ନୟାଗଡ଼ ଅଫିସ,୨୭।୩: ନୟାଗଡ଼ରୁ ଭଦ୍ରକ ଚାଲିବ ମେମୁ ଟ୍ରେନ୍। ଏପରି ସୂଚନା ଆସିଛି ଭଦ୍ରକର ପୂର୍ବତନ ବିଧାୟକ ନରେନ୍ଦ୍ର ପଲେଇଙ୍କ ପାଖକୁ। ରେଳ ବିଭାଗ ପକ୍ଷରୁ ଆସିଥିବା ଏହି ସୂଚନା ଅନୁସାରେ ଏପ୍ରିଲ ପ୍ରଥମ ସପ୍ତାହରୁ ରେଳ ଚଳାଚଳ ହେବ। ଅନ୍ୟପକ୍ଷେ ଭଦ୍ରକରୁ ନୟାଗଡ଼ ରେଳ ଚଳାଚଳ ପାଇଁ ଇଷ୍ଟକୋଷ୍ଟ ରେଲୱେ ଜେନେରାଲ ମ୍ୟାନେଜର ମନୋଜ ଶର୍ମାଙ୍କୁ ନୟାଗଡ଼ ବିଧାୟକ ଅରୁଣ କୁମାର ସାହୁ ଗତ ୧୫ ତାରିଖରେ ଚିଠି ଲେଖିଥିଲେ। ବିଧାୟକ ଚିଠିରେ ଦର୍ଶାଇଥିଲେ, ନୟାଗଡ଼ ଜିଲାର ଅନେକ ବାସିନ୍ଦା ଭଦ୍ରକ, ବାଲେଶ୍ୱର, କଟକ ଜିଲାରେ ରହୁଛନ୍ତି। ନୟାଗଡ଼କୁ ଆସୁଥିବା ଟ୍ରେନ୍ର ସଦୁପଯୋଗ କରିପାରୁନାହାନ୍ତି। ନୟାଗଡ଼ବାସୀଙ୍କ ଆର୍ଥିକ ଓ ସାମାଜିକ କ୍ଷେତ୍ରରେ ସୁଧାର ଆଣିବାକୁ ଭଦ୍ରକକୁ ରେଳ ଚଳାଚଳ ନିହାତି ଦରକାର ବୋଲି ଚିଠିରେ ଲେଖିଛନ୍ତି। ଯେଉଁ କାରଣରୁ ହେଉନା କାହିଁକି ନୟାଗଡ଼କୁ ଭଦ୍ରକରୁ ରେଳ ଚଳାଚଳ ନେଇ ଜିଲାବାସୀ ଖୁସି ହୋଇଛନ୍ତି। ଯଦିଓ ସରକାରୀ ଭାବେ ଏହା କୁହାଯାଇନାହିଁ। ତେବେ ମିଳିଥିବା ସୂଚନା ଅନୁସାରେ, ଭଦ୍ରକରୁ ଉକ୍ତ ଟ୍ରେନ୍ ସକାଳ ୫ଟା ୪୫ରେ ବାହାରି କଟକରେ ପୂର୍ବାହ୍ନ ୮ଟା ୪୦ରେ ପହଞ୍ଚତ୍ବ। ଭୁବନେଶ୍ୱରରୁ ଟ୍ରେନ୍ ସାଢ଼େ ୯ଟାରେ ଛାଡ଼ିବାକୁ ଥିବାବେଳେ ନୟାଗଡ଼ ଟାଉନ ଷ୍ଟେଶନରେ ପୂର୍ବାହ୍ନ ସାଢ଼େ ୧୧ଟାରେ ପହଞ୍ଚତ୍ବ। ସେହିପରି ଅପରାହ୍ନ ୪ଟାରେ ନୟାଗଡ଼ ଟାଉନ ରେଳଷ୍ଟେଶନରୁ ବାହାରି ଭଦ୍ରକରେ ରାତି ସାଢ଼େ ୧୦ଟାରେ ପହଞ୍ଚତ୍ବ ବୋଲି ଜଣାପଡ଼ିଛି।