କେସିଙ୍ଗା,୧୮ା୬(ତୁମେଶ୍ୱର ସାହୁ): କେସିଙ୍ଗାର ଜଣେ ବ୍ୟବସାୟୀ ଡକାୟତି ଘଟଣାରେ କେସିଙ୍ଗା ପୋଲିସକୁ ସଫଳତା ମିଳିଛି। ୬ଜଣ ଡକାୟତକୁ ଗିରଫ କରିବା ସହ ସେମାନଙ୍କଠାରୁ ୧ ଲକ୍ଷ ୧୨ ହଜାର ଟଙ୍କା, ଡକାୟତିରେ ବ୍ୟବହାର ହୋଇଥିବା ୨ଟି ମୋଟରସାଇକେଲ, ୪ଟି ଫୋନ, ଛୁରି, ଲୁହାରଡ଼, ସ୍କ୍ରୁ ଡ୍ରାଇଭର ଜବତ କରିଛି ପୋଲିସ।
ଗତ ମଇ ୨୮ ବିଳମ୍ବିତ ରାତିରେ କଳାହାଣ୍ଡି ଜିଲା କେସିଙ୍ଗାର ୯ ନମ୍ବର ଓ୍ବାର୍ଡ ଜଗନ୍ନାଥ ପଡ଼ାର ସୁବାସ ଚନ୍ଦ୍ର ଅଗ୍ରଓ୍ବାଲଙ୍କ ଘର ପଛପଟ କବାଟର ତାଲାଭାଙ୍ଗି ୯ ଜଣ ମୁଖାଧାରୀ ଡକାୟତ ଘର ଭିତରକୁ ପଶିଥିଲେ। ଛୁରିଦେଖାଇ ଜୀବନରେ ମାରିଦେବାକୁ ଭୟଭୀତ କରାଇ ସୁବାସ ଚନ୍ଦ୍ର ଅଗ୍ରଓ୍ବାଲ ଓ ତାଙ୍କ ପରିବାର ସଦସ୍ୟଙ୍କୁ ଦଉଡ଼ିରେ ବାନ୍ଧି ପକାଇଥିଲେ। ତା’ପରେ ଆଲମିରା, ଡ୍ର ଓ ଲକର ଭାଙ୍ଗି ଡକାୟତମାନେ ୬ ଲକ୍ଷ ଟଙ୍କା, ଗୋଟିଏ ସୁନା ହାର, ଗୋଟିଏ ସୁନା ମୁଦି, ହୀରାର ଗୋଟିଏ ବ୍ରେସ୍ଲେଟ୍, ଦୁଇଟି ମୋବାଇଲ ଓ ଅନ୍ୟାନ୍ୟ ମୂଲ୍ୟବାନ ସାମଗ୍ରୀ ଲୁଟ କରି ପଳେଇ ଯାଇଥିଲେ। ମଇ ୨୯ରେ ସୁବାସଙ୍କ ଅଭିଯୋଗ କ୍ରମେ କେସିଙ୍ଗା ଥାନାରେ ଧାରା ୪୫୭ ଓ ୩୯୫ରେ ଏକ ମାମଲା ରୁଜୁ କରି କେସିଙ୍ଗା ପୋଲିସ ଡକାୟତି ଘଟଣାର ତଦନ୍ତ ଆରମ୍ଭ କରି ୬ ଜଣ ଡକାୟତ କେସିଙ୍ଗା ଥାନା ଅନ୍ତର୍ଗତ ଗୁର୍ଜିମୁଣ୍ଡାର ଖିତିସ ରଣା ଓ ରୁକମନ ରଣା, କୁଣ୍ଡାବନ୍ଧ ଗ୍ରାମର ଦୈତାରୀ କରୁଆଁ ଓ ବବଲୁ ଦୀପ, କିକିଆର ଧୋବା ଖର୍ସେଲ ଓ ମଦନପୁର ରାମପୁର ଥାନା ଅନ୍ତର୍ଗତ ମଦନପୁରର ସୁବିଧା ରଣାଙ୍କୁ ପୋଲିସ ଗିରଫ କରିଛି। ସେମାନଙ୍କଠାରୁ ୧ ଲକ୍ଷ ୧୨ ହଜାର ଟଙ୍କା ସହ ଡକାୟତିରେ ବ୍ୟବହାର ହୋଇଥିବା ମୋଟର ସାଇକେଲ ଓ ଅନ୍ୟାନ୍ୟ ସାମଗ୍ରୀ ଜବତ କରିଛି ବୋଲି କଳାହାଣ୍ଡି ଏସ୍ପି ଅଭିଳାଷ ଜୀ ଏକ ପ୍ରେସ୍ ବିବୃତ୍ତିରେ ସୂଚନା ଦେଇଛନ୍ତି। ଏହି ଘଟଣାରେ ସଂପୃକ୍ତ ଅନ୍ୟ ଡକାୟତଙ୍କୁ ଧରିବା ପାଇଁ ତଦନ୍ତ ଜାରି ରହିଛି ବୋଲି ଏସ୍ପି ସୂଚନା ଦେଇଛନ୍ତି।