MGM Odisha T20 Cricket League Panthers win by 4 runs
ଭୁବନେଶ୍ୱର,୧୦।୧(ସ୍ପୋର୍ଟ୍ସ ବ୍ୟୁରୋ): ଏମ୍ଜିଏମ୍ ଓଡ଼ିଶା ଟି୨୦ କ୍ରିକେଟ ଲିଗ୍ରେ ଶନିବାର ଖେଳାଯାଇଥିବା ପ୍ରଥମ ମ୍ୟାଚରେ ଓଡ଼ିଶା ପାନ୍ଥର୍ସ ୪ ରନରେ ଓଡ଼ିଶା ଜାଗୁଆର୍ସକୁ ପରାସ୍ତ କରିଛି। ଟସ୍ ଜିତି ଜାଗୁଆର୍ସ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରି ପାନ୍ଥର୍ସ ନିର୍ଦ୍ଧାରିତ ୨୦ ଓଭରରେ ୬ ଉଇକେଟ ହରାଇ ୧୧୧ ରନ ସଂଗ୍ରହ କରିଥିଲା। ଜବାବରେ ଜାଗୁଆର୍ସ ୧୯.୫ ଓଭରରେ ୧୦୭ ରନକରି ଅଲଆଉଟ ହୋଇ ୫ ରନ ପାଇଁ ବିଜୟରୁ ବଞ୍ଚିତ ହୋଇଥିଲା। ଅପରାଜିତ ୩୦ ରନ ସଂଗ୍ରହ କରିବା ସହ ମୂଲବାନ ୨ ଉଇକେଟ ଅକ୍ତିଆର କରିଥିବା ପାନ୍ଥର୍ସ ଅଲରାଉଣ୍ଡର ଆଲୋକ ଚନ୍ଦ୍ର ସାହୁ ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇଥିଲେ। ଏଥିସହି ପାନ୍ଥର୍ସ ଏପର୍ଯ୍ୟନ୍ତ ୯ଟି ମ୍ୟାଚ ଖେଳି ୮ ବିଜୟ, ଗୋଟିଏ ପରାଜୟ ସହ ୩୨ ପଏଣ୍ଟ ପାଇ ତାଲିକାର ଶୀର୍ଷ ସ୍ଥାନରେ ରହିଛି। ଅନ୍ୟପଟେ ଜାଗୁଆର୍ସ ୧୦ଟି ମ୍ୟାଚ ଖେଳି ଗୋଟିଏ ବିଜୟ ଓ ୯ଟି ପରାଜୟ ସହ ୪ ପଏଣ୍ଟ ପାଇ ସର୍ମନିମ୍ନ ଅର୍ଥାତ୍ ଷଷ୍ଠ ସ୍ଥାନରେ ରହିଛି।
୧୧୨ ରନ ବିଜୟ ଲକ୍ଷ୍ୟର ପିଛା କରି ଜାଗୁଆର୍ସ ନିୟମିତ ବ୍ୟବଧାନରେ ଉଇକେଟ ହରାଇଥିଲା। ଦଳ ତରଫରୁ ୭ଜଣ ବ୍ୟାଟ୍ସମ୍ୟାନ ଦୁଇଅଙ୍କ ଛୁଇଁ ପାରି ନ ଥିଲେ। କ୍ଷମା ସାଗର ବଳ ସର୍ବାଧିକ ୨୮, ରଶି ରଞ୍ଜନ ସାହୁ ୧୭, ଅନ୍ବେଶ ଦାସ ୧୪ ଓ ଗିରିଜା ରାଉତ ୧୧ ରନ ସଂଗ୍ରହ କରିଥିଲେ। ବୋଲିଂରେ ପାନ୍ଥର୍ସ ତରଫରୁ ଜୟନ୍ତ ବେହେରା ୩, ଆଲୋକ ସାହୁ ଓ ଶୁଭମ୍ ନାୟକ ୨ଟି ଲେଖାଏ, ବସନ୍ତ ମହାନ୍ତି ଗୋଟିଏ ଉଇକେଟ ଅକ୍ତିଆର କରିଥିଲେ। ଦଳର ୨ଜଣ ଖେଳାଳି ରନ୍ ଆଉଟ ହୋଇଥିଲେ।
ପୂର୍ବରୁ ପ୍ରଥମେ ବ୍ୟାଟିଂ କରିଥିବା ପାନ୍ଥର୍ସ ତରଫରୁ ଆଲୋକ ସର୍ବାଧିକ ୩୦, ଅଭିଷେକ ଯାଦବ ୨୨, ଓପନର ଅଙ୍କିତ୍ ସିଂ ୨୧, ଉଇକେଟକିପର ବ୍ୟାଟ୍ସମ୍ୟାନ ରଞ୍ଜିତ ପାଇକରାୟ ୧୩ ରନ ସଂଗ୍ରହ କରିଥିଲେ। ଚନ୍ଦ୍ରମଣି ବିଶ୍ୱାଳ ୧୭ ରନ କରି ଅପରାଜିତ ରହିଥିଲେ। କୃଷ୍ଣଚନ୍ଦ୍ର ବାରିକ ଓ ନିଶିକାନ୍ତ ରାଉତ ଖାତା ଖୋଲିପାରି ନ ଥିଲେ। ବୋଲିଂରେ ଜାଗୁଆର୍ସ ତରଫରୁ ନିର୍ବିଶଙ୍କର ବାରିକ ୩, ମନୋଜ କାଶ୍ୟପ ୨, ନିହାର ଭୂୟାଁ ଗୋଟିଏ ଉଇକେଟ ଅକ୍ତିଆର କରିଥିଲେ।