ଭୁବନ, ୨୨।୪ ସହରଠାରୁ ଅନତି ଦୂରରେ ପ୍ରବାହିତ ହେଉଛି ବ୍ରାହ୍ମଣୀ। ଓଡ଼ିଶାର ଏହି ଦ୍ୱିତୀୟ ବୃହତ୍ତମ ନଦୀ ପରିପୁଷ୍ଟ କରୁଛି ଜନଜୀବନକୁ। ଏଠାରୁ ଟଣା ହୋଇଯାଉଥିବା ପାଣିରେ ଚାଲୁଛି ପଡ଼ୋଶୀ ଜିଲାର ଶତାଧିକ କମ୍ପାନୀ। ଅଥଚ ନଦୀକୂଳରେ ଥାଇ ପାଣି ମୁନ୍ଦାଏ ପାଇଁ ଛଟପଟ ହେଉଛନ୍ତି ଭୁବନ ଅଞ୍ଚଳବାସୀ। ସହରାଞ୍ଚଳରେ ଜଳସଙ୍କଟ ସବୁଦିନିଆ ସମସ୍ୟାରେ ପରିଣତ ହୋଇଥିବାବେଳେ ଏହାର ସମାଧାନରେ ବିଫଳ ହୋଇଛି ଜନସ୍ବାସ୍ଥ୍ୟ ବିଭାଗ ଏବଂ ଏନ୍ଏସି ପ୍ରଶାସନ।
୧୯୭୧ରେ ଏନ୍ଏସି ମାନ୍ୟତା ପାଇଥିଲା ଢେଙ୍କାନାଳ ଜିଲାର ଐତିହାସିକ ସହର ଭୁବନ। ଇତିମଧ୍ୟରେ ବିତିଗଲାଣି ଦୀର୍ଘ ୫୦ ବର୍ଷ। ୨୦୧୧ ଜନଗଣନା ଅନୁଯାୟୀ ଏଠାକାର ଜନସଂଖ୍ୟା ଥିଲା ୨୨ ହଜାର ୧୮୭। ଗତ ୧୧ ବର୍ଷ ମଧ୍ୟରେ ବଢ଼ିଛି ସହରର କଳେବର। ବୃଦ୍ଧିପାଇଛି ଜନସଂଖ୍ୟା। ସହର ଉପକଣ୍ଠରେ ମୁଣ୍ଡ ଟେକିଛି ନୂଆ ବସ୍ତି। ଜିଲାର ଅନ୍ୟତମ ପ୍ରମୁଖ ବ୍ୟବସାୟିକ ପେଣ୍ଠସ୍ଥଳୀ ହୋଇଥିବାରୁ ଦୈନିକ ହଜାର ହଜାର ଲୋକ ଏଠାକୁ ଆସୁଛନ୍ତି। ହେଲେ ଅଦ୍ୟାବଧି ଜଳଯୋଗାଣ ସୁବ୍ୟବସ୍ଥିତ ହୋଇପାରୁନାହିଁ। ପ୍ରକୃତ ଜନସଂଖ୍ୟାର ହିସାବ ବିଭାଗ ପାଖରେ ନ ଥିବାବେଳେ ଚିରାଚରିତ ଢଙ୍ଗରେ ଚାଲିଛି ଜଳଯୋଗାଣ। ପାନୀୟ ଜଳଯୋଗାଣ ପାଇଁ ମାଷ୍ଟରପ୍ଲାନ୍ କାଗଜପତ୍ରରେ ସୀମିତ ହୋଇ ରହିଯାଇଥିବାବେଳେ ବର୍ଷତମାମ ଜଳକଷ୍ଟର ଶିକାର ହେଉଛନ୍ତି ସ୍ଥାନୀୟ ବାସିନ୍ଦା।
ଜନସ୍ବାସ୍ଥ୍ୟ ବିଭାଗର ସୂଚନା ଅନୁଯାୟୀ, ସହରରେ ଦୈନିକ ୨୦ ଲକ୍ଷ ୮୫ ହଜାର ଲିଟର ପାନୀୟ ଜଳ ଯୋଗାଣ କରାଯାଉଛି। ୧୫ ଓ୍ବାର୍ଡରେ ୧୨୧ ନଳକୂପ, ୯୮ ଷ୍ଟାଣ୍ଡ୍ପୋଷ୍ଟ ସମେତ ଖୋଲାକୂଅ ରହିଛି। ହେଲେ ଏହା ଲୋକଙ୍କ ପାଇଁ ଯଥେଷ୍ଟ ହେଉନାହିଁ। ଏନ୍ଏସିର ୨, ୫, ୯, ୧୦ ଏବଂ ୧୧ ନଂ. ଓ୍ବାର୍ଡରେ ସମସ୍ୟା ଉତ୍କଟ ରୂପ ଧାରଣ କଲାଣି। ପାଣି ପାଇଁ ଅଧିକାଂଶ ସମୟରେ ଗଣ୍ଡଗୋଳ ହେଉଛି। ସମସ୍ୟା ଧରି ବୁଦ୍ଧିଜୀବୀ, ମହିଳା ପ୍ରତିଦିନ ଜନସ୍ବାସ୍ଥ୍ୟ ବିଭାଗରେ ପହଞ୍ଚତ୍ ହୋହଲ୍ଲା କରୁଛନ୍ତି, ଯାହାକୁ ନେଇ ଅପ୍ରୀତିକର ପରିସ୍ଥିତି ସୃଷ୍ଟି ହେଉଛି।
ଏ ସଂକ୍ରାନ୍ତରେ ଜନସ୍ବାସ୍ଥ୍ୟ ବିଭାଗର କନିଷ୍ଠ ଯନ୍ତ୍ରୀ ସୋନାଲି ନାୟକ କୁହନ୍ତି, ସହରବାସୀଙ୍କ ପାଇଁ ଜଳଯୋଗାଣ ସୁନିଶ୍ଚିତ କରିବା ଲାଗି ମେଗା ପାନୀୟ ଜଳ ପ୍ରକଳ୍ପ, ୨ଟି ଓଭରହେଡ୍ ଟାଙ୍କି, ୨ଟି ଓ୍ବାଟର ଟ୍ରିଟ୍ମେଣ୍ଟ ପ୍ଲାଣ୍ଟ କରିବାକୁ ଯୋଜନା ରହିଛି। କେତେକ କ୍ଷେତ୍ରରେ ଲୋକଙ୍କ ମଧ୍ୟରେ ସଚେତନତା ଅଭାବରୁ ପାଣି ଅଯଥା ନଷ୍ଟ ହେଉଛି। ଏଥିପ୍ରତି ସମସ୍ତେ ଗୁରୁତ୍ୱ ଦେବା ଜରୁରୀ। ଖରାଦିନେ ଜଳକ୍ଲିଷ୍ଟ ଓ୍ବାର୍ଡଗୁଡ଼ିକରେ ଟ୍ୟାଙ୍କର ଯୋଗେ ପାଣି ଯୋଗାଣ ବ୍ୟବସ୍ଥା କରାଯିବ।