ଭୁବନେଶ୍ୱର, ୨।୨(କ୍ରୀଡ଼ା ପ୍ରତିନିଧି): ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ କିଟ୍ ଷ୍ଟାଡିୟମରେ ଅନୁଷ୍ଠିତ ଏମ୍ଜିଏମ୍ ମହିଳା ଟି୨୦ ଲିଗ୍ କ୍ରିକେଟ ଟୁର୍ନାମେଣ୍ଟରେ ଓଡ଼ିଶା ରେଡ୍ ଚାମ୍ପିୟନ ହୋଇଛି। ସୋମବାର ଅନୁଷ୍ଠିତ ଫାଇନାଲରେ ରେଡ୍ ୪ ଉଇକେଟରେ ଓଡ଼ିଶା ଭାଓଲେଟ୍କୁ ପରାସ୍ତ କରିଛି। ଭାଓଲେଟ ପକ୍ଷରୁ ଧାର୍ଯ୍ୟ ୧୨୫ ରନ୍ର ବିଜୟ ଲକ୍ଷ୍ୟକୁ ରେଡ୍ ୧୯.୫ ଓଭରରେ ୪ ଉଇକେଟ ହରାଇ ହାସଲ କରି ନେଇଥିଲା। ରେଡ୍ ଅଧିନାୟିକା ମାଧୁରୀ ମେହେଟା ଓମ୍ୟାନ ଅଫ୍ ଦି ମ୍ୟାଚ ପୁରସ୍କାର ପାଇଛନ୍ତି।
ଟପ୍ ଅର୍ଡର ଚମତ୍କାର ଫର୍ମରେ ଥିବାରୁ ରେଡ୍ ଟସ୍ ଜିତି ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲା। ଭାଓଲେଟ୍ ୨ ଓଭର ମଧ୍ୟରେ ମାତ୍ର ୫ ରନରେ ୨ଟି ଉଇକେଟ ହରାଇ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ତେବେ ରଶ୍ମିତା ଚିନ୍ନାରା ଓ ଅଭିଜ୍ଞ ସୁଶ୍ରୀ ଦିବ୍ୟଦର୍ଶିନୀ ସତର୍କତାର ସହ ବ୍ୟାଟିଂ କରି ଇନିଂସ ସମ୍ଭାଳି ନେଇଥିଲେ। ତୃତୀୟ ଉଇକେଟରେ ୬୮ ରନ ଯୋଗ ହେବାପରେ ସୁଶ୍ରୀ ବ୍ୟକ୍ତିଗତ ୨୯(୩୨ ବଲ, ୩ ଚୌକା) ରନ କରି ଷ୍ଟମ୍ପିଂ ହୋଇ ଯାଇଥିଲେ। ଶେଷ ଭାଗରେ ସ୍ବିଟ ବେଉରା ୧୮ ବଲ୍ରୁ ୨୩ (୩ ଚୌକା) ରନ କରିଥିଲେ। ଓପନର ରଶ୍ମିତା ୫୮ ବଲ୍ରୁ ୫୦(୬ ଚୌକା) ରନ୍ରେ ଅପରାଜିତ ରହିବାରୁ ଦଳ ୨୦ ଓଭରରେ ୫ ଉଇକେଟ ହରାଇ ୧୨୪ ରନ୍ର ସମ୍ମାନଜନକ ସ୍କୋର କରିଥିଲା। ବିପକ୍ଷ ଦଳର ତନ୍ମୟୀ ବେହେରା, ଏସ.ବି. ଲରେନ୍ସ ଓ ରାଜଶ୍ରୀ ସ୍ବାଇଁ ଗୋଟିଏ ଲେଖାଏ ଉଇକେଟ ନେଇଥିଲେ। ଫାଇନାଲର ଚାପ ସତ୍ତ୍ୱେ ଅଧିନାୟିକା ମାଧୁରୀ ପୁଣି ଖେଳିଥିଲେ ମ୍ୟାଚ ବିଜୟୀ ଇନିଂସ। ସେ ୪୦ ବଲ୍ରୁ ୭ ଚୌକା ସହାୟତାରେ ସର୍ବାଧିକ ୫୪ ରନ କରି ଦଳକୁ ବିଜୟୀ କରାଇବାରେ ମୁଖ୍ୟ ଭୂମିକା ତୁଲାଇଥିଲେ। ତନ୍ମୟୀ ୨୧ ରନ କରିଥିବାବେଳେ ସୁନୀତା ମୁର୍ମୁ ୪ ବଲ୍ରୁ ୯ ଏବଂ ରାଜଶ୍ରୀ ୧୧ ବଲ୍ରୁ ୧୬ ରନ କରି ଦଳକୁ ରୋମାଞ୍ଚକ ବିଜୟ ଦେଇଥିଲେ। ଆଉ ମାତ୍ର ଗୋଟିଏ ବଲ୍ ବାକିଥିବାବେଳେ ରେଡ୍ ୪ ଉଇକେଟ ହରାଇ ୧୨୬ ରନ ସଂଗ୍ରହ କରି ନେଇଥିଲା। ଭାଓଲେଟ୍ର ଦିବ୍ୟଦର୍ଶିନୀ ଓ କୁନି ବଦରା ଗୋଟିଏ ଲେଖାଏ ଉଇକେଟ ନେଇଥିଲେ।
ପର୍ପଲକୁ ତୃତୀୟ ସ୍ଥାନ
ତୃତୀୟ ସ୍ଥାନ ପାଇଁ ଅନୁଷ୍ଠିତ ପ୍ଲେ-ଅଫ୍ରେ ପର୍ପଲ ୨୬ ରନରେ ଗ୍ରୀନ୍କୁ ହରାଇ ଦେଇଛି। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ପର୍ପଲ ଅଧିନାୟିକା ମଧୁସ୍ମିତା ବେହେରାଙ୍କ ୪୪ (୫୧ ବଲ, ୭ ଚୌକା) ଓ ଶୁଭ୍ରା ସ୍ବାଇଁଙ୍କ ୨୧ ରନ ସହାୟତାରେ ୨୦ ଓଭରରେ ୪ ଉଇକେଟ ହରାଇ ୧୧୩ ରନ କରିଥିଲା। ଗ୍ରୀନ୍ର ରାନୀ ପ୍ରସାଦ, ରୋଶନାରା ପରବିନ ଓ ସୁଶ୍ରୀ ସିଂ ଗୋଟିଏ ଲେଖାଏ ଉଇକେଟ ନେଇଥିଲେ। ୧୧୪ ରନ ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଗ୍ରୀନ୍ କ୍ରମାଗତ ବ୍ୟବଧାନରେ ଉଇକେଟ ହରାଇବା ଯୋଗୁ ୨୦ ଓଭରରେ ୭ ଉଇକେଟ ହରାଇ ୮୭ ରନ କରି ପାରିଥିଲା। ଅଲିପ୍ସା ବିଶ୍ୱାଳ ସର୍ବାଧିକ ୨୫ ରନ କରିଥିଲେ। ବିପକ୍ଷ ବୋଲରମାନେ ଅତିରିକ୍ତ ଭାବେ ଦ୍ୱିତୀୟ ସର୍ବାଧିକ ୧୯ ରନ ବ୍ୟୟ କରିଥିଲେ। ମଧୁସ୍ମିତା ୪ ଓଭରରେ ୧୫ ରନ ଦେଇ ୩ଟି ଉଇକେଟ ନେଇଥିବାବେଳେ ଶୁଭ୍ରା ସ୍ବାଇଁ, ଡି. ଜାନକୀ ରେଡ୍ଡୀ, ପୂଜା ଦାସ ଓ ଜି.ଏମ. ଅଳକାନନ୍ଦା ଗୋଟିଏ ଲେଖାଏ ଉଇକେଟ ପାଇଥିଲେ। ଅଲରାଉଣ୍ଡ ପ୍ରଦର୍ଶନ ପାଇଁ ମଧୁସ୍ମିତା ଓମ୍ୟାନ ଅଫ୍ ଦି ମ୍ୟାଚ ପୁରସ୍କାର ପାଇଥିଲେ।
ଓସିଏ ସଭାପତି ପଙ୍କଜ ଲୋଚନ ମହାନ୍ତି ମୁଖ୍ୟ ଅତିଥି ଏବଂ ସମ୍ପାଦକ ସଞ୍ଜୟ ବେହେରା, ଯୁଗ୍ମ ସମ୍ପାଦକ ମେହେତାବ ଖାଁ ଏବଂ ସଦସ୍ୟ ଦୁଲାଲ ଚନ୍ଦ୍ର ପ୍ରଧାନ, କିଶୋର କୁମାର ବିଶ୍ୱାଳ ଓ ଗଗନେନ୍ଦୁ ଦାଶ ସମ୍ମାନିତ ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ। ଟୁର୍ନାମେଣ୍ଟର ୯ଟି ଇନିଂସରେ ୬୫.୬୦ ଆଭରେଜରେ ୩୨୮ ରନ କରିଥିବା ମାଧୁରୀ ମେହେଟା ପ୍ଲେୟର ଅଫ୍ ଦି ସିରିଜ ବିବେଚିତ ହୋଇଥିଲେ। କଳ୍ପନା ନାୟକଙ୍କୁ ଇମର୍ଜିଂ ପ୍ଲେୟର ଅଫ୍ ଦି ଟୁର୍ନାମେଣ୍ଟ ପୁରସ୍କାର ପ୍ରଦାନ କରାଯାଇଥିଲା।
