ସମ୍ବଲପୁର, ୧୫।୬(ଶୁଭାଶିଷ ପାଢୀ) ଯୁଯୁମୁରା ବ୍ଲକରେ କ୍ଷୁଦ୍ରଜଳସେଚନ ବିଭାଗ ପକ୍ଷରୁ ପ୍ରାୟ ୮୦ ଲକ୍ଷ ଟଙ୍କାରେ କେନାଲ ନିର୍ମାଣ ଚାଲିଥିଲା। ଚାଷୀଙ୍କ ଅଭିଯୋଗ ଆଧାରରେ ଧରିତ୍ରୀରେ ଜୁନ ୭ ତାରିଖରେ ଖବର ପ୍ରକାଶ ପାଇଥିଲା। ଏହା ପରେ ବିଭାଗୀୟ ତପ୍ତରତା ଦେଖାଦେଇଥିଲା। ଘଟଣାସ୍ଥଳ ପରିଦର୍ଶନ କରି ଅସ୍ଥାୟୀ ଭାବେ କାମ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ। ଚାଷୀମାନେ ମଧ୍ୟ ଉପସ୍ଥିତ ରହି ଆରମ୍ଭରୁ ହୋଇଥିବା ନିମ୍ନମାନର କାମ ଭାଙ୍ଗି ଆଉଥରେ କରିବାକୁ ଦାବି କରିଥିଲେ। ନଚେତ୍ ଭିଜିଲାନ୍ସ ତଦନ୍ତ କରିବାକୁ ଦାବି କରିବେ ବୋଲି ଚେତବାନୀ ଦେଇଥିଲେ। ଚାଷୀଙ୍କ ଅଭିଯୋଗକ୍ରମେ ଏତେ ଟଙ୍କାର କାମ ହେଉଥିଲେ ବି ବିଭାଗୀୟ ଅଧିକାରୀ ଘଟଣା ସ୍ଥଳକୁ ଆସୁନାହାନ୍ତି। ତେଣୁ ନିମ୍ନମାନର କାମ କରିବାକୁ ଠିକାଦାରଙ୍କୁ ସୁବିଧା ହେଉଛି। ଏହି କେନାଲ ନିର୍ମାଣ ହେଲେ ଶହ ଶହ ଚାଷୀ ଉପକୃତ ହୋଇପାରିବେ। ଯେଭଳି କାମ ହୋଇଛି ଗୋଟିଏ ବର୍ଷ ପାଣି ଚାଲିଲେ କଂକ୍ରିଟ ଉଠିଯିବ। ଗତବର୍ଷ କାମରେ ତାହା ଦେଖିବାକୁ ମିଳିଛି। ଯଦି କାମ ଚାଲିଥିବା ସମୟରେ ବିଭାଗ ଗୁରୁତ୍ୱ ଦେଇ ପଦକ୍ଷେପ ଗ୍ରହଣ ନ କରେ ତା’ହେଲେ କେନାଲ ସ୍ଥାୟିତ୍ୱ ରହିବ ନାହିଁ ବୋଲି ଚାଷୀମାନେ କହିଥିଲେ। ଶେଷରେ କାମ ବନ୍ଦ ହୋଇ ରହିଛି। ଏ ସମ୍ପର୍କରେ କ୍ଷୁଦ୍ର ଜଳସେଚନ ବିଭାଗ କନିଷ୍ଠଯନ୍ତ୍ରୀ ଲକ୍ଷ୍ମଣ ମାଝି କହିଛନ୍ତି, ଚାଷୀମାନେ ଅଭିଯୋଗ କରିବା ପରେ କାମ ବନ୍ଦ କରାଯାଇଛି। ଚାଷୀଙ୍କ ସହ ଆଲୋଚନା କରାଯାଇ ସେମାନଙ୍କ ପରାମର୍ଶ ସହିତ ଯାହା ବ୍ୟୟ ଅଟକଳ ରହିିଛି ସେ ଅନୁସାରେ କାମ ହେବ ବୋଲି କହିଥିଲେ।