ବଇଣ୍ଡା,୨୮।୧(ଡି.ଏନ.ଏ.) କିଶୋରନଗର ବ୍ଲକ ନୁନୁକାପଶି ପଞ୍ଚାୟତର ଶିକ୍ଷକପଡା ଗ୍ରାମ ରାସ୍ତାରେ ମଙ୍ଗଳବାର ରାତିରେ ମାଟି ପକାଯାଇ ମରାମତି କରାଯାଇଛି। ଏହି ରାସ୍ତାକୁ ପିଚୁ କିମ୍ବା ପକ୍କା କରିବାକୁ ଦୀର୍ଘ ୫ ବର୍ଷ ହେବ ଦାବି କରାଯାଉଥିଲେ ମଧ୍ୟ ସୁଫଳ ମିଳି ନ ଥିଲା। ପ୍ରତିବାଦରେ ଗ୍ରାମବାସୀ ପଞ୍ଚାୟତ ନିର୍ବାଚନରେ ଭୋଟ ବର୍ଜନ କରିବେ ବୋଲି ଚେତାବନୀ ଦେଇଥିଲେ। ତେଣୁ ଭୋଟ ଆଶାରେ କେହି କୁଜି ନେତା ରାତି ଅଧିଆ ରାସ୍ତା ମରାମତି କରିଥିବା ଚର୍ଚ୍ଚା ହେଉଛି।
ଗ୍ରାମବାସୀଙ୍କ କହିବା ଅନୁଯାୟୀ, ବଇଣ୍ଡା-ଆଠମଲ୍ଲିକ ପୂର୍ତ୍ତ ବିଭାଗ ରାସ୍ତାର ଓଭରବ୍ରିଜ୍ ନିକଟରୁ ଶିକ୍ଷକପଡା ଗ୍ରାମକୁ ଯାଇଥିବା ୧ କିଲୋମିଟର ମାଟି ରାସ୍ତା ଶୋଚନୀୟ ହୋଇପଡିଛି। ଏହା ଉପରେ ଶିକ୍ଷକପଡା, ଦାଦରସାହି, ବଡହୁଲା, ସାନ ଗୋବିନ୍ଦପୁର, ବଣିଆସାହି ଅଞ୍ଚଳବାସୀ ନିର୍ଭର କରନ୍ତି। ରେଳ ବିଭାଗ ଅଧୀନରେ ଏହା ଥିବା ଦର୍ଶାଇ ପଞ୍ଚାୟତ ପକ୍ଷରୁ ମରାମତି କରାଯାଉ ନ ଥିଲା। ରାସ୍ତାକୁ ପିଚୁ କିମ୍ବା କଂକ୍ରିଟ କରିବାକୁ ବାରମ୍ବାର ଦାବି ପରେ ଭୋଟ ବର୍ଜନ ପାଇଁ ଗ୍ରାମବାସୀ ଚେତାବନୀ ଦେଇଥିଲେ। ତେଣୁ ଭୋଟ ଆଶାରେ କେହି କୁଜି ନେତା ଜଙ୍ଗଲରୁ ମାଟି ଉଠାଇ ରାତିରେ ରାସ୍ତାରେ ପକାଇଥିବା ଆଲୋଚନା ହେଉଛି। ଏ ନେଇ ପଞ୍ଚାୟତ ନିର୍ବାହୀ ଅଧିକାରୀ କୁମୁନ୍ଦ ଚନ୍ଦ୍ର ମାଝି କହିଛନ୍ତି, ଆଚରଣ ବିଧି ଲାଗୁ ହୋଇଥିବାରୁ ପଞ୍ଚାୟତ ପକ୍ଷରୁ ଏହି କାର୍ଯ୍ୟ କରାଯାଇନାହିଁ।