ସମ୍ବଲପୁର,୨୬।୪(ବ୍ୟୁରୋ): ସମ୍ବଲପୁରରେ ହନୁମାନ ଜୟନ୍ତୀ ଶୋଭାଯାତ୍ରା ସମୟରେ ହୋଇଥିବା ଦଙ୍ଗା ଘଟଣାରେ ଯୁଯୁମୁରା ଥାନା ଭବାନୀପାଲି ଗ୍ରାମର ଆହତ ବିଶ୍ୱନାଥ ଶିଖା ଓରଫ କାଳିଆଙ୍କୁ ମଙ୍ଗଳବାର ଜାତୀୟ ଏସ୍ଟି କମିଶନ ସଦସ୍ୟ ଅନନ୍ତ ନାଏକ ଓ ବିଭାଗର ୨ ବରିଷ୍ଠ ଅଧିକାରୀ ଭେଟିଛନ୍ତି। ହେଲେ ସାନସିଂହାରି ଗ୍ରାମର ମୃତକ ଚନ୍ଦ୍ରଶେଖର ମିର୍ଦ୍ଧାଙ୍କ ପରିବାର ଅନୁପସ୍ଥିତ ଥିବାରୁ ସେମାନେ ଭେଟିପାରି ନ ଥିଲେ। ପରେ ସେମାନେ ଜିଲାପାଳ ଅନନ୍ୟା ଦାସ, ଏସ୍ପି ବାତୁଳା ଗଙ୍ଗାଧରଙ୍କ ସହ ସ୍ଥାନୀୟ ସର୍କିଟ ହାଉସରେ ଆଲୋଚନା କରିଥିଲେ।
ସର୍କିଟ୍ ହାଉସରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇ କମିଶନ ସଦସ୍ୟ ନାଏକ କହିଥିଲେ, ସମ୍ବଲପୁରରେ ହିଂସା ଘଟଣା ନେଇ ବିଭିନ୍ନ ଗଣମାଧ୍ୟମରୁ ଖବର ମିଳିବା ସହ ଅଭିଯୋଗ ମଧ୍ୟ ହୋଇଥିଲା। ଏହାକୁ ନେଇ କମିଶନ ତଦନ୍ତ ଆବଶ୍ୟକ ଥିବା ହୃଦ୍ବୋଧ କରିଥିଲା। ତେଣୁ କମିଶନଙ୍କ ନିର୍ଦ୍ଦେଶକ୍ରମେ ମଙ୍ଗଳବାର ମୃତ ଚନ୍ଦ୍ରଶେଖରଙ୍କ ଘରକୁ ଯାଇଥିଲୁ। ସେଠାରେ ପରିବାରବର୍ଗ ଅନୁପସ୍ଥିତ ରହିଥିଲେ। ସେମାନେ ଶ୍ରାଦ୍ଧ କାର୍ଯ୍ୟ ପାଇଁ ବାହାରକୁ ଯାଇଥିବା ଜାଣିବାକୁ ପାଇଥିଲୁ। ପାଖ ପଡ଼ୋଶୀଙ୍କ ସହ ଆଲୋଚନା କରି ଫେରିଲୁ। ପରେ ଭବାନୀପାଲି ଯାଇ ଆହତ ବିଶ୍ୱନାଥଙ୍କୁ ଭେଟି ଆକ୍ରମଣ ଘଟଣା ସମ୍ପର୍କରେ ରିପୋର୍ଟ ସଂଗ୍ରହ କରିଛୁ। ସମସ୍ତ ରିପୋର୍ଟ କମିଶନ ଅଧ୍ୟକ୍ଷଙ୍କୁ ଦିଆଯିବ। ତଦନ୍ତ ଚାଲିଥିବାରୁ ଗଣମାଧ୍ୟମ ଆଗରେ ସ୍ପଷ୍ଟକରି କିଛି କହିହେବ ନାହିଁ। ହେଲେ ଆହତ କାଳିଆ ପ୍ରଶାସନର ସହଯୋଗ ଉପରେ ଅସନ୍ତୋଷ ବ୍ୟକ୍ତ କରିଥିଲେ। ପ୍ରଶାସନିକ ଅଧିକାରୀଙ୍କ ଆଗରେ କାଳେ ଭୟରେ କିଛି କହିବେ ନାହିଁ, ସେଥିପାଇଁ କାଳିଆଙ୍କୁ ଏକୁଟିଆ ପଚରାଉଚୁରା କରିଥିଲୁ। ଗସ୍ତ ପୂର୍ବରୁ ପ୍ରଶାସନ ଓ ରାଜ୍ୟ ସରକାରଙ୍କୁ ଚିଠିକରି ସୂଚନା ଦିଆଯାଇଥିଲା। ମୃତକଙ୍କ ପରିବାର ଅନୁପସ୍ଥିତ ରହିବା ଚିନ୍ତାଜନକ। ଯେଭଳି ଆଶା ରହିଥିଲା ପ୍ରଶାସନ ତଦନ୍ତରେ ସହଯୋଗ କଲା ନାହିଁ। ମୃତ ଚନ୍ଦ୍ରଶେଖରଙ୍କ ଶେଷକୃତ୍ୟ ରାତିଅଧିଆ କରାଯାଇଥିବା ଜାଣିବାକୁ ପାଇଲୁ, ଯାହା ଜାତିର ପରମ୍ପରା ବାହାରେ। ଶେଷକୃତ୍ୟ ହେବା ସମୟରେ ପରିବାର ସହ ଜାତିର ଲୋକମାନେ ଉପସ୍ଥିତ ରହିଥାନ୍ତି। ତେଣୁ ଏହା ଠିକ୍ ହୋଇ ନାହିଁ। ଏଭଳି ଘଟଣା ଜାତିକୁ ଆଘାତ ଦେଇଛି। ଆଦିବାସୀ ଲୋକମାନେ ଝଗଡ଼ା କରନ୍ତି ନାହିଁ। ସେମାନଙ୍କ ସହ ପ୍ରଶାସନ ଓ ସାମାଜିକ ସ୍ତରରେ ସହଯୋଗର ବାତାବରଣ ରହିବା ଆବଶ୍ୟକ। ଜାତିଆଣ ଆକ୍ଷେପ ମାମଲାରେ କ୍ଷତିପୂରଣ ବାବଦରେ ଟଙ୍କା ଦିଆଯାଇଛି ବୋଲି କମିଶନ ସଦସ୍ୟ କହିଥିଲେ। ସୂଚନାଯୋଗ୍ୟ, ହନୁମାନ ଜୟନ୍ତୀ ଶୋଭାଯାତ୍ରା ସମୟରେ ଏପ୍ରିଲ ୧୨ ଓ ୧୪ରେ ସହରରେ ହିଂସା ଘଟଣା ଘଟିଥିଲା। ଚନ୍ଦ୍ରଶେଖର ଓ କାଳିଆ ଶୋଭାଯାତ୍ରାରେ ଯୋଗଦେଇ ଘରକୁ ଫେରିବା ସମୟରେ ରିଂରୋଡ୍ରେ ମାରଣାସ୍ତ୍ରରେ ଗୋଷ୍ଠୀଗତ ଆକ୍ରମଣ ହୋଇଥିଲା। ଘଟଣାସ୍ଥଳରେ ଚନ୍ଦ୍ରଶେଖରଙ୍କ ମୃତ୍ୟୁ ଘଟିଥିବା ବେଳେ କାଳିଆ ଆହତ ହୋଇଥିଲେ।
