କେନ୍ଦ୍ରାପଡ଼ା ଅଫିସ,୮ା୫: କେନ୍ଦ୍ରାପଡ଼ା ଜିଲା ଗରଦପୁର ବ୍ଲକ ନଡ଼ିଆବରେଇ ପଞ୍ଚାୟତ ଡାହାଳପୁର ଗ୍ରାମର ଗୋଚର ଜମିରେ ଜେସିବି ଲଗାଇ ପୋଖରୀ ଖୋଳା ଯାଉଛି। ଏହି କାର୍ଯ୍ୟ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ ବୋଲି ଗ୍ରାମବାସୀ ବିରୋଧ କରିଛନ୍ତି। ଏ ନେଇ ବ୍ଲକ, ତହସିଲଠାରୁ ଆରମ୍ଭ କରି ଜିଲା ପ୍ରଶାସନ ନିକଟରେ ଅଭିଯୋଗ ପତ୍ର ଦିଆଯାଇଛି।
ଏ ସମ୍ପର୍କରେ ମାନଭଞ୍ଜନ ମାହାଳି, ପ୍ରଭୁବନ ସ୍ବାଇଁ, ଜୁଗଳ ମାହାଳି, ଅଚ୍ୟୁତାନନ୍ଦ ସ୍ବାଇଁ ପ୍ରମୁଖ କହିଛନ୍ତି, ଗ୍ରାମର ଅର୍ଥନୀତି ଚାଷ ସହ ଗୋସମ୍ପଦ ସମ୍ପୃକ୍ତ। ଗୋପାଳନ ଦ୍ୱାରା ପରିବାରର ବହୁ ସମସ୍ୟା ଦୂର ହୁଏ। ତେବେ କେତେଜଣ ଲୋକ ଜୋର ଜବରଦସ୍ତ ଭାବେ ଗୋଚର ଜମିକୁ ଖୋଳି ପୋଖରୀ କରୁଛନ୍ତି। ଏଠାରୁ ମାଟି ବିକା ଯାଉଛି। ଏହି ମାଟିକୁ ନିକଟରେ ଥିବା ଏକ ଜଳାଶୟକୁ ପୋତା ଯାଉଥିବା ଲକ୍ଷ୍ୟ କରାଯାଉଛି। ଜେସିବି ଦ୍ୱାରା ଜମି ଖୋଳା ଯାଉଥିବା ବେଳେ ସମ୍ପୃକ୍ତ ବ୍ୟକ୍ତି ଗ୍ରାମର କେତେଜଣ ବ୍ୟକ୍ତିଙ୍କ ଜବ୍କାର୍ଡରେ ଶ୍ରମିକ ନିଯୁକ୍ତି ହୋଇ ଏମ୍ଜିଏନ୍ଆର୍ଇଜିଏସ୍ରେ କାର୍ଯ୍ୟ ହେଉଥିବା ଦର୍ଶାଉଛନ୍ତି। ପ୍ରଥମରେ ଗୋଚର ଜମିକୁ ଖୋଳା ଯାଉଥିବା ବେଳେ ଦ୍ୱିତୀୟରେ ଯୋଜନା ଅନ୍ତର୍ଗତ ଶ୍ରମିକ ବଦଳରେ ମେଶିନ କାର୍ଯ୍ୟ କରୁଛି। ଏ ନେଇ ଅଭିଯୋଗ ପତ୍ର ବିଭିନ୍ନ ପଦାଧିକାରୀଙ୍କୁ ଦିଆଯାଇଥିଲେ ମଧ୍ୟ ସୁଫଳ ମିଳିନାହିଁ। ଗ୍ରାମବାସୀ ଏବେ ଜିଲା ପ୍ରଶାସନ କାର୍ଯ୍ୟାଳୟ ସମ୍ମୁଖରେ ଆନ୍ଦୋଳନ କରିବେ ବୋଲି ପ୍ରସ୍ତୁତି ଚଳାଇଥିବା ସେମାନେ ପ୍ରକାଶ କରିଛନ୍ତି। ଏ ସମ୍ପର୍କରେ ଜିଲା ପରିଷଦ କାର୍ଯ୍ୟନିର୍ବାହୀ ଅଧିକାରୀ ରାଜେନ୍ଦ୍ର ପଣ୍ଡାଙ୍କୁ ପଚାରିବାରେ ଗୋଚର ଜମି ଉପରେ କୌଣସି ପ୍ରକଳ୍ପ ହୋଇପାରିବ ନାହିଁ। ଘଟଣା ସମ୍ପର୍କରେ ତଦନ୍ତ ହେବ ବୋଲି ସେ କହିଛନ୍ତି।