ନୂଆଦିଲ୍ଲୀ,୨୪।୫: ଦେଶ ଛାଡ଼ିଥିବା ହୀରା ବ୍ୟବସାୟୀ ମେହୁଲ ଚୋକସୀଙ୍କ ଏକ ବଡ଼ ବୟାନ ଶୁକ୍ରବାର ସାମ୍ନାକୁ ଆସିଛି। ତାଙ୍କୁ ‘ପଳାତକ’ କୁହାଯାଇପାରିବ ନାହିଁ, କାରଣ ସେ ଭାରତ ଆସିବାକୁ ଇଚ୍ଛୁକ। ଅନେକ କାରଣରୁ ସେ ଭାରତକୁ ଫେରିପାରୁନାହାନ୍ତି। ସେଥିରୁ ପ୍ରମୁଖ କାରଣ ହେଉଛି ତାଙ୍କ ପାର୍ସପୋର୍ଟକୁ ସସ୍ପେଣ୍ଡ ରଖାଯାଇଛି। ଚୋକସୀ ମୁମ୍ବାଇର ଏକ ସ୍ବତନ୍ତ୍ର କୋର୍ଟରେ ତାଙ୍କ ଓକିଲଙ୍କ ମାଧ୍ୟମରେ ଏହି କଥା କହିଛନ୍ତି।
ମେହୁଲ ମନି ଲଣ୍ଡରିଂ ମାମଲାର ଶୁଣାଣି କରୁଥିବା ଏକ ସ୍ବତନ୍ତ୍ର ଅଦାଲତକୁ କହିଛନ୍ତି ଯେ, ସେ ଅପରାଧିକ ମୋକଦ୍ଦମାକୁ ଏଡ଼ାଇବା ଲାଗି ଭାରତ ଛାଡ଼ି ନାହାନ୍ତି। ନା ସେ ଦେଶକୁ ଫେରିବାକୁ ମନା କରୁଛନ୍ତି। ତାଙ୍କ ପାସପୋର୍ଟ ଭାରତୀୟ ଅଧିକାରୀମାନେ ସସ୍ପେଣ୍ଡ କରିଛନ୍ତି। ଏଥିଲାଗି ସେ ଭାରତକୁ ଫେରିପାରୁନାହାନ୍ତି। ତେଣୁ ତାଙ୍କୁ ‘ପଳାତକ ଅର୍ଥନୈତିକ ଅପରାଧୀ’ ଘୋଷଣା କରାଯାଇପାରିବ ନାହିଁ।
ତାଙ୍କ ପାସପୋର୍ଟ ନିଲମ୍ବନ ସହ ଜଡିତ ଡକ୍ୟୁମେଣ୍ଟ ମାଗି ମେହୁଲ ଚୋକସି କୋର୍ଟରେ ଏକ ପିଟିଶନ ଦାଖଲ କରିଛନ୍ତି। ଏଥିସହିତ ତାଙ୍କ ବିରୋଧରେ ଚାଲିଥିବା ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଅନୁସନ୍ଧାନ ସହ ଜଡିତ କାଗଜପତ୍ରକୁ ଡକାଇବାକୁ ନିର୍ଦ୍ଦେଶ ଦେବାକୁ ଅନୁରୋଧ କରାଯାଇଛି।