ନୂଆଦିଲ୍ଲୀ/ଶ୍ରୀନଗର,୨୫।୧୦ : ପିଡିପି ସଭାପତି ତଥା ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫତି ବ୍ରିଟେନରେ ମୂଳ ଭାରତୀୟ ଋଷି ସୁନକଙ୍କ ପ୍ରଧାନମନ୍ତ୍ରୀ ହେବା ଉପରେ ପ୍ରତିକ୍ରିୟା ପ୍ରକାଶ କରିଛନ୍ତି। ସେ କହିଛନ୍ତି ଯେ ଭାରତୀୟଙ୍କ ପାଇଁ ଏହା ଏକ ଗର୍ବର ମୁହୂର୍ତ୍ତ। ତେବେ ଏହା ସହିତ ସେ କେନ୍ଦ୍ର ସରକାରଙ୍କ ସିଏଏ ଏବଂ ଏନଆରସିକୁ ଟାର୍ଗେଟ କରିଛନ୍ତି।
ମେହବୁବା ମୁଫତି ସୋସିଆଲ ମିଡିଆରେ କହିଛନ୍ତି, ଏହା ଏକ ଗର୍ବର ମୁହୂର୍ତ୍ତ ଯେ ବ୍ରିଟେନରେ ପ୍ରଥମ ମୂଳ ଭାରତୀୟ ପ୍ରଧାନମନ୍ତ୍ରୀ ହେବେ। ଯାହାକୁ ସମଗ୍ର ଭାରତରେ ପ୍ରକୃତରେ ଉତ୍ସବ ପାଳନ କରାଯିବା ଉଚିତ। ମନେରଖିବା ଉଚିତ ଯେ ବ୍ରିଟେନ ସଂଖ୍ୟାଲଘୁ ସଦସ୍ୟଙ୍କୁ ଏହାର ପ୍ରଧାନମନ୍ତ୍ରୀ ଭାବରେ ଗ୍ରହଣ କରିଛି। ଅପରପକ୍ଷରେ ଭାରତରେ ଜନସାଧାରଣ ସିଏଏ ଓ ଏନଆରସି ପରି ବିଭାଜନକାରୀ ଏବଂ ଭେଦଭାବକାରୀ ନିୟମ ଦ୍ୱାରା ବନ୍ଧା ହୋଇଛନ୍ତିି।
ମେହବୁବାଙ୍କ ଏହି ଟୁଇଟ ନେଇ ପାଟନା ସାହିବ ଏମ୍ ପି ରବିଶଙ୍କର ପ୍ରସାଦ ପ୍ରଶ୍ନ କରିଛନ୍ତି ଜମ୍ମୁ-କଶ୍ମୀରରେ କୌଣସି ସଂଖ୍ୟାଲଘୁଙ୍କୁ ମୁଖ୍ୟମନ୍ତ୍ରୀ ଭାବରେ ମେହବୁବା ଗ୍ରହଣ କରିବେ କି? ଏହାର ଏକ ସ୍ପଷ୍ଟ ଉତ୍ତର ଦେବାକୁ ରବିଶଙ୍କର କହିଛନ୍ତି।
