କଟକ ଅଫିସ,୮ା୬: ପ୍ରାକୃତିକ ବିପର୍ଯ୍ୟୟ ଓ ସହରରେ ବର୍ଷାଜନିତ ଜଳବନ୍ଦୀର ମୁକାବିଲା ପାଇଁ ବୁଧବାର ଚୌଧୁରୀବଜାରସ୍ଥିତ ବିଜୁ ଭବନରେ କଟକ ମହାନଗର ନିଗମ (ସିଏମ୍ସି) ପକ୍ଷରୁ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ମେୟର ସୁବାସ ସିଂ ଏଥିରେ ପୌରୋହିତ୍ୟ କରିଥିବାବେଳେ ସିଏମ୍ସି କମିଶନର ନିଖିଲ ପଓ୍ବନ କଲ୍ୟାଣ ଆଗାମୀ ଦିନରେ ଦେଖାଦେବାକୁ ଥିବା ସମସ୍ୟା ଓ ତା’ର ସମାଧାନ ଉପରେ ବିସ୍ତୃତ ଭାବେ ଆଲୋଚନା କରିଥିଲେ। ବିଶେଷକରି ବର୍ଷା ଯୋଗୁ ଯେପରି କଟକ ସହରରେ ଜଳବନ୍ଦୀ ସମସ୍ୟା ନ ଉପୁଜିବ ସେଥିପ୍ରତି ମେୟର ଗୁରୁତ୍ୱ ଦେବା ସହ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ପଙ୍କୋଦ୍ଧାର କାମ ଶେଷ କରିବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ଏତଦ୍ବ୍ୟତୀତ ଜାଇକା କର୍ତ୍ତୃପକ୍ଷଙ୍କୁ ସଜାଗ ରହିବା ପାଇଁ ସତର୍କ କରାଇଥିଲେ। କୌଣସି ସ୍ଥାନରେ ଯେପରି ନର୍ଦ୍ଦମା ଜଳ ନିଷ୍କାସନରେ ବାଧା ସୃଷ୍ଟି ନ ହେବ ତାହାର ତଦାରଖ ଆରମ୍ଭ କରିବାକୁ ବିଭାଗୀୟ ଯନ୍ତ୍ରୀଙ୍କୁ ନିର୍ଦ୍ଦେଶ ଦିଆଯାଇଥିଲା। ସହରର ସମ୍ବେଦନଶୀଳ ସ୍ଥାନଗୁଡିକୁ ତୁରନ୍ତ ଚିହ୍ନଟ କରି ପମ୍ପ୍ ବ୍ୟବସ୍ଥା କରିବାକୁ ବୈଠକରେ ନିଷ୍ପତ୍ତି ନିଆଯାଇଥିଲା। ବାତ୍ୟା ମୁକାବିଲା ପାଇଁ ସହରର ୯୯ଟି ସ୍ଥାନ ଚିହ୍ନଟ କରାଯାଇ ଆଶ୍ରୟସ୍ଥଳ ଭାବେ ପ୍ରସ୍ତୁତ କରିବା ନିମନ୍ତେ ପଦକ୍ଷେପ ଗ୍ରହଣ କରାଯାଇଛି। ବିଶେଷକରି ପ୍ରାକୃତିକ ବିପର୍ଯ୍ୟୟ ମୁକାବିଲା ପାଇଁ ଏକ ମାଇକ୍ରୋ ପ୍ଲାନ୍ ପ୍ରସ୍ତୁତ କରାଯିବ ଏବଂ ତାହାର ଠିକ୍ ପରିଚାଳନା ଲାଗି ସିଏମ୍ସି ଅଧିକାରୀ ଓ ଯନ୍ତ୍ରୀ ଦାୟିତ୍ୱରେ ରହିବେ ବୋଲି ନିଷ୍ପତ୍ତି ନିଆଯାଇଥିଲା।
ସିଏମ୍ସିର ୫୯ଟି ୱାର୍ଡ ପାଇଁ ୧୭ ଜଣଙ୍କୁ ସେକ୍ଟର ଅଫିସର ଭାବେ ପରିଚାଳନା ଦାୟିତ୍ୱ ଦିଆଯାଇଛି। ତଳସ୍ତରରେ ସେମାନେ ମାଇକ୍ରୋ ଟିମ୍ ଗଠନ କରି ଦାୟିତ୍ୱ ନିର୍ବାହ କରିବେ। ଆସନ୍ତା ୧୫ରୁ ପ୍ରାକୃତିକ ବିପର୍ଯ୍ୟୟ ମୁକାବିଲା ଓ ସମାଧାନ ପାଇଁ ସ୍ଥାନୀୟ ବିକାଶ ଭବନରେ ଏକ କଣ୍ଟ୍ରୋଲ ରୁମ୍ ଖୋଲାଯିବ ବୋଲି ବୈଠକରେ ଆଲୋଚନା ହୋଇଥିଲା। ବିଶେଷକରି ସମସ୍ୟାର ସମାଧାନ ପାଇଁ ସମସ୍ତ ଅଧିକାରୀଙ୍କୁ ସତର୍କ ରହିବାକୁ କମିଶନର ନିର୍ଦ୍ଦେଶ ଦେଇଛନ୍ତି। ଏହି ବୈଠକରେ ସିଏମ୍ସିର ସମସ୍ତ ଅଧିକାରୀଙ୍କ ସମେତ ୱାଟ୍କୋ, ବିଦ୍ୟୁତ୍, ଡ୍ରେନେଜ୍, ଶିକ୍ଷା, ଜାଇକା, ସ୍ବାସ୍ଥ୍ୟ ଓ ଜଳ ଯୋଗାଣ ବିଭାଗର ଅଧିକାରୀମାନେ ଉପସ୍ଥିତ ଥିଲେ।
