![](https://www.dharitri.com/wp-content/uploads/2021/03/loisingha-1.jpg)
ଲୋଇସିଂହା,୪।୩: ବଲାଙ୍ଗୀର ଜିଲା ଲୋଇସିଂହା ବସ୍ତି କୁମ୍ଭାରପଡ଼ାର ମେଧାବୀ ଛାତ୍ର ମୁନୁ ରଣା। ମୁମ୍ବାଇ ଦେଉନର ସ୍ଥିତ ଟାଟା ସାମାଜିକ ବିଜ୍ଞାନ ସଂସ୍ଥାନର ଶିକ୍ଷା ବିଭାଗରେ ଏମ୍ଏ କରୁଛନ୍ତି। ଲକ୍ଡଉନ ଯୋଗୁ ଘରକୁ ଫେରିଛନ୍ତି। ପରିବାରର ଆର୍ଥିକ ସ୍ଥିତି ଭଲ ନାହିଁ। ଏପରିସ୍ଥଳେ ଶିକ୍ଷା ସମ୍ପୂର୍ଣ୍ଣ କରିବା ତାଙ୍କ ପାଇଁ ଚ୍ୟାଲେଞ୍ଜ ସଦୃଶ ହୋଇଛି। ଗୁରୁବାର ବ୍ଲକ ପରିସରରେ ବିଜୁ ପକ୍କା ଘର ସୂଚନା ଫଳକ ପରିବହନ କାର୍ଯ୍ୟରେ ନିୟୋଜିତ ବେଳେ ସେ ଲୋକଙ୍କ ଦୃଷ୍ଟିକୁ ଆସିଥିଲେ। ଏହି ଅବସରରେ ମୁନୁ ବଖାଣିଥିଲେ ତାଙ୍କ ଦୁଃଖ ଓ ସଂଘର୍ଷ କାହାଣୀ।
ଲୋଇସିଂହା କୁମ୍ଭାରପଡ଼ାର ବନୀତା ଓ ସ୍ବର୍ଗତ ଚକ୍ରଧର ରଣାଙ୍କ ପୁଅ ମୁନୁ। ୨୦୦୯ରେ ସେ ଦଶମ ଶ୍ରେଣୀରେ ପଢୁଥିବା ବେଳେ ବାପାଙ୍କ ଦେହାନ୍ତ ହୋଇଯାଇଥିଲା। ବ୍ଲକ ପରିସରରେ ଥିବା ଛତୁଆ କାରଖାନାରେ ମୂଲ ଲାଗୁଥିବା ବିଧବା ମା’ ୨ ପୁଅଙ୍କୁ ପାଠ ପଢାଇବା ସହ ଘର ଚଳାଇବାକୁ ଅସୁବିଧାର ସମ୍ମୁଖୀନ ହୋଇଥିଲେ। ଏନେଇ ମୁନୁ ଲୋଇସିଂହା ସ୍ଥିତ ଏକ କମ୍ପ୍ୟୁଟର ସଂସ୍ଥାରେ ଝାଡୁ ମାରିବା ସହ ପାଣିଛତ୍ରରେ ପାଣି ଦେଉଥିଲେ। ଯାହା ରୋଜଗାର କରୁଥିଲେ ସେଥିରେ ପରିବାର ଚଳାଇବା ସହ ପାଠପଢା ଖର୍ଚ୍ଚ ତୁଲାଉ ଥିଲେ। ବହୁକଷ୍ଟରେ ସେ ଯୁକ୍ତ ୩ ଶେଷ କରିଥିଲେ। ପରେ ସେ ମହାରାଷ୍ଟ୍ରର ମହତ୍ମା ଗାନ୍ଧୀ ଆନ୍ତରାଷ୍ଟ୍ରୀୟ ହିନ୍ଦୀ ବିଶ୍ୱବିଦ୍ୟାଳୟରେ ବିଏଡ କରିଛନ୍ତି। ୨୦୧୯ ଶିକ୍ଷା ବର୍ଷରେ ମୁମ୍ବାଇ ଟାଟା ସାମାଜିକ ବିଜ୍ଞାନ ସଂସ୍ଥାନରେ ଏମ୍ଏ ପାଇଁ ନାମ ଲେଖାଇଛନ୍ତି। କରୋନା ଯୋଗୁ ଗତ ଏପ୍ରିଲରେ ସେ ଲୋଇସିଂହା ଫେରି ଆସିଥିଲେ। ପରବର୍ତ୍ତି ସମୟରେ ସେ ଏକ ମୋବାଇଲ ଫୋନରେ ଅନ୍ଲାଇନରେ ପାଠ ପଢୁଛନ୍ତି। ଏହା ପଢାରେ ବ୍ୟାଘତ ହେଉଛି। ଏନେଇ ସେ ଏକ ଲାପ୍ଟପ୍ ଯୋଗାଇଦେବାକୁ ସ୍ଥାନୀୟ ବିଧାୟକ ଏବଂ ଜିଲା ପ୍ରଶାସନକୁ ଅନୁରୋଧ କରିଥିଲେ । ହେଲେ ଅଦ୍ୟାବଧି କୌଣସି ବ୍ୟବସ୍ଥା ହୋଇପାରି ନାହିଁ। ଶେଷରେ ଖଲାସି କାମ କରି ଅର୍ଥ ଯୋଗାଡ଼ କରିବାକୁ ନିଷ୍ପତ୍ତି ନେଇଥିଲେ। ଗୁରୁବାର ବ୍ଲକ ପରିସରରୁ ଟ୍ରକ ଯୋଗେ ପଞ୍ଚାୟତକୁ ସୂଚନା ଫଳକ ସ୍ଥାନାନ୍ତରଣ ବେଳେ ଏନ୍ଏସି ମାନ୍ୟତା ଦାବିରେ ଧାରଣାରତ କେତେକ ବ୍ୟକ୍ତିଙ୍କ ଦୃଷ୍ଟିକୁ ସେ ଆସିଥିଲେ।