ଶ୍ରୀନଗର,୨୦।୨: ଜମ୍ମୁ-କଶ୍ମୀରରେ ହୋଇଥିବା ଆତଙ୍କବାଦୀ ଆକ୍ରମଣରେ ତିନି ଜଣ ପୋଲିସ ଶହୀଦ ହେବାର ଗୋଟିଏ ଦିନ ପରେ ପିଡିଏଫ ମୁଖ୍ୟ ମେହବୁବା ମୁଫତି ପାକିସ୍ତାନ ସହ ଆଲୋଚନା କରିବାକୁ କେନ୍ଦ୍ରକୁ ଆହ୍ବାନ କରିଛନ୍ତି। କେନ୍ଦ୍ର ଶାସିତ ଅଞ୍ଚଳରେ ଅଞ୍ଚଳରେ କୌଣସି ହିଂସା ନ ହେବା ସୁନିଶ୍ଚିତ କରିବାକୁ ସେ ଦାବି କରିଛନ୍ତି। କାଶ୍ମୀରର ଅନନ୍ତନାଗ ଜିଲାର ଲୋଗାରିପୋରା ଆଇସମୁକାମ ଅଞ୍ଚଳରେ ଅବସ୍ଥିତ ଶହୀଦ କନଷ୍ଟେବଳ ସୁହେଲ ଅହମ୍ମଦଙ୍କ ଘରକୁ ଯାଇ ପରିବାରକୁ ସମବେଦନା ଜଣାଇଛନ୍ତି। ଅହମ୍ମଦ ଜମ୍ମୁ କଶ୍ମୀର ପୋଲିସର ଜଣେ କନଷ୍ଟେବଳ ଥିଲେ ଏବଂ ଗତ ଶୁକ୍ରବାର ଦିନ ଶ୍ରୀନଗର ସହରର ବାଘାଟ ଅଞ୍ଚଳରେ ଆତଙ୍କବାଦୀ ଆକ୍ରମଣରେ ନିହତ ହୋଇଥିଲେ। ଏହି ଆକ୍ରମଣରେ ଅହମ୍ମଦଙ୍କ ବ୍ୟତୀତ ଅନ୍ୟ ଜଣେ ପୋଲିସ କର୍ମଚାରୀ ମଧ୍ୟ ଶହୀଦ ହୋଇଥିବାବେଳେ ବୁଦ୍ଧଗାମ ଜିଲାରେ ଆତଙ୍କବାଦୀଙ୍କ ସହ ଏନକାଉଣ୍ଟରରେ ଜଣେ ପୋଲିସର ମୃତ୍ୟୁ ଘଟିଥିଲା।ଶହୀଦ ପୋଲିସର ପରିବାରକୁ ଭେଟିବା ପରେ ମେହବୁବା କହିଛନ୍ତି ଯେ କଶ୍ମୀର ଏକ ବଡ ପ୍ରସଙ୍ଗ ଏବଂ ଏହି ସମସ୍ୟାର ସମାଧାନ ହେବା ଉଚିତ। ଯାହା ଦ୍ୱାରା ଜମ୍ମୁ କଶ୍ମୀରରେ ରକ୍ତପାତ ବନ୍ଦ ହୋଇଯିବ ଏବଂ ଲୋକମାନେ ଏଠାରେ ଶାନ୍ତିରେ ବଞ୍ଚିପାରିବେ ବୋଲି ସେ କହିଛନ୍ତି।