ଭୁବନେଶ୍ୱର,୨୨। ୧୨: ସାରା ଓଡ଼ିଶାକୁ ଥରାଉଛି ହାଡ଼ଭଙ୍ଗା ଶୀତ। ବଢୁଛି ଜାଡ଼ ଖସୁଛି ପାରଦ। ଦିନରେ ଘରୁ ବାହାରିବା ହେଲାଣି ମୁସ୍କିଲ। ଗତ କିଛିଦିନ ହେଲା ଶୀତର ପ୍ରକୋପ ବଢିବାରେ ଲାଗିଛି। ପାରଦ ତଳମୁହାଁ ହୋଇ ରାଜ୍ୟର ୧୯ ଜିଲାରେ ୧୦ ଡିଗ୍ରୀ ସେଲ୍ସିୟସକୁ ହ୍ରାସ ପାଇଛି। ରାଜଧାନୀ ଭୁବନେଶ୍ୱରରେ ମଧ୍ୟ ସମାନ ଅବସ୍ଥା। ଥଣ୍ଡା ଅଧିକ ହେଉଥିବାରୁ ଶୀତ ବସ୍ତ୍ର ଦୋକାନ ବଜାରରେ ଏବେ ଭିଡ଼ ଜମିଲାଣି । ରାଜଧାନୀ ଭୁବନେଶ୍ୱର ରସୁଲଗଡ଼ସ୍ଥିତ ମା’ କୋଚିଲେଇ ହାଟ, ଶହୀଦନଗର, ୟୁନିଟ୍-୧ ଏବଂ ଅନ୍ୟାନ୍ୟ ଶୀତ ବସ୍ତ୍ରର ବଜାରରେ ବିଶେଷଭାବେ ଭିଡ଼ ଦେଖିବାକୁ ମିଳୁଛି। ଲୋକଙ୍କ ମଧ୍ୟରେ ଶୀତ ବସ୍ତ୍ରର ଚାହିଦାକୁ ନେଇ ଧରିତ୍ରୀର ସ୍ବତନ୍ତ୍ର ଉପସ୍ଥାପନା।
ବଢିଛି ଶୀତବସ୍ତ୍ରର ଚାହିଦା
ଛୋଟ ପିଲା ଓ ବଡ଼ଙ୍କ ପାଇଁ ବିଭିନ୍ନ ପ୍ରକାର ଶୀତବସ୍ତ୍ର ପସରା ମେଲାଇ ଶହୀଦନଗରରେ ବସିଛନ୍ତି ବିରଞ୍ଚି ରାଉତ। ପୂର୍ବ ବର୍ଷ ଅପେକ୍ଷା ଏ ବର୍ଷ କିପରି ବେପାର ରହିଛି ପଚାରିବାରୁ କହିଲେ, ୨ବର୍ଷ ହେଲାଣି ଶୀତ ନ ଥିଲା। ଏବର୍ଷ ଥଣ୍ଡା ଟିକେ ଅଧିକ ପଡିଥିବାରୁ ଶୀତ ବସ୍ତ୍ରର ଚାହିଦା ଅଧିକ ରହିଛି। ତେବେ ବିଶେଷ କିଛି ନୂଆ ଭେରାଇଟିର ବସ୍ତ୍ର ମାର୍କେଟକୁ ଆସିନାହିଁ। ପୂର୍ବ ବର୍ଷ ଭଳି କୁନି ପିଲାଙ୍କ ପାଇଁ ବିଭିନ୍ନ କାର୍ଟୁନ୍ର ମଙ୍କି କ୍ୟାପ, ହେଡ୍ ସ୍କାର୍ଫ, ଇୟର୍ ସ୍କାର୍ଫ, ମୋଜା, ଗ୍ଲୋବ, ମାସ୍କ ସହ ଇୟର୍ ସ୍କାର୍ଫ, ଶୀତ ଦିନିଆ ଜୋତା ଆଦି ରହିଛି। ସକାଳ ୯ଟାରୁ ରାତି ୧୦ଟା ପର୍ଯ୍ୟନ୍ତ ଦୋକାନ ଖୋଲିକି ବସୁଛି। ଦିନ ବେଳା ଅଳ୍ପ ସଂଖ୍ୟକ ଲୋକ ଆସୁଥିବାବେଳେ ସା ସମୟରେ ଗ୍ରାହକଙ୍କ ସଂଖ୍ୟା ବୃଦ୍ଧି ପାଉଛି।
ଦିନରେ ଶୀତବସ୍ତ୍ରର ଆବଶ୍ୟକ ପଡୁଛି
୨ ପିଲାଙ୍କୁ ସାଙ୍ଗରେ ଧରି ପିଲାଙ୍କ ମନ ପସନ୍ଦର ଶୀତ ବସ୍ତ୍ର କିଣିବାକୁ ଆସିଛନ୍ତି ସ୍ଥାନୀୟ ବାସିନ୍ଦା ନୂତନ ମହାପାତ୍ର। କେଉଁ ଶୀତ ବସ୍ତ୍ର କିଣିବାକୁ ଆସିଛନ୍ତି ବୋଲି ପଚାରିବାରେ ସେ କହିଲେ, ପିଲାଙ୍କ ବୟସ ବଢିବା ସାଙ୍ଗକୁ ସେମାନଙ୍କ ଉଚ୍ଚତା ମଧ୍ୟ ବଢୁଛି। ୨ ବର୍ଷ ପୂର୍ବରୁ ଯାହା ଶୀତ ବସ୍ତ୍ର କିଣିଥିଲି ସେସବୁ ଛୋଟ ହୋଇଗଲାଣି। ଏବର୍ଷ ହଠାତ୍ ଶୀତ ଏତେ ବଢି ଯାଇଛି ଯେ ପିଲାମାନେ ମଧ୍ୟ ଦିନରେ ସ୍ବେଟର ପିନ୍ଧି ବାହାରକୁ ବାହାରୁଛନ୍ତି। ସେମାନଙ୍କ ପାଇଁ ହେଡ୍ ସ୍କାର୍ଫ, ଗ୍ଲୋବ୍ସ କିଣିବାକୁ ଆସିଛି। କିଛି ଦିନ ତଳେ ନିଜ ପାଇଁ ଗୋଟେ ସ୍ବେଟର ମଧ୍ୟ ନେଇଥିଲି। ତା’ର ଉଲ୍ ବହୁତ ଭଲ ପଡିଥିଲା।
ପୂର୍ବାପେକ୍ଷା ବିକ୍ରି ବଢ଼ିଛି
ଗଦା ଗଦା କମ୍ବଳ ଓ ସାଲ ସହ ୧ ନଂ ମାର୍କେଟ୍ରେ ପସରା ମେଲାଇ ବସିଛନ୍ତି ଅନୀଲ ସାହୁ। କମ୍ବଳ ଓ ସାଲ୍ର ବିକ୍ରି କିପରି ରହିଛି ପଚାରିବାରେ କରୋନା ପାଇଁ ୨ ବର୍ଷ ହେଲା ଶୀତ ବସ୍ତ୍ର ବେପାରରେ ମାନ୍ଦାବସ୍ଥା ଥିଲା। ବେପାର ନ ହେଉଥିଲେ ମଧ୍ୟ ଦୋକାନ ଖୋଲିବାକୁ ପଡୁଥିଲା। ଏବର୍ଷ କିଛି ଦିନ ହେବ ଶୀତ ବଢିବାରୁ ଗ୍ରାହକଙ୍କ ସଂଖ୍ୟା ଟିକେ ବଢିଛି। ଆଗରୁ ଦିନକୁ ୨/୪ଟା ବିକ୍ରି ହେଉଥିଲା। ହେଲେ ଏବେ ଦିନକୁ ୧୦/୧୨ଟି କମ୍ବଳ ବିକ୍ରି ହେଉଥିବାବେଳେ ୭/୮ଟି ସାଲ୍ ମଧ୍ୟ ଭଲ ବିକ୍ରି ହେଉଛି। ପୂର୍ବ ଦୁଇ ବର୍ଷ ଅପେକ୍ଷା ଚଳିତ ଥଣ୍ଡାରେ ବେପାରରେ କିଛିଟା ଉନ୍ନତି ଘଟିଛି ବୋଲି ଅନୀଲ କହିଛନ୍ତି।
-ରିପୋର୍ଟ: ରୋଜାଲିନ୍ ସାହୁ