ଚଣ୍ଡିଗଡ଼: ଚଣ୍ଡିଗଡ଼ ମ୍ୟୁନିସିପାଲ କର୍ପୋରେଶନ ଖୁବ୍ଶୀଘ୍ର ସହରର ସମସ୍ତ ବୁଲା କୁକୁରଙ୍କ ଶରୀରରେ ମାଇକ୍ରୋଚିପ୍ ଲଗାଇବ। ଏହି ମାଇକ୍ରୋଚିପ୍ ସାହାଯ୍ୟରେ କୁକୁରଙ୍କ ଗଣନା କରାଯିବ। ଏହାବ୍ୟତୀତ ଉକ୍ତ ଚିପ୍ ମାଧ୍ୟମରେ କୁକୁରଟିକୁ ବାକରଣ କରାଯାଇଛି କି ନାହିଁ ତାହା ମଧ୍ୟ ଜାଣିବା ସମ୍ଭବ ହେବ। ସେହିପରି ଯଦି କୌଣସି ବ୍ୟକ୍ତିଙ୍କୁ କୁକୁର କାମୁଡ଼େ ତେବେ ଏହି ମାଇକ୍ରୋଚିପ୍ ସାହାଯ୍ୟରେ ଉକ୍ତ କୁକୁରର ପରିଚୟ ମଧ୍ୟ ମିଳିପାରିବ। ଉତ୍ତର ଭାରତର ପ୍ରଥମ ପ୍ରୋଜେକ୍ଟ ଭାବେ ଚଣ୍ଡିଗଡ଼ରେ ମାଇକ୍ରୋଚିପ୍ ସାହାଯ୍ୟରେ କୁକୁର ଗଣନା କରାଯିବ।
ଜନଗଣନା ଏବଂ ଟିକାକରଣ ପରିଚାଳନାରେ ଉନ୍ନତି ଆଣିବା ପାଇଁ ଚଣ୍ଡିଗଡ ନଗର ନିଗମର ଫାଇନାନ୍ସ ଆଣ୍ଡ୍ କଣ୍ଟ୍ରାକ୍ଟ କମିଟି(ଏଫ୍ଆଣ୍ଡ୍ସିସି) ବୁଲା କୁକୁରମାନଙ୍କଠାରେ ମାଇକ୍ରୋଚିପ୍କୁ କାର୍ଯ୍ୟକାରୀ କରିବାକୁ ଅନୁମୋଦନ କରିଛି। ଏଥିପାଇଁ ୪ ଲକ୍ଷ ଟଙ୍କାରେ ୧,୦୦୦ ମାଇକ୍ରୋଚିପ୍ କ୍ରୟ କରାଯିବ। ଏହି ଚିପ୍ ବୁଲା କୁକୁରଙ୍କଠାରେ ଲଗାଇବା ପରେ ସେମାନଙ୍କର ରଙ୍ଗ, ପ୍ରଜାତି, କ୍ଷେତ୍ର, କେତେଥର ଓ କେବେ ବାକରଣ ହୋଇଥିବା ଆଦି ତଥ୍ୟ ମିଳିପାରିବ। ସାଧାରଣତଃ ସହରର ଅନେକ ଲୋକ କୁକୁର ରଖିଥାନ୍ତି। ତେବେ ଚଣ୍ଡିଗଡ଼ ନଗର ନିଗମର ଅଧିକାରୀମାନଙ୍କର ଅଭିଯୋଗ ଅନୁଯାୟୀ, ଯେତେବେଳେ ପୋଷା କୁକୁର ବାର୍ଦ୍ଧକ୍ୟ ଅବସ୍ଥାକୁ ଯାଉଛନ୍ତି, ସେତେବେଳେ ଉକ୍ତ କୁକୁରଙ୍କୁ ସେମାନଙ୍କ ମାଲିକମାନେ ରାସ୍ତାରେ ଛାଡ଼ି ଦେଉଛନ୍ତି। ଏହି କାରଣରୁ ପ୍ରତିବର୍ଷ ସହରରେ ବୁଲା କୁକୁରଙ୍କ ସଂଖ୍ୟାରେ ବୃଦ୍ଧି ଘଟୁଥିବା କହି ସେମାନେ ଅସନ୍ତୋଷ ପ୍ରକାଶ କରିଛନ୍ତି। କୁକୁରଙ୍କ ଶରୀରରେ ମାଇକ୍ରୋଚିପ୍ ଲଗାଯିବା ଦ୍ୱାରା ଏହାକୁ ସ୍କାନ୍ କରିବା ପରେ ସମ୍ପୃକ୍ତ କୁକୁରର ମାଲିକଙ୍କ ନାମ, ଠିକଣା ଆଦି ସମସ୍ତ ସୂଚନା ମିଳିପାରିବ। ଫଳରେ ବୁଲା କୁକୁରଙ୍କୁ ନେଇ ରହିଥିବା ସମସ୍ୟାର ସମାଧାନ ହୋଇପାରିବ। ସେହିପରି ଯଦି କୌଣସି କୁକୁର ହଜି ଯାଆନ୍ତି, ତେବେ ଏହି ମାଇକ୍ରୋଚିପ୍ ସେମାନଙ୍କୁ ଖୁବ୍ଶୀଘ୍ର ଖୋଜି ତାଙ୍କ ମାଲିକଙ୍କ ନିକଟକୁ ସୁରକ୍ଷିତ ଭାବେ ଫେରାଇବାରେ ମଧ୍ୟ ସାହାଯ୍ୟ କରିବ।