ନୂଆଦିଲ୍ଲୀ,୧୬।୩: କୃଷି ଆଇନ ବିରୋଧରେ ଆନ୍ଦୋଳନରତ ଚାଷୀଙ୍କୁ ମେଘାଳୟ ରାଜ୍ୟପାଳ ସତ୍ୟପାଲ୍ ମଲିକ ସମର୍ଥନ କରିଛନ୍ତି। ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ ନ କରିବା ଲାଗି ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହାଙ୍କୁ ଅନୁରୋଧ କରିଛନ୍ତି। ୟୁପିର ବାଗପତ୍ଠାରେ ଏକ ଉତ୍ସବରେ ଉଦ୍ବୋଧନ ଦେବା ଅବସରରେ ସତ୍ୟପାଲ କହିଥିଲେ, କେନ୍ଦ୍ର ସରକାର ଫସଲର ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି) ଉପରେ ଆଇନଗତ ଗ୍ୟାରେଣ୍ଟି ପ୍ରଦାନ କଲେ ଚାଷୀ ଆଶ୍ୱସ୍ତ ହେବେ। କୃଷକ ନେତା ରାକେଶ ଟିକାଏତ୍ଙ୍କୁ ଗିରଫ କରାଯିବା ନେଇ ଶୁଣିବା ପରେ ସତ୍ୟପାଲ ଏହାକୁ ଅଟକାଇଥିଲେ ବୋଲି କହିଛନ୍ତି। ସେ ଚାଷୀମାନଙ୍କ ବିରୋଧରେ ଆଇନଗତ ବଳ ପ୍ରୟୋଗ ନ କରିବାକୁ ପ୍ରଧାନମନ୍ତ୍ରୀ ଓ ସ୍ବରାଷ୍ଟ୍ରମନ୍ତ୍ରୀଙ୍କୁ ଅନୁରୋଧ କରିଥିଲେ। କୌଣସି ଆଇନ ଚାଷୀଙ୍କ ସପକ୍ଷରେ ଯାଉ ନାହିଁ। କୃଷକ ଓ ସୈନିକ ସନ୍ତୁଷ୍ଟ ନ ହେଲେ ଦେଶ ଆଗେଇପାରିବ ନାହିଁ ଓ ସୁରକ୍ଷିତ ରହିପାରିବ ନାହିଁ। ତେଣୁ ସେମାନଙ୍କୁ ସନ୍ତୁଷ୍ଟ କରି ରଖିବା ଆବଶ୍ୟକ ବୋଲି ମେଘାଳୟ ରାଜ୍ୟପାଳ କହିଛନ୍ତି। ପ୍ରତି ୩ ବର୍ଷରେ ସରକାରୀ କର୍ମଚାରୀମାନଙ୍କ ବେତନ ବଢ଼ିଚାଲିଥିବାବେଳେ ଚାଷୀମାନେ ଦିନକୁ ଦିନ ଅଧିକ ଗରିବ ହେଉଛନ୍ତି। ଚାଷୀ ଯେକୌଣସି ସ୍ଥାନରେ ଫସଲ ବିକିପାରିବ ବୋଲି କୁହାଯାଉଛି। ଏହା ୧୫ ବର୍ଷର ପୁରୁଣା ଆଇନ। ହେଲେ ମଥୁରା ଚାଷୀ ଗହମ ନେଇ ପଲଓ୍ବାଲ ଗଲେ ସେଠାରେ ଲାଠିଚାର୍ଜର ସମ୍ମୁଖୀନ ହେଉଛି। ଆଇନର ସଂଶୋଧନ ହେବା ସହ ଚାଷୀଙ୍କ ସମସ୍ୟାର ସମାଧାନ ହେବା ଆବଶ୍ୟକ ବୋଲି ସେ ମତ ଦେଇଥିଲେ।
