ମେଲବୋର୍ନ,୧୭।୨(ଏପି): ଅଷ୍ଟ୍ରେଲିଆନ ଓପନ ପୁରୁଷ ସିଙ୍ଗଲ୍ସର ପ୍ରଥମ ସେମିଫାଇନାଲ ମୁକାବିଲା ସ୍ପଷ୍ଟ ହୋଇଛି। ଏଥିରେ ଟପ୍ ସିଡ୍ ସର୍ବିୟାର ଅଭିଜ୍ଞ ଖେଳାଳି ନୋଭାକ ଜୋକୋଭିଚ୍ ଓ ରୁଷିଆର କ୍ୱାଲିଫାୟର ତଥା ବିଶ୍ୱର ୧୧୪ ନମ୍ବର ଖେଳାଳି ଅସଲାନ କାରାସେଭ ପରସ୍ପରକୁ ଭେଟିବେ। ଟେନିସର ପ୍ରଫେଶନାଲ ଏରାରେ ୨୭ ବର୍ଷୀୟ କାରାସେଭ ପ୍ରଥମ ଖେଳାଳି ଭାବେ ପଦାର୍ପଣରେ କୌଣସି ଗ୍ରାଣ୍ଡସ୍ଲାମ ସେମିଫାଇନାଲ ଖେଳିବାକୁ ଯୋଗ୍ୟତା ହାସଲ କରିଛନ୍ତି। ୯ଥର ପ୍ରୟାସ କରିବା ପରେ ଗତ ମାସରେ ସେ ପ୍ରଥମଥର ପାଇଁ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଖେଳିବାକୁ ଯୋଗ୍ୟତା ହାସଲ କରିଥିଲେ। ଏବେ ମେଲବୋର୍ନ ପାର୍କରେ ୫ଟି ମ୍ୟାଚ୍ ଜିତିଛନ୍ତି। ଏହି କ୍ରମରେ ସେ ୩ଜଣ ସିଡେଡ ଖେଳାଳିଙ୍କୁ ହରାଇଛନ୍ତି। ମଙ୍ଗଳବାର କ୍ୱାର୍ଟର ଫାଇନାଲ ମ୍ୟାଚ୍ରେ ସେ ବୁଲଗେରିଆର ୧୮ତମ ସିଡ୍ ଖେଳାଳି ଗ୍ରିଗର ଡିମିଟ୍ରୋଭଙ୍କୁ ୬-୨, ୪-୬, ୧-୬, ୨-୬ ସେଟ୍ରେ ହରାଇ ସେମିକୁ ଉଠିଛନ୍ତି। ଏହାପୂର୍ବରୁ ସେ ୮ ନମ୍ବର ଖେଳାଳି ଡିଏଗୋ ସ୍ବାର୍ଜମ୍ୟାନ ଓ ୨୦ ନମ୍ବର ଖେଳାଳି ଫେଲିକ୍ସ ଅଗେର- ଆଲିଆଜିମଙ୍କୁ ହରାଇଥିଲେ। ପ୍ୟାଟ୍ରିକ ମ୍ୟାକଏନ୍ରୋଙ୍କ ପରେ କାରାସେଭ ସର୍ବନିମ୍ନ ର଼୍ୟାଙ୍କର ଖେଳାଳି ଭାବେ ଅଷ୍ଟ୍ରେଲିଆନ୍ ଓପନ ସେମିକୁ ଉଠିଛନ୍ତି।
ସେହିପରି ଅନ୍ୟଏକ କ୍ୱାର୍ଟର ଫାଇନାଲରେ ୮ଥର ଅଷ୍ଟ୍ରେଲିଆନ ଓପନ ଟାଇଟଲ ହାସଲ କରିଥିବା ଜୋକୋଭିଚ୍ ଷଷ୍ଠ ସିଡ୍ ରୁଷିଆର ଆଲେକଜାଣ୍ଡର ଜେଭେରେଭଙ୍କୁ ୭-୭, ୬-୨, ୬-୪, ୭-୬ ସେଟ୍ରେ ହରାଇ ସେମିଫାଇନାଲରେ ପ୍ରବେଶ କରିଛନ୍ତି। ଡିଫେଣ୍ଡିଂ ଚାମ୍ପିୟନ ଜୋକୋଭିଚ୍ଙ୍କୁ ମଙ୍ଗଳବାର ଏହି ମ୍ୟାଚ ଜିତିବାକୁ ବେଶ୍ ପରିଶ୍ରମ କରିବାକୁ ପଡିଥିଲା। ଏଥିସହ ୩୩ ବର୍ଷୀୟ ଜୋକୋଭିଚ୍ କ୍ୟାରିୟରର ୩୯ତମ ଗ୍ରାଣ୍ଡସ୍ଲାମ ସେମିଫାଇନାଲରେ ପ୍ରବେଶ କରିଛନ୍ତି।