ଭୁବନେଶ୍ୱର, ୨୫।୧(କ୍ରୀଡ଼ା ପ୍ରତିନିଧି)- ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ କିଟ୍ ଷ୍ଟାଡିୟମରେ ଚାଲିଥିବା ଏମଜିଏମ୍ ମହିଳା ଟି୨୦ ଲିଗ୍ କ୍ରିକେଟ ଟୁର୍ନାମେଣ୍ଟର ରବିବାର ଅନୁଷ୍ଠିତ ପ୍ରଥମ ମ୍ୟାଚରେ ଓଡ଼ିଶା ୟେଲୋ ୬ ଉଇକେଟରେ ଭାଓଲେଟ୍କୁ ପରାସ୍ତ କରିଛି। ପୂର୍ବରୁ ଗ୍ରୀନ୍ ନିକଟରୁ ୩ ଉଇକେଟରେ ହାରିଥିବା ୟେଲୋର ୨ ମ୍ୟାଚରୁ ଏହା ପ୍ରଥମ ବିଜୟ।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭାଓଲେଟ୍ ୨୦ ଓଭରରେ ୨ ଉଇକେଟ ହରାଇ ୧୦୭ ରନ କରିଥିଲା। ଅଧିନାୟିକା ଅଞ୍ଜଳି ସିଂ ସର୍ବାଧିକ ୫୮(୫୧ ବଲ୍, ୬ ଚୌକା, ୧ ଛକା) ଓ ରଶ୍ମିତା ଚିନ୍ନାରା ୩୦ ରନ କରିଥିଲେ। ବିପକ୍ଷ ଦଳର ସୁଜାତା ମଲିକ ଓ ପ୍ରିୟଙ୍କା ସାହୁ ଗୋଟିଏ ଲେଖାଏ ଉଇକେଟ ନେଇଥିଲେ। ୧୦୮ ରନର ବିଜୟ ଲକ୍ଷ୍ୟକୁ ୟେଲୋ ୧୯.୪ ଓଭରରେ ୪ ଉଇକେଟ ହରାଇ ହାସଲ କରି ନେଇଥିଲା। ସଙ୍ଗିତା ଖାଡ଼ିଆ ସର୍ବାଧିକ ୪୬ ଓ ପ୍ରିୟଙ୍କା ୨୩ ରନ କରି ଅପରାଜିତ ରହିଥିଲେ। ସସ୍ମିତା ମଲିକ ୨୮ ରନର ଯୋଗଦାନ ଦେଇଥିଲେ। ପରାଜିତ ଦଳର ବୋଲରଙ୍କ ମଧ୍ୟରେ ଅଞ୍ଜଳି ସିଂ, କଳ୍ପନା ନାୟକ ଓ ସ୍ମୃତି ମହନ୍ତ ଗୋଟିଏ ଲେଖାଏ ଉଇକେଟ ନେଇଥିଲେ। ମ୍ୟାଚ ବିଜୟୀ ଇନିଂସ ପାଇଁ ସଙ୍ଗୀତାଙ୍କୁ ଓମ୍ୟାନ ଅଫ ଦି ମ୍ୟାଚ ପୁରସ୍କାର ପ୍ରଦାନ କରାଯାଇଥିଲା। ଓସିଏ ସଦସ୍ୟ ଗୌତମ ଗଜପତି ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ।