ଚେନ୍ନାଇ, ୨୪ା୮ (ପି.ଟି.)-ଭାରତୀୟ ମିଡ୍ଫିଲ୍ଡର ଜର୍ମନପ୍ରୀତ୍ ସିଂ ଦୁଇ ଥର ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ଚାମ୍ପିୟନ ଚେନ୍ନାଇନ୍ ଏଫ୍ସି ଦଳରେ ରହିବେ। ଏଥିପାଇଁ କ୍ଲବର ସହିତ ସେ ଚୁକ୍ତି ସ୍ବାକ୍ଷର କରିଛନ୍ତି। ଫଳରେ କ୍ଲବ ତରଫରୁ ସେ କ୍ରମାଗତ ଚତୁର୍ଥ ସିଜନ ପାଇଁ ଖେଳିବେ। ଜର୍ମନପ୍ରୀତ ୨୦୧୭-୧୮ ଆଇଏସଏଲ ସିଜନରେ ଚେନ୍ନାଇନ ଏଫ୍ସିରେ ଯୋଗଦେବା ପରଠାରୁ କ୍ଲବ ତରଫରୁ ସମସ୍ତ ପ୍ରତିଯୋଗିତାରେ ୩୬ଟି ମ୍ୟାଚ ଖେଳି ସାରିଛନ୍ତି। ଦଳ ଟାଇଟଲ ଅଭିଯାନରେ ମିଡ୍ଫିଲ୍ଡରେ ସେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ଚେନ୍ନାଇନ ଏଫ୍ସି ତରଫରୁ ଖେଳ ଜାରି ରଖିବା ଲାଗି ସୁଯୋଗ ମିଳିଥିବାରୁ ମୁଁ ଗୌରବାନ୍ବିତ ମନେ କରୁଛି ବୋଲି ସେ କହିଛନ୍ତି। ଜର୍ମନପ୍ରୀତ୍ ହେଉଛନ୍ତି ସର୍ବଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍) ଏଲିଟ୍ ଏକାଡେମୀର ସୃଷ୍ଟି। ୨୦୧୫ରେ ଗୋଆ ଦଳ ଡେମ୍ପୋ ଏସସି ତରଫରୁ ଆଇ-ଲିଗ୍ରେ ଖେଳି ସେ ତାଙ୍କ ପ୍ରଫେସନାଲ କ୍ୟାରିୟର ଆରମ୍ଭ କରିଥିଲେ। ପରେ ସେ କିଛି ଦିନ ପାଇଁ ଏହି ପ୍ରତିଯୋଗିତାରେ ମିନର୍ଭା ପଞ୍ଜାବ ଏଫ୍ସିି ତରଫରୁ ଖେଳିଥିଲେ। ୨୦୧୭-୧୮ରେ ଆଇଏସ୍ଏଲ ଟାଇଟଲ ଅଭିଯାନ ପାଇଁ ତାଙ୍କୁ ଚେନ୍ନାଇନ୍ ଏଫ୍ସି ନେଇଥିଲା। ୨୦୧୯-୨୦ ଅଭିଯାନ ବେଳେ ମିଡ୍ଫିଲ୍ଡରେ ଜର୍ମନପ୍ରୀତ ଓ ଅନିରୁଦ୍ଧ ଥାପାଙ୍କ ପାର୍ଟନରଶିପ୍ ସହାୟତାରେ ଚେନ୍ନାଇନ୍ ଏଫ୍ସି ଫାଇନାଲରେ ପ୍ରବେଶ କରିଥିଲା। ୨୦୧୬ ଅଗଷ୍ଟରେ ଭୁଟାନ ବିପକ୍ଷ ଏକ ବନ୍ଧୁତ୍ୱପୂର୍ଣ୍ଣ ମ୍ୟାଚରେ ସେ ଭାରତର ସିନିୟର ଦଳରେ ପଦାର୍ପଣ କରିଥିଲେ। ଇତିମଧ୍ୟରେ ସେ ଦେଶ ତରଫରୁ ୯ଟି ମ୍ୟାଚ ଖେଳି ସାରିଲେଣି। ଚେନ୍ନାଇନ ଏଫ୍ସି ନିକଟରେ ଘୋଷଣା କରିଥିଲା ଯେ, ଅନିରୁଦ୍ଧ ଥାପା, ଥୋଇ ସିଂ, ଧନପାଲ ଗଣେଶ ଏଡଓ୍ବିନ୍ ସିଡ୍ନୀ ବଂଶପଲ, ବିଶାଲ କେଥ୍ ଏବଂ ଲାଲିଆନ ଜୁଆଲା ଚାଙ୍ଗଟେଙ୍କ ସମେତ ୯ ଭାରତୀୟ ଖେଳାଳିଙ୍କ ଚୁକ୍ତି ମିଆଦ ବୃଦ୍ଧି କରିଛି।