ନୁକ୍: ଜଳବାୟୁ ପରିବର୍ତ୍ତନ କାରଣରୁ ସମଗ୍ର ବିଶ୍ୱରେ ପ୍ରାକୃତିକ ବିପର୍ଯ୍ୟୟର ମାତ୍ରା ବଢ଼ିବାରେ ଲାଗିଛି। ଏହାର ପ୍ରଭାବ ଗ୍ରୀନ୍ଲାଣ୍ଡ ଉପରେ ମଧ୍ୟ ପଡ଼ିଛି। ଏଠାରେ ବରଫ ଚାଦର ତରଳିବା କାରଣରୁ ସମୁଦ୍ର ଜଳସ୍ତର ବୃଦ୍ଧି ଆଶଙ୍କା କରାଯାଉଛି। ଜଳବାୟୁ ପରିବର୍ତ୍ତନ ଯୋଗୁ ବୃଦ୍ଧି ପାଇଥିବା ତାପମାତ୍ରା ଏହାର ମୁଖ୍ୟ କାରଣ ବୋଲି ବୈଜ୍ଞାନିକମାନେ ଦାବି କରିଛନ୍ତି। ତେବେ ଏହାର ପ୍ରଭାବ ସମଗ୍ର ବିଶ୍ୱ ଉପରେ ପଡ଼ିବା ସହ ସମୁଦ୍ର ଜଳସ୍ତର ୨୭ ସେଣ୍ଟିମିଟରରୁ ୧୦.୬ ଇଞ୍ଚ ବୃଦ୍ଧି ପାଇବା ଆଶଙ୍କା ରହିଛି। ଗ୍ରୀନ୍ଲାଣ୍ଡର ବରଫ ଚାଦର ଉପରେ ଜମାହୋଇଥିବା ଡେଡ୍ ଆଇସ୍କୁ ଜୋମ୍ବି ଆଇସ୍ କୁହାଯାଏ। ଦିନକୁଦିନ ଗ୍ରୀନ୍ଲାଣ୍ଡରେ lମ୍ବୋ ଆଇସ୍ର ପରିମାଣ କମିବା ଆରମ୍ଭ ହୋଇଛି। ଜଳବାୟୁ ପରିବର୍ତ୍ତନ କାରଣରୁ ଜୋମ୍ବି ଆଇସ୍ ତରଳୁଥିବା ଡେନମାର୍କ ଏବଂ ଗ୍ରୀନ୍ଲାଣ୍ଡ ବିଶେଷଜ୍ଞଙ୍କ ପକ୍ଷରୁ କରାଯାଇଥିବା ଅଧ୍ୟୟନରେ ଏହା ଦାବି କରାଯାଇଛି। ବିଶ୍ୱରେ ଜୀବାଶ୍ମ ଇନ୍ଧନ ବ୍ୟବହାର ବନ୍ଦ ହୋଇଯାଇଥିବାବେଳେ ଗ୍ରୀନ୍ଲାଣ୍ଡ ରେ ୧୧୦ କ୍ୱାଡ୍ରିଲିଓନ୍ ଟନ୍ର ବରଫ ଚାଦର ତରଳିଛି। ଆଗାମୀ ଦିନରେ ଏହାର ପରିମାଣ ବୃଦ୍ଧି ପାଇବା ଆଶଙ୍କା କରାଯାଉଥିବାବେଳେ ତାପମାତ୍ରାରେ ବୃଦ୍ଧି ଏହାର ପ୍ରମୁଖ କାରଣ ବୋଲି ପ୍ରଫେଶର ଜାସୋନ ବକ୍ସ କହିଛନ୍ତି।
ଏକ ସ୍ବତନ୍ତ୍ର ବିଶେଷଜ୍ଞ କମିଟି ପକ୍ଷରୁ ୨୦୧୨ରେ ଗ୍ରୀନ୍ଲାଣ୍ଡର ବରଫ ଚାଦର ତରଳିବା ଉପରେ ଅଧ୍ୟୟନ ଆରମ୍ଭ ହୋଇଥିଲା, ଯାହା ତୁଳନାରେ ବରଫ ତରଳିବାର ମାତ୍ରା ଏବେ ଦ୍ୱିଗୁଣା (୭୮ ସେଣ୍ଟିମିଟର) ହୋଇଛି। ଅନ୍ୟପଟେ ବରଫ ପରିମାଣ କମିବା ସହ ବରଫ ତରଳିବା ପ୍ରକ୍ରିୟାରେ ବୃଦ୍ଧି ଘଟିଛି। ଏଠାରେ ଥିବା ମୋଟ ବରଫ ପରିମାଣର ୩.୩ ପ୍ରତିଶତ ବରଫ ଚାଦର ତରଳି ସାରିଛି। ଗ୍ରୀନ୍ଲାଣ୍ଡ ହେଉଛି ବିଶ୍ୱର ଦ୍ୱିତୀୟ ବୃହତ୍ତମ ସ୍ଥାନ, ଯେଉଁଠାରେ ପ୍ରଚୁର ପରିମାଣର ବରଫ ରହିଛି। କୋଇଲା, ତେଲ, ପ୍ରାକୃତିକ ଗ୍ୟାସ ଜଳିବା ଏବଂ ଜଳବାୟୁ ପରିବର୍ତ୍ତନ ସକାଶେ ଗ୍ରୀନ୍ଲାଣ୍ଡର ବରଫ ତରଳୁଥିବା ଦେଖିବାକୁ ମିଳିଛି।