ଆଳି,୩୦ା୬(ଡି.ଏନ.ଏ.): କେନ୍ଦ୍ର ସରକାର ଓ ରାଜ୍ୟ ସରକାର ଶ୍ରମିକ ମାନଙ୍କୁ ଶହେ ଦିନର କାର୍ଯ୍ୟ ଯୋଗାଇ ଦେବା ଉଦେଶ୍ୟରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆରଇଜିଏସ୍) କାର୍ଯ୍ୟକାରୀ କରିଛନ୍ତି। କିନ୍ତୁ ଏହି ଯୋଜନାକୁ ବାଟମାରଣା କରିବାରେ ଲାଗି ପଡିଛନ୍ତି ସରକାରୀ ଅଧିକାରୀ ଓ ସରପଞ୍ଚ। ଏମ୍ଜିଏନ୍ଆରଇଜିଏସ୍ରେ ହେଉଥିବା କାର୍ଯ୍ୟ ଶ୍ରମିକମାନେ କରିବାର ନିୟମ ଥିବାବେଳେ ଆଳି ବ୍ଲକରେ କିନ୍ତୁ ମେଶିନ ଦ୍ୱାରା କରାଯାଉଛି। ଲକ୍ଷାଧିକ ଟଙ୍କା ବିଲ୍ କରିବାରେ ଲାଗି ପଡିଛନ୍ତି ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ, ସରପଞ୍ଚ ଓ ପଞ୍ଚାୟତ ଦାୟିତ୍ୱରେ ଥିବା କନିଷ୍ଠଯନ୍ତ୍ରୀ। ସମସ୍ତଙ୍କ ସହଯୋଗରେ ଏହି ଏମ୍ଜିଏନ୍ଆରଇଜିଏସ୍ କାମ ମେଶିନରେ ହେଉଥିବା ବେଳେ ବ୍ଲକ ପ୍ରଶାସନ ଓ ଜିଲା ପ୍ରଶାସନ ସବୁ ଦେଖି ଆଖି ବୁଜି ଦେଇଛି। ଲକ୍ଷାଧିକ ଟଙ୍କାର ପ୍ରକଳ୍ପକୁ ମେଶିନ ସାହାଯ୍ୟରେ ମାତ୍ର କେତେ ଘଣ୍ଟା କାମ କରି କିପରି ଭାବେ ହଡ଼ପ କରାଯାଉଛି ତାହାର ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ବାଳକାଟି ପଞ୍ଚାୟତରେ। ବାଳକାଟି ପଞ୍ଚାୟତ ଖଣ୍ଡିଆପାଟଣା ଛକରୁ କଟକ-ଚାନ୍ଦବାଲି ମୁଖ୍ୟ ରାସ୍ତାକୁ ସଂଯୋଗ ନିମନ୍ତେ ଏମ୍ଜିଏନ୍ଆରଇଜିଏସ୍ରେ ଏକ ମାଟି ରାସ୍ତା ନିର୍ମାଣ ହେଉଛି। ଯାହାର ବ୍ୟୟ ଅଟକଳ ମୂଲ୍ୟ ରହିଛି ୧୨ ଲକ୍ଷ ଟଙ୍କା। ୧୨ ଲକ୍ଷ ଟଙ୍କାରେ ହେବାକୁ ଥିବା ଏହି ମାଟି ରାସ୍ତାକୁ ଜବ୍କାର୍ଡଧାରୀଙ୍କ ଦ୍ୱାରା ନ କରି ମେଶିନ ସାହାଯ୍ୟରେ କରାଯାଉଛି। କାର୍ଯ୍ୟ ସ୍ଥାନରେ ସୂଚନା ଫଳକ ରହିଛି। ମାତ୍ର ସୂଚନା ଫଳକରେ ସବୁକିଛି ତଥ୍ୟ ଉଲ୍ଲେଖ ଥିବା ବେଳେ କାର୍ଯ୍ୟ କେବେ ଆରମ୍ଭ ଓ କେବେ ଶେଷ ହେବ ତାହାର କୌଣସି ସୂଚନା ଦିଆଯାଇନାହିଁ। ଯାହାକି ଏହି ଯୋଜନାକୁ ସମ୍ପୂର୍ଣ୍ଣ ଭାବେ ବାଟମାରଣା କରାଯାଉଥିବା ସ୍ପଷ୍ଟ ବାରି ହୋଇପଡୁଛି। କନିଷ୍ଠଯନ୍ତ୍ରୀ ଓ ପଞ୍ଚାୟତ କାର୍ଯ୍ୟନିର୍ବାହୀଙ୍କ ଅନୁପସ୍ଥିତିରେ ଚାଲିଥିବା ଏହି ରାସ୍ତା କାର୍ଯ୍ୟରେ ଦୁର୍ନୀତିର ଗନ୍ଧ ସ୍ପଷ୍ଟ ବାରି ହୋଇପଡୁଛି। ରାଜ୍ୟ ସରକାର ଜବ୍କାର୍ଡ ହିତାଧିକାରୀଙ୍କ ଦ୍ୱାରା ଏହି କାର୍ଯ୍ୟ କରିବାକୁ ନିର୍ଦ୍ଦେଶ ଦେଇଥିବା ବେଳେ କନିଷ୍ଠଯନ୍ତ୍ରୀ, କାର୍ଯ୍ୟନିର୍ବାହୀ ଓ ଗ୍ରାମ ରୋଜଗାର ସେବକ ଏହାକୁ ମେଶିନ ମାଧ୍ୟମରେ କରୁଛନ୍ତି। ଯାହାଫଳରେ ଜବ୍କାର୍ଡଧାରୀ କାମ ନ ପାଇ ଘରେ ବସୁଥିବା ବେଳେ ସରକାରୀ ଅଧିକାରୀମାନେ ଯୋଜନାକୁ ହଡ଼ପ କରିବାରେ ଲାଗିଛନ୍ତି। ଜିଲାପାଳ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି। ଏ ସମ୍ପର୍କରେ ବିଡିଓ ଦ୍ୱିବେନ୍ଦୁ ଦାସଙ୍କୁ ପଚାରିବାରେ ଏହି ରାସ୍ତା କାମକୁ ଗଁା ଲୋକ ଚାନ୍ଦା କରି କରୁଛନ୍ତି। ଯଦି ଏହି କାର୍ଯ୍ୟ ଏମ୍ଜିଏନ୍ଆରଇଜିଏସ୍ରେ ମୋ ଅଗୋଚରରେ ହେଉଥାଏ, ତାହାଲେ ଏହାର ବିଲ୍ କରାଯିବ ନାହିଁ ବୋଲି ସେ କହିଛନ୍ତି।