍ଷର ଫି ବାବଦରେ ତାଙ୍କ ଆକାଉଣ୍ଟରେ ୧ ଲକ୍ଷ ଟଙ୍କା ଜମା କରାଯାଇଥିବା କହିଥିଲେ। ୫ ବର୍ଷରେ ସରକାର ତାଙ୍କୁ ୫ଲକ୍ଷ ଟଙ୍କା ଯୋଗାଇଦେବେ ବୋଲି ସେ ପ୍ରତିଶ୍ରୁତି ଦେଇଛନ୍ତି। ଏଥିସହ ଆଗକୁ ବଢିବା ପାଇଁ ଯାହା ବି ସାହାଯ୍ୟ ଦରକାର ତାହା ରାଜ୍ୟ ସରକାଙ୍କ ତରଫରୁ ଯୋଗାଇ ଦିଆଯିବ ବୋଲି କହିଥିବା ଜଣାପଡ଼ିଛି। ସରକାରଙ୍କଠାରୁ ଆର୍ଥତ୍କ ସହାୟତା ପାଇବା ପରେ କୃଷ୍ଣ ବେଶ୍ ଖୁସି ଥିବା ବେଳେ ୫ବର୍ଷରେ ହିଁ ଡାକ୍ତରୀ ପାଠ ସାରିବେ ବୋଲି କହିଛନ୍ତି। ଏଥିସହ ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ୫-ଟି ସଚିବଙ୍କୁ ଧନ୍ୟବାଦ ଜ୍ଞାପନ କରିଛନ୍ତି ।
ପ୍ରକାଶ ଯେ, କୃଷ୍ଣ ଅତି ଗରିବ ପରିବାରର ହୋଇଥିବାରୁ ଟଙ୍କା ରୋଜଗାର ପାଇଁ ଦାଦନ ଖଟିବାକୁ କେରଳ ଯାଇଥିଲେ। ହେଲେ ତାଙ୍କର ପାଠ ପ୍ରତି ଥିବା ନିଷ୍ଠା, ଉଦ୍ୟମ ଯୋଗୁ ସେ ନିଟ୍ ପରୀକ୍ଷାରେ ସଫଳତା ପାଇ କଳାହାଣ୍ଡି ଜିଲାର ମେଡିକାଲ କଲେଜରେ ନାମ ଲେଖାଇଛନ୍ତି । କୃଷ୍ଣ ଜଣେ ମେଧାବୀ ଛାତ୍ର ହୋଇଥିବାବେଳେ ମାଟ୍ରିକ ପାସ୍ କରିବା ପରେ ବ୍ରହ୍ମପୁର ଖଲ୍ଲିକୋଟ କଲେଜରେ ସଫଳତାର ସହ ପାସ୍ କରି ଘରକୁ ଫେରିଥିଲେ। ଦାରିଦ୍ର୍ୟର ତାଡ଼ନାରେ ପରିବାର ଚଳୁଥିବାବେଳେ ସେ ନିଜେ ପରିବାର ପାଇଁ ବୋଝ ହୋଇଯାଇଥିବା ଭାବି ରୋଜଗାର କରିବାକୁ ମନସ୍ଥ କରିଥିଲେ। ପରେ ୨୦୧୪ରେ ଦାଦନ ଖଟିବାକୁ କେରଳ ଚାଲିଯାଇଥିଲେ । ସେଠାରେ କିଛି ବର୍ଷ ଏକ ଇଟାଭାଟିରେ କାମ କରିବା ପରେ ଭାଷାଗତ ସମସ୍ୟା ଓ ନିର୍ଯାତନାର ଶିକାର ହୋଇ ଘରକୁ ଫେରି ଆସିଥିଲେ। ବାପାଙ୍କ ସହ ଚାଷକାମ କରିବା ସହିତ ପାଠପଢା ମଧ୍ୟ ଆରମ୍ଭକରି ଦେଇଥିଲେ। ହେଲେ ଅର୍ଥ ଅଭାବ ଯୋଗୁ ଉଚ୍ଚଶିକ୍ଷା ତାଙ୍କ ପାଇଁ ବହୁତ କଷ୍ଟକର ହୋଇପଡ଼ିଥିଲା। ଏହାସତ୍ତ୍ୱେ ସେ ହାର ମାନି ନ ଥିଲେ। ଅନେକ ସମୟରେ ତାଙ୍କ ସହଯୋଗୀ ନୀଳମାଧବ ହିକକା ତାଙ୍କୁ ସାହାଯ୍ୟ କରିଥିଲେ। ଫଳରେ ତାଙ୍କୁ ଆଗକୁ ବଢ଼ିବାର ସହାୟକ ହୋଇଥିଲା।