ଯଦି ମନରେ ସାହସ ଏବଂ ଉତ୍ସାହ ଥାଏ,ତେବେ ଯେକୌଣସି ବୟସରେ ସଫଳତା ହାସଲ କରିହୁଏ। ନିକଟରେ ଜଣେ ଭିକାରି ୬୦ ବର୍ଷ ବୟସରେ ମଡେଲ ହୋଇ ଏହାର ଯଥାର୍ଥତା ପ୍ରତିପାଦନ କରିଥିଲେ। ଠିକ ସେହିପରି ଏବେ ଜଣେ ୯୫ ବର୍ଷୀୟା ବୃଦ୍ଧା ଚର୍ଚ୍ଚାକୁ ଆସିଛନ୍ତି। ୯୦ ବର୍ଷ ବୟସରେ ବୃଦ୍ଧା ଜଣଙ୍କ ନିଜ ବ୍ୟବସାୟ ଆରମ୍ଭ କରି ମାତ୍ର ୫ ବର୍ଷ ମଧ୍ୟରେ ଏପରି କିଛି କରିଛନ୍ତି ଯାହା ବଡ଼ ବଡ଼ ବ୍ୟବସାୟୀମାନେ ମଧ୍ୟ କରିପାରି ନାହଁାନ୍ତି।
୯୫ ବର୍ଷିୟା ହରଭଜନ କୌର ଚଣ୍ଡିଗଡ଼ରେ ରୁହନ୍ତି। ସେ ମଇଦା ବର୍ଫି ବ୍ୟବସାୟ କରନ୍ତି। ଏଥିରୁ ସେ ଲକ୍ଷ ଲକ୍ଷ ଟଙ୍କା ବ୍ୟବସାୟ କରୁଛନ୍ତି। ପ୍ରଥମେ ୯୦ ବର୍ଷ ବୟସରେ ହରଭଜନ ନାନୀ ନିଜ ସ୍ବପ୍ନକୁ ପୂରଣ କରିବାକୁ ଚିନ୍ତା କରିଥିଲେ। ଏହାପରେ ଘରେ କିଛି ବର୍ଫି ତିଆରି କରି ବିକିବାକୁ ଲାଗିଲେ। ଧୀରେ ଧୀରେ ତାଙ୍କ ବର୍ଫି ଲୋକଙ୍କୁ ପସନ୍ଦ ଆସିଲା। ନାନୀ ଏବଂ ତାଙ୍କ ପରିବାର ଲୋକ ମିଶି ଏହି ବ୍ୟବସାୟ ବଢିବାକୁ ନିଷ୍ପତ୍ତି ନେଲେ।
କିଛି ଦିନ ପରେ, ବଜାରରେ ବି ନାନୀଙ୍କ ବର୍ଫିର ଚାହିଦା ବଢିଲା। ହରଭଜନ ବ୍ରାଣ୍ଡର ମଇଦା ବର୍ଫିର ଚାହିଦା ସବୁଆରେ ବ୍ୟାପିଲା। ପରେ ନାନୀ ଆଚାର, ବାଦାମ ଆଇସକ୍ରିମ, ମସୁର ଡାଲି, ଟମାଟୋ ଚଟନି ଇତ୍ୟାଦି ତିଆରି କରିବା ଆରମ୍ଭ କଲେ। ଉତ୍ପାଦର ପ୍ୟାକେଜିଂ ଏବଂ ମାର୍କେଟିଂ ପରିବାର ସଦସ୍ୟଙ୍କ ଦ୍ୱାରା କରାଯାଇଥାଏ ଏବଂ ବର୍ତ୍ତମାନ ଏହା କେବଳ ଚଣ୍ଡିଗଡ଼ ଏବଂ ପଞ୍ଜାବର ଅନେକ ସହରରେ ନୁହେଁ, ବରଂ ଆମାଜନରୁ ମଧ୍ୟ ଅନ୍ଲାଇନ୍ ଅର୍ଡର ହୋଇପାରିବ। ବ୍ୟବସାୟୀ ଆନନ୍ଦ ମହିନ୍ଦ୍ରା ମଧ୍ୟ ହରଭଜନ କୌରଙ୍କୁ ପ୍ରଶଂସା କରିଥିଲେ।
ସୂଚନାନୁସାରେ, ହରଭଜନଙ୍କ ସ୍ବାମୀ ୨୦୦୮ ମସିହାରେ ହୃଦଘାତରେ ମୃତ୍ୟୁବରଣ କରିଥିଲେ। ସେବେଠାରୁ ସେ ତାଙ୍କ ଝିଅ ଘରେ ରହିବାକୁ ଲାଗିଲେ। ଘରେ ସମସ୍ତେ କାମ କରୁଥିଲେ, ଯେଉଁଥିପାଇଁ ସେ ଏକୁଟିଆ ଅନୁଭବ କରୁଥିଲେ। ତା’ପରେ ସେ ୯୦ ବର୍ଷ ବୟସରେ କାମ କରିବାକୁ ସ୍ଥିର କଲେ ଏବଂ ବର୍ତ୍ତମାନ ସେ ଲକ୍ଷ ଲକ୍ଷ ଟଙ୍କାର ମାଲିକାଣୀ ଅଟନ୍ତି।