ନୂଆଦିଲ୍ଲୀ,୨୦।୨: ନିକଟରେ ଶେଷ ହୋଇଛି ଆଇପିଏଲ୍ ୧୪ତମ ସଂସ୍କରଣ ଲାଗି ଖେଳାଳି ନିଲାମ ପ୍ରକ୍ରିୟା। ସମସ୍ତ ୮ ଫ୍ରାଞ୍ଚାଇଜ୍ ୨୨ ବିଦେଶୀ ଖେଳାଳିଙ୍କୁ କିଣିଛି। ହେଲେ ଅନେକ ବଡ଼ ଖେଳାଳି ଏଥିରୁ ବାଦ୍ ପଡ଼ିଛନ୍ତି। ସେଭଳି ଜଣେ ହେଲେ ଅଷ୍ଟ୍ରେଲିଆର ଦିନିକିଆ ଏବଂ ଟି୨୦ ଟିମ୍ର ଅଧିନାୟକ ଆରୋନ ଫିଞ୍ଚ। କ୍ରିକେଟରଙ୍କ ବେସ୍ ପ୍ରାଇସ୍ ୧ କୋଟି ଟଙ୍କା ଥିଲା, ହେଲେ କୌଣସି ଫ୍ରାଞ୍ଚାଇଜ୍ ତାଙ୍କୁ କିଣିବାକୁ ଆଗ୍ରହ ପ୍ରକାଶ କରି ନ ଥିଲେ। ସେ ବିଗତ ସିଜନ୍ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆର୍ସିବି) ପକ୍ଷରୁ ଖେଳିଥିଲେ। ଏହାସତ୍ତ୍ୱେ ଚଳିତ ସିଜନ୍ରେ ବିକ୍ରି ନ ହେବାକୁ ନେଇ ବର୍ଷିଛନ୍ତି ଅଷ୍ଟ୍ରେଲିଆର ପୂର୍ବ ଅଧିନାୟକ ମାଇକେଲ କ୍ଲାର୍କ।
ବିଗ୍ ସ୍ପୋଟର୍ସ ବ୍ରେକ୍ଫାଷ୍ଟ କାର୍ଯ୍ୟକ୍ରମରେ କ୍ଲାର୍କ କହିଛନ୍ତି, ଫିଞ୍ଚଙ୍କୁ ଟି୨୦ ଅଧିନାୟକ ଦାୟିତ୍ୱ ଦିଆଯିବାରେ ଅଷ୍ଟ୍ରେଲିଆ ଚୟନକର୍ତ୍ତାମାନେ ଭୁଲ କରିଛନ୍ତି ନା ଆଇପିଏଲ୍ର ଫ୍ରାଞ୍ଚାଇଜ୍ ଭୁଲ କରିଛନ୍ତି? ଅଧିନାୟକଙ୍କୁ କେହି କିଣିଲେ ନାହିଁ କଥାକୁ ବିଶ୍ୱାସ କରିହେଉନାହିଁ। ଭୁଲ କାହାର ନିଶ୍ଚିତ ହୋଇଥିବ। ଆଇପିଏଲ୍ ଟିମ୍ ପକ୍ଷରୁ ଖେଳିବା ପାଇଁ ଫିଞ୍ଚଙ୍କର କ’ଣ ଯୋଗ୍ୟତା ନାହିଁ। ସେ ନିଶ୍ଚିତ ଭାବେ ବିଶ୍ୱର ସର୍ବଶ୍ରେଷ୍ଠ ଖେଳାଳିଙ୍କ ମଧ୍ୟରୁ ଜଣେ ବୋଲି ସେ କହିଛନ୍ତି।
ଏହାଛଡ଼ା ସେ ଷ୍ଟିଭ୍ ସ୍ମିଥ୍ଙ୍କୁ ଅଧିକ ଦାମ୍ ନ ମିଳିବା ନେଇ ମଧ୍ୟ ସେ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ସ୍ମିଥ୍ଙ୍କ ବେସ୍ ପ୍ରାଇସ୍ ୨ କୋଟି ଥିବା ବେଳେ ୨.୨ କୋଟିରେ ତାଙ୍କୁ ଦିଲ୍ଲୀ କ୍ୟାପିଟାଲ୍ସ କିଣିଛି। ବିରାଟ କୋହଲି ପ୍ରଥମ ସ୍ଥାନରେ ଅଛନ୍ତି, ମାତ୍ର ସ୍ମିଥ୍ ଶ୍ରେଷ୍ଠ ତିନିଜଣଙ୍କ ମଧ୍ୟରେ ଅଛନ୍ତି। ଗତ ଥର ଆଇପିଏଲ୍ରେ ସେ ଭଲ ପ୍ରଦର୍ଶନ କରି ନ ଥିଲେ ହେଁ ତାଙ୍କୁ ଯେଉଁ ଟଙ୍କା ମିଳିଛି ତାହା ବହୁତ କମ୍ ବୋଲି କ୍ଲାର୍କ କହିଛନ୍ତି।