ଆନାପୋଲିସ୍, ୨୭।୯: କରୋନା ଆକ୍ରାନ୍ତ ହୋଇ ସୁସ୍ଥ ହୋଇଥିବା ବ୍ୟକ୍ତିଙ୍କଠାରେ ଏବେ ବିଭିନ୍ନ ପ୍ରକାର ସମସ୍ୟା ଦେଖାଦେଉଛି। ଏନେଇ ମେରୀଲାଣ୍ଡର ଜନ୍ ହପକିନ୍ସ୍ ବିଶ୍ୱବିଦ୍ୟାଳୟର ଗବେଷକଙ୍କ ପକ୍ଷରୁ ହୋଇଥିବା ଏକ ଗବେଷଣା ରିପୋର୍ଟରେ ଉଲ୍ଲେଖ କରାଯାଇଛି। କରୋନା ଯୋଗୁ ମସ୍ତିଷ୍କ ଉପରେ ନକାରାତ୍ମକ ପ୍ରଭାବ ପଡୁଛି। ଫଳରେ ସ୍ମୃତିଶକ୍ତି ହ୍ରାସ ପାଇବା ସହିତ ମନରେ ଭ୍ରମ ସୃଷ୍ଟି ହେଉଛି। ଏହା ସହିତ ଲୋକଙ୍କ ଚାଲିଚଳଣ, ବ୍ୟବହାର ଆଦି ମଧ୍ୟ ବଦଳି ଯାଉଛି। ହସ୍ପିଟାଲରେ ରହି ଚିକିତ୍ସିତ ହୋଇ ଘରକୁ ଫେରିଥିବା ଲୋକଙ୍କଠାରେ ଏଭଳି ସମସ୍ୟା ଅଧିକ ଦେଖିବାକୁ ମିଳୁଛି। ଏହାଯୋଗୁ ବ୍ରେନ୍ ଷ୍ଟ୍ରୋକ୍ ଏବଂ ବ୍ରେନ୍ ହେମରେଜ୍ ହେବାର ଆଶଙ୍କା ବଢୁଥିବା ରିପୋର୍ଟରେ ଦର୍ଶାଯାଇଛି। ଏଭଳି ସମସ୍ୟା ସର୍ଭେରେ ଅନ୍ତର୍ଭୁକ୍ତ କରାଯାଇଥିବା ଅଧାରୁ ଅଧିକ ଲୋକଙ୍କଠାରେ ଦେଖିବାକୁ ମିଳୁଥିବା ଜନ୍ ହପକିନ୍ସ୍ ବିଶ୍ୱବିଦ୍ୟାଳୟର ଏମ୍ଡ଼ି ରବର୍ଟ ସିଓ୍ବନ୍ସ୍ କହିଛନ୍ତି। ତେବେ ବ୍ରେନ୍ ଉପରେ କାହିଁକି ଏଭଳି ପ୍ରଭାବ ପଡୁଛି ସେନେଇ ଜଣାପଡ଼ି ନ ଥିବା ସେ କହିଛନ୍ତି। ସେହିପରି କରୋନା ଆକ୍ରାନ୍ତଙ୍କ କ୍ଷେତ୍ରରେ ରକ୍ତ ଜମାଟ ବାନ୍ଧିବା ସମସ୍ୟା ଅଧିକ ଦେଖାଦେଉଛି। ଏହା ଉପରେ ଅଧିକ ଗବେଷଣା ଜାରି ରହିଥିବା ସେ ସୂଚନା ଦେଇଛନ୍ତି।
