ରାଉରକେଲା ଅଫିସ,୨ା ୧-
ବିଶିଷ୍ଟ ହକି ତାରକା ମାଇକେଲ କିଣ୍ଡୋଙ୍କ ଶେଷକୃତ୍ୟ ଶୁକ୍ରବାର ଖ୍ରୀଷ୍ଟୀୟ ରୀତିନୀତିରେ ହମିରପୁର ଚର୍ଚ୍ଚରେ ଶେଷ ହୋଇଛି। ପୂର୍ବାହ୍ନରେ ତାଙ୍କ ମୃତଦେହ ରାଉରକେଲା ଇସ୍ପାତ ଜେନେରାଲ ହସ୍ପିଟାଲ (ଆଇଜିଏଚ୍)ରୁ ବାସଭବନ ସେକ୍ଟର-୬କୁ ଅଣାଯାଇଥିଲା। ପରେ ସେକ୍ଟର-୫ ବିଜୁ ପଟ୍ଟନାୟକ ହକି ଷ୍ଟାଡିୟମରେ ଗାର୍ଡ ଅଫ୍ ଅନର ପ୍ରଦାନ କରାଯାଇଥିଲା। ଏଥିରେ ରାଉରକେଲା ଅତିରିକ୍ତ ଜିଲାପାଳ ଆବୋଲି ସୁନୀଲ ନରୱେଣେ, ଆର୍ଏମ୍ସି କମିଶନର ଦିବ୍ୟଜ୍ୟୋତି ପରିଡା, ବିଧାୟକ ସାରଦା ପ୍ରସାଦ ନାୟକ, ଅନ୍ୟତମ ହକି ତାରକା ଦିଲୀପ ତିର୍କୀ, ଆର୍ଏମ୍ସି ଉପାୟୁକ୍ତ ସୁଧାଂଶୁ ଭୋଇ ଓ ସୀତାଦେବୀ ମାଝି, ପାନପୋଷ ଉପଜିଲାପାଳ ଦୌଲତ ଚନ୍ଦ୍ରାକର, ଅତିରିକ୍ତ ଆରକ୍ଷୀ ନିରୀକ୍ଷକ ମୋହନ କାରୁଆ, ଆରଏସ୍ପି ସିଜିଏମ ଧୀରେନ ମିଶ୍ର ଓ ବିଜୟ ରାଉତ, ଜିଲା କ୍ରୀଡା ଅଧିକାରୀ ତେଜକୁମାର ଖେସ ପ୍ରମୁଖ ଉପସ୍ଥିତ ଥିଲେ। ଜିଲା ପ୍ରଶାସନ ପକ୍ଷରୁ କିଣ୍ଡୋଙ୍କୁ ଗାର୍ଡ ଅଫ୍ ଅନର ପ୍ରଦାନ କରାଯାଇଥିଲା। ପରେ ଉପସ୍ଥିତ ଅଧିକାରୀ, କ୍ରୀଡାବିତ୍ ଓ ବିଭିନ୍ନ ସଂଘ ସଙ୍ଗଠନ କର୍ମକର୍ତ୍ତା ପୁଷ୍ପମାଲ୍ୟ ଅର୍ପଣକରି ଶେଷ ସମ୍ମାନ ଜଣାଇଥିଲେ। ପରିବାର ସଦସ୍ୟଙ୍କ ସହ ଏଥିରେ ହକି କୋଚ ଅମୂଲ୍ୟନନ୍ଦ ବିହାରୀ, ଅମୂଲ୍ୟ ବେହେରା, ପିଟର ତିର୍କୀ, ରାଜୁକାନ୍ତ ସାଇନି, ଫ୍ଲୋରେନସିଆ ଏକ୍କା, ଜେମ୍ସ କୁଜୁର ବାର୍ଥଲୋମି କେର୍କେଟା ପ୍ରମୁଖ ଉପସ୍ଥିତ ଥିଲେ। ଅନ୍ୟମାନଙ୍କ ମଧ୍ୟରେ ପାନପୋଷ କ୍ରୀଡା ସଙ୍ଗଠନ, ରାଉରକେଲା ସ୍ପୋଟର୍ସ ଆସୋସିଏଶନ, ଭେଟେରାନ ହକି ଆସୋସିଏଶନ, ପଶ୍ଚିମ ଓଡ଼ିଶା କ୍ରୀଡ଼ା ଉନ୍ନୟନ ପରିଷଦ, ସ୍ପୋଟର୍ସ ଡେଭଲପମେଣ୍ଟ ଷ୍ଟିୟରିଂ କମିଟି କର୍ମକର୍ତ୍ତା ଉପସ୍ଥିତ ଥିଲେ। ହମିରପୁର ଚର୍ଚ୍ଚରେ ଶେଷକୃତ୍ୟ ସମ୍ପନ୍ନ କରାଯାଇଥିଲା।
