କେନ୍ଦୁଝର, ୩ା୯ (ସ୍ବ.ପ୍ର.): କେନ୍ଦୁଝର ଜିଲା ନୟାକୋଟ ଥାନା ଅଧୀନ କାଦକଳା ଗ୍ରାମ ନିକଟ ଜମ୍ଭିରିପଶିଠାରେ ସ୍ଲରି ପାଇପ୍ ଲାଇନ ବିଛାଇବା କାମ କରୁଥିବା ମେସର୍ସ କେସିଏସ୍ ପ୍ରୋଜେକ୍ଟ କ୍ୟାମ୍ପକୁ ଶୁକ୍ରବାର ଅପରାହ୍ନରେ ଦୁର୍ବୃତ୍ତମାନେ ଭଙ୍ଗାରୁଜା କରିବା ସହ ମେଶିନ ପୋଡ଼ିଦେଇଛନ୍ତି। ଦୁର୍ବୃତ୍ତମାନେ ଏକ ମାଟିଖୋଳା ମେଶିନକୁ ପୋଡ଼ିଦେଇଥିବା ବେଳେ ଜେନେରେଟର, ଅନ୍ୟ ଗାଡ଼ି ଭାଙ୍ଗି ଦେଇଛନ୍ତି। ଏହି ସମୟରେ କ୍ୟାମ୍ପରେ କେହି ନ ଥିଲେ ବୋଲି କୁହାଯାଉଛି। ତେବେ ଏନେଇ ଏସ୍ଡିପିଓ ପି.ଜେ. ଟପୋ ଓ ଅନ୍ୟ ପୋଲିସ ଅଧିକାରୀ ଫୋର୍ସ ସହ ଘଟଣାସ୍ଥଳକୁ ଯାଇ ସ୍ଥିତି ଅନୁଧ୍ୟାନ କରିଛନ୍ତି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଲାଗି ରହିଥିବାରୁ ପୋଲିସ ନଜର ରଖିଛି। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏସ୍ଡିପିଓ ଟପୋ କହିଛନ୍ତି। ଏନେଇ ମେସର୍ସ କେସିଏସ୍ ସଂସ୍ଥା ପକ୍ଷରୁ ନାୟାକୋଟ ଥାନାରେ ଲିଖିତ ଅଭିଯୋଗ କରାଯାଇଛି। ଜମ୍ଭିରିପଶି ନିକଟରେ କାମ ଚାଲିଥିବା ବେଳେ କେତେଜଣ ଲୋକ ଆସି ଧମକ ଦେଇ ଗଣ୍ଡଗୋଳ କରିଥିଲେ ବୋଲି ଏତଲାରେ ଦର୍ଶାଯାଇଛି। ପ୍ରକାଶ ଯେ, ଭଙ୍ଗାରୁଜା ଓ ମେଶିନ ପୋଡ଼ାଯିବାର କାରଣ ଜଣାପଡ଼ି ନ ଥିଲେ ହେଁ ସ୍ଲରି ପାଇପ୍ ଲାଇନ ଦ୍ୱାରା ଲୁହାପଥର ପରିବହନ ହେଲେ ଟ୍ରକ୍ ମାଲିକମାନେ କ୍ଷତିଗ୍ରସ୍ତ ହେବେ ବୋଲି ଆଶଙ୍କା କରି ଜିଲାରେ ବିରୋଧ ହୋଇଆସୁଥିଲା। ଟ୍ରକ୍ ମାଲିକ ଏବଂ ଏହା ଉପରେ ପ୍ରତ୍ୟକ୍ଷ ଓ ପରୋକ୍ଷ ଭାବେ ନିର୍ଭରଶୀଳ ଲକ୍ଷାଧିକ ପରିବାର ଆନ୍ଦୋଳନ କରିଆସୁଥିଲେ। କାମ ବନ୍ଦ କରିବା ପାଇଁ ଏଭଳି କାଣ୍ଡ ଘଟାଯାଇଥିବା ପୋଲିସ ସନ୍ଦେହ କରୁଛି।
