ରାୟଗଡ଼ା ଅଫିସ,୨୨ା୧୦-ରାୟଗଡ଼ା ଜିଲାକୁ କରୋନାମୁକ୍ତ କରିବାକୁ ପ୍ରଶାସନର ଉଦ୍ୟମ ଜାରି ରହିଛି। ଆର୍ଆର୍ଟି ଟିମ୍ ଗ୍ରାମାଞ୍ଚଳକୁ ଯାଇ ଲୋକଙ୍କ କରୋନା ପରୀକ୍ଷା କରୁଛନ୍ତି। ତେବେ ରାୟଗଡ଼ା ବ୍ଲକ କେରେଡ଼ା ପଞ୍ଚାୟତର ଅଣିଜା ଗ୍ରାମକୁ ରାସ୍ତା ନ ଥିବାବେଳେ ବ୍ରିଜ୍ ନିର୍ମାଣ କାର୍ଯ୍ୟ ଚାଲିଛି। ତେଣୁ ଶୁକ୍ରବାର ଏକ ଡାକ୍ତରୀ ଟିମ୍ ଶଗଡ଼ ଗାଡି ସାହାଯ୍ୟରେ ନାଗାବଳୀ ନଦୀ ପାରହୋଇ ଗାଁରେ ପହଞ୍ଚି ଲୋକଙ୍କ ସ୍ବାବ୍ ସଂଗ୍ରହ କରି ଆଣ୍ଟିଜେନ୍ ଏବଂ ଆର୍ଟି-ପିସିଆର୍ ପରୀକ୍ଷା କରିଛନ୍ତି। ଜେମାଦେଇ ପେଣ୍ଠ ସ୍ବାସ୍ଥ୍ୟକେନ୍ଦ୍ରର ଡାକ୍ତର ସୁନୀଲ ମହାପାତ୍ରଙ୍କ ତତ୍ତ୍ୱାବଧାନରେ ଏକ ସ୍ବତନ୍ତ୍ର ଆର୍ଟି-ପିସିଆର୍ ଓ ଆଣ୍ଟିଜେନ ଟେଷ୍ଟ କ୍ୟାମ୍ପ ଆୟୋଜନ କରାଯାଇଥିଲା। ଏଥିରେ ୧୦୦ ଜଣଙ୍କର ଆର୍ଟି-ପିସିଆର୍ ଏବଂ ୫୩ ଜଣଙ୍କର ଆଣ୍ଟିଜେନ ପରୀକ୍ଷା କରାଯାଇଥିଲା। ସମସ୍ତଙ୍କ ରିପୋର୍ଟ ନେଗେଟିଭ ଥିବା ଜଣାପଡ଼ିଛି। ଏହି ସମୟରେ କେରେଡ଼ା ସରପଞ୍ଚ ଗୋବର୍ଦ୍ଧନ କଣ୍ଡାଗୋରି, ପିଇଓ ଗୌରାଙ୍ଗ ପାଣିଗ୍ରାହୀ, ଡିଇଓ ସୀମାଦ୍ରି ମନୋଜ, ଏଲ୍ଟି- କେ. ଦୁର୍ଗା ପ୍ରସାଦ, ଏଲ୍ଟି-ଶେଫାଳି ବଢ଼େଇ, ଏଲ୍ଟି-ମମତା ପ୍ରଧାନ, ଫାର୍ମାସିଷ୍ଟ ରେଣୁକା ସାହୁ, ସିଦ୍ଧାର୍ଥ ଖରା, ଅଙ୍ଗଦ ପାଲାକାଙ୍କ ସମେତ ଗ୍ରାମର ଆଶା ଓ ଅଙ୍ଗନଓ୍ବାଡି କର୍ମୀ ଉପସ୍ଥିତ ଥିଲେ।
