କିଭ୍,୨୨।୯: ୧୯ ମାସ ଧରି ରୁଷିଆ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ବନ୍ଦ ହେବାର ନାଁ ନେଉନାହିଁ। ଏହି ସମୟରେ ୟୁକ୍ରେନ ପୁଣିଥରେ ଆମେରିକାର ସାମରିକ ସହାୟତା ପାଇଛି। ନୂତନ ସୁରକ୍ଷା ସହାୟତାର ଅଧୀନରେ ଆମେରିକା ୟୁକ୍ରେନକୁ ୧୨୮ ମିଲିୟନ ଆମେରିକୀୟ ଡଲାର ମୂଲ୍ୟର ଅସ୍ତ୍ରଶସ୍ତ୍ର ଏବଂ ଉପକରଣ ପ୍ରଦାନ କରିବ। ଆମେରିକାର ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନ୍ ଗୁରୁବାର ଏହି ସୂଚନା ଦେଇଛନ୍ତି।
ଏଥି ସହିତ ଆମେରିକାର ବୈଦେଶିକ ବିଭାଗ ଦ୍ୱାରା ଜାରି ଏକ ବିବୃତ୍ତିରେ କୁହାଯାଇଛି ଯେ, ପ୍ରତିରକ୍ଷା ବିଭାଗ ପୂର୍ବରୁ ନିର୍ଦ୍ଦେଶିତ ଛାଡ ଅଧୀନରେ ୧୯୭ ମିଲିୟନ ଡଲାରର ଅସ୍ତ୍ରଶସ୍ତ୍ର ଏବଂ ଉପକରଣ ମଧ୍ୟ ଯୋଗାଇବ। ପ୍ରକାଶ ଯେ, ସୁରକ୍ଷା ସହାୟତା ସମ୍ବନ୍ଧରେ ବ୍ଲିଙ୍କେନ୍ଙ୍କ ଏହି ଘୋଷଣା ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କ ଆମେରିକା ଗସ୍ତ ପରେ ଆସିଛି। ଏହାପୂର୍ବରୁ ଜେଲେନସ୍କି ହ୍ବାଇଟ ହାଉସରେ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କୁ ଭେଟିଥିଲେ।