ଭୁବନେଶ୍ୱର,୧।୧୨: ଚଳିତ ବର୍ଷ ନଭେମ୍ବର ୩୦ରୁ ଡିସେମ୍ବର ୪ ପର୍ଯ୍ୟନ୍ତ ମେକ୍ ଇନ୍ ଓଡ଼ିଶା କନ୍କ୍ଲେଭ-୨୦୨୨ର ୩ୟ ସଂସ୍କରଣର ଶୁଭାରମ୍ଭ ବୁଧବାର ହୋଇଯାଇଛି। ଉକ୍ତ କନ୍କ୍ଲେଭରେ ଯୋଗଦେବାକୁ ଆସିଥିବା ନରଓ୍ବେର ରାଷ୍ଟ୍ରଦୂତଙ୍କ ସହ ଓଡ଼ିଶାର ଖଣି ଓ ଇସ୍ପାତ ଏବଂ ପୂର୍ତ୍ତି ମନ୍ତ୍ରୀ ପ୍ରଫୁଲ୍ଲ ମଲ୍ଲିକଙ୍କର ଏକ ସୌଜନମୂଳକ ସାକ୍ଷାତ ହୋଇଯାଇଛି। ଏପରିକି ବୁଧବାର ଓଡ଼ିଶା ଖଣି ନିଗମ (ଓଏମ୍ସି)ର ସମ୍ମଳିନୀ (ବୋର୍ଡ ରୁମ୍) କକ୍ଷରେ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ମନ୍ତ୍ରୀ ମଲ୍ଲିକ ଭାରତରେ ଅବସ୍ଥାପିତ ନରଓ୍ବେର ରାଷ୍ଟ୍ରଦୂତ ହାନ୍ସ ଜାକୋବଙ୍କ ମଧ୍ୟରେ ଏକ ଦ୍ୱିପାକ୍ଷିକ ଆଲୋଚନା ସହ ବିଭିନ୍ନ ବିଷୟରେ ଭାବ ବିନିମୟ ହୋଇଥିବା ଜଣାପଡିଛି।
ଏହି ପରିପ୍ରେକ୍ଷୀରେ ଭାରତରେ ଅବସ୍ଥାପିତ ରୟାଲ ନରଓ୍ବେ ଦୂତାବାସର ୨ୟ ସଚିବ ଜୋହାନ ବେଜରକେମ୍ଙ୍କ ସହ ଭାରତ ଏବଂ ରୟାଲ ନରଓ୍ବେର ବାଣିଜି୍ୟକ ପରାମର୍ଶଦାତା କ୍ରିଷ୍ଟ୍ରିଆନ୍ ରୋଡ୍ରିଗୋ ଓ ଅନ୍ୟମାନେ ମଧ୍ୟ ଉପସ୍ଥିତ ଥିଲେ। ସେହିଭଳି ଓଏମ୍ସିର ଅଧ୍ୟକ୍ଷ ଦେଓରଞ୍ଜନ ସିଂ ଉଭୟ ମନ୍ତ୍ରୀ ଓ ନରଓ୍ବେର ପ୍ରତିନିଧି ମଣ୍ଡଳୀଙ୍କୁ ସ୍ବାଗତ କରିବା ସହ ଉକ୍ତ ଆଲୋଚନାରେ ଅଂଶ ଗ୍ରହଣ କରିଥିଲେ।
ଏହି ଅବସରରେ ଓଏମ୍ସିର ବହୁ ବରିଷ୍ଠ ଅଧିକାରୀ ଓ ଅନ୍ୟମାନେ ଉପସ୍ଥିତ ଥିଲେ। ଉଲ୍ଲେଖଯୋଗ୍ୟ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଦୁବାଇ, ମୁମ୍ବାଇ ଓ ବେଙ୍ଗାଲୁରୁଠାରେ ଆୟୋଜିତ ନିବେଶକ ସମ୍ମିଳନୀ ପରେ ବୁଧବାରଠାରୁ ଓଡ଼ିଶାରେ ମେକ୍ ଇନ୍ ଓଡ଼ିଶା କନ୍କ୍ଲେଭ-୨୦୨୨ର ୩ୟ ସଂସ୍କରଣ ଆରମ୍ଭ ହୋଇଯାଇଛି। ଉକ୍ତ କନ୍କ୍ଲେଭରେ ଦେଶ ବିଦେଶର ଅନେକ ପ୍ରତିଷ୍ଠିତ ଶିଳ୍ପପତି ତଥା ବିଶିଷ୍ଟ ଉଦ୍ୟୋଗପତିମାନଙ୍କ ମଧ୍ୟରେ ନରଓ୍ବେର ରାଷ୍ଟ୍ରଦୂତ ମଧ୍ୟ ସାମିଲ ଅଛନ୍ତି।
