ସୁନାବେଡା,୨୦ା୧୨(ସ୍ବ.ପ୍ର.): କୋରାପୁଟ ଜିଲାର ସୁନାବେଡା ଓ ସେମିଳିଗୁଡା ଅଞ୍ଚଳରେ ଶୀତ ଲହର ବଢ଼ିବାରେ ଲାଗିଛି। ଗତ କିଛି ଦିନ ଧରି ହାଡ଼ଭଙ୍ଗା ଶୀତ ଅନୁଭୂତ ହେଉଛି। ସନ୍ଧ୍ୟା ପରଠାରୁ ତା’ପରଦିନ ସକାଳ ୧୦ଟାଯାଏ ଘରୁ ବାହାରିବା କଷ୍ଟକର ହୋଇପଡୁଛି। ଉଭୟ ସହରର କେତେକ ସ୍ଥାନରେ ସକାଳୁ ପୂର୍ବାହ୍ନ ୧୦ଟାଯାଏ କୁହୁଡ଼ି ଲାଗି ପରିବେଶକୁ ଆହୁରି କାଲୁଆ କରି ଦେଉଛି। ଜିଲାର କିଛି ସ୍ଥାନରେ ପାରଦ ୧୦ ଡ଼ିଗ୍ରୀ ତଳକୁ ରହୁଥିବା ବେଳେ କେତେକ ସ୍ଥାନରେ ୭ ଡ଼ିଗ୍ରୀ ତଳେ ରହୁଥିବା ରେକର୍ଡ଼ କରାଯାଇଛି। ନିକଟରେ ଦାମନଯୋଡ଼ିଠାରେ ପାରଦ ୫ ଡ଼ିଗ୍ରୀ ଛୁଇଁଥିବା ରେକର୍ଡ ହୋଇଛି। ଲୋକେ ଶୀତ ଦାଉରୁ ରକ୍ଷା ପାଇବା ପାଇଁ କାଠ ଜାଳି ନିଆଁ ପୁଇଁବା ଦୃଶ୍ୟ ଦେଖିବାକୁ ମିଳୁଛି।