ଲକ୍ଷ୍ନୌ,୧ା୧୦: ହାଥରସ ଯୁବତୀ ବଳାତ୍କାର ଘଟଣାର ମେଡିକାଲ ରିପୋର୍ଟ ଆସିଛି। ଏହି ରିପୋର୍ଟ ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଦେବା ଭଳି ଆସିଛି। ରିପୋର୍ଟରେ ଯୁବତୀଙ୍କୁ ଗଣବଳାତ୍କାର ହୋଇ ନ ଥିବା ଦର୍ଶାଯାଇଛି। ଯାହା ଅଭିଯୁକ୍ତମାନଙ୍କୁ ସୁହାଇବ। ଯୁବତୀ ଆଖି ବୁଜିବା ପୂର୍ବରୁ ପୋଲିସକୁ ବୟାନ ଦେଇଥିଲେ। ଏହି ବୟାନ ଆଧାରରେ ଏଫଆଇଆର ଦାୟର କରାଯାଇଥିଲା। ଅଭିଯୁକ୍ତମାନଙ୍କ ନାମରେ ଗଣବଳାତ୍କାର ଧାରା ଲଗାଯାଇଥିଲା। ମାତ୍ର ମେଡିକାଲ ରିପୋର୍ଟରେ ଗଣବଳାତ୍କାର ହୋଇ ନ ଥିବା ଜଣାପଡ଼ିବା ପରେ ଅଭିଯୁକ୍ତମାନେ ଖଲାସ ପାଇଯିବାର ଆଶଙ୍କା ସୃଷ୍ଟି ହୋଇଛି। ରିପୋର୍ଟରେ ଗଳାର ହାଡ଼ ଭାଙ୍ଗିଥିବା ଯୋଗୁ ମୃତ୍ୟୁ ଘଟିଥିବା ଦର୍ଶାଯାଇଛି।
ଅନ୍ୟପକ୍ଷରେ ସମାଜବାଦୀ ପାର୍ଟି ୟୁପି ଛାତ୍ରନେତା ଅତୁଲ ପ୍ରଧାନ ଦାବି କରିଛନ୍ତି ଯେ, ପୀଡ଼ିତାଙ୍କ ମୃତଦେହ ଜାଳିବା ପାଇଁ ପୋଲିସ ଥିନରର ବ୍ୟବହାର କରିଥିଲା। ଅତୁଲଙ୍କ କହିବା କଥା ପୀଡ଼ିତାଙ୍କ ଜୁଇ ନିକଟରୁ ଏକ କ୍ୟାନ୍ ମିଳିଛି। ଯାହାକି ଥିନର କ୍ୟାନ୍। ସେ ଏହି ଘଟଣାର ସିବିଆଇ ତଦନ୍ତ ଦାବି କରିଛନ୍ତି। କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ ହାଥରସ ଯିବା ପାଇଁ ଦିଲ୍ଲୀରୁ ବାହାରିଥିବା ଜଣାପଡ଼ିଛି।