ଭୋପାଳ: କରୋନା ମହାମାରୀ ଅନେକ ଜୀବନ ନେଇଛି। ବହୁ ପରିବାର ଉଜାଡ଼ିଦେଇଛି। ହେଲେ ଏହି ମହାମାରୀ ପରିସ୍ଥିତିରେ ଅନେକ ସ୍ଥାନରୁ ଭଲ ଖବର ମଧ୍ୟ ଆସୁଛି। କରୋନା ପରିସ୍ଥିତି ମଧ୍ୟପ୍ରଦେଶର ଛତର୍ପୁର ଜିଲା ବଡ଼ମାଲେହରା ବ୍ଲକ୍ ଅନ୍ତର୍ଗତ ଆଗ୍ରୋଥା ଗ୍ରାମବାସୀଙ୍କ ପାଇଁ ଆଶୀର୍ବାଦ ପାଲଟିଛି। ଦୀର୍ଘଦିନ ଧରି କାମଧନ୍ଦା ବନ୍ଦ ଯୋଗୁ ପ୍ରବାସୀ ଶ୍ରମିକମାନେ ଗାଁରେ ଅଛନ୍ତି। ଏହି ସମୟର ସଦୁପଯୋଗକରି ୧୦୦ରୁ ଊର୍ଦ୍ଧ୍ୱ ପ୍ରବାସୀ ଶ୍ରମିକ ଏବଂ ଗ୍ରାମବାସୀ ମିଶି ପାହାଡ଼ କାଟି ୧୦୦ ଏକର ଜମି ଲାଗି ଏକ ପୋଖରୀରେ ଜଳ ସଂରକ୍ଷଣ ସୁବିଧା କରିବାରେ ସଫଳ ହୋଇଛନ୍ତି। ଏହା ମରୁଡ଼ିପ୍ରବଣ ବୁନ୍ଦେଲଖଣ୍ଡ ଅଞ୍ଚଳର ୫ହଜାର ଗ୍ରାମବାସୀଙ୍କ ପାଇଁ ସହାୟକ ହୋଇପାରିବ। ୧୦ବର୍ଷ ତଳେ ବୁନ୍ଦେଲଖଣ୍ଡ ପ୍ରକଳ୍ପ ଜରିଆରେ ବହୁ ପରିମାଣର ଅର୍ଥ ବ୍ୟୟରେ ଉକ୍ତ ପୋଖରୀ ମରାମତି କାର୍ଯ୍ୟ କରାଯାଇଥିଲା। ଜଳ ସଂରକ୍ଷଣ ପାଇଁ ପୋଖରୀ ଦୁଇ ପାର୍ଶ୍ୱରେ ସୁରକ୍ଷା ବାଡ଼ ନିର୍ମାଣ କରାଯାଇଥିଲା। ତଥାପି ଭଲ ବର୍ଷା ସତ୍ତ୍ୱେ ପୋଖରୀଟି ପୂର୍ଣ୍ଣ ହୋଇପାରୁ ନାହିଁ। କାରଣ ଜଙ୍ଗଲରୁ ଆସୁଥିବା ଜଳ ପାହାଡ଼ ଉପର ଦେଇ ପୋଖରୀରେ ପହଞ୍ଚିପାରି ନ ଥାଏ। ଫଳରେ ଅଞ୍ଚଳବାସୀ ଜଳକଷ୍ଟ ଭୋଗିଥାନ୍ତି। ତେବେ ଲକ୍ଡାଉନ ସୁଯୋଗରେ ଗାଁ ପାଣି ପଞ୍ଚାୟତ ସମିତି ପକ୍ଷରୁ ଏହି ସମସ୍ୟାର ସମାଧାନ ପାଇଁ ନିଷ୍ପତ୍ତି ନିଆଯାଇଥିଲା। ଗାଁକୁ ଫେରିଥିବା ୧୦୦ରୁ ଊର୍ଦ୍ଧ୍ୱ ପ୍ରବାସୀ ଶ୍ରମିକ ସହଯୋଗକରି ଏପ୍ରିଲରେ କାମ ଆରମ୍ଭ କରିଥିଲେ। ପୋଖରୀ ପଛରେ ରହିଥିବା ଏକ ବଡ଼ ପଥର ଜଳ ପ୍ରବାହରେ ବାଧା ସୃଷ୍ଟି କରୁଥିଲା। ଏହି ପାହାଡ଼ର ପଥର କାଟିବା ପାଇଁ ମେଶିନ ମଧ୍ୟ ବ୍ୟବହାର କରାଯାଇଥିବା କାମରେ ନିୟୋଜିତ ଜଣେ ଗ୍ରାମବାସୀ ପ୍ରକାଶ କରିଛନ୍ତି। ୧୦ବର୍ଷ ତଳେ ପ୍ରକଳ୍ପ କାର୍ଯ୍ୟକାରୀ ସମୟରେ ମଧ୍ୟ ଠିକାଦାରଙ୍କୁ ପର୍ବତ କାଟିବା ପାଇଁ ଗ୍ରାମବାସୀ କହିଥଲେ। କିନ୍ତୁ ତାହା ବୃଥା ହୋଇଥିଲା ବୋଲି ସେ କହିଛନ୍ତି। ଗ୍ରାମବାସୀଙ୍କ ପ୍ରଚେଷ୍ଟାର ପ୍ରଶଂସା କରି ବଡ଼ମାଲେହରା ଜନପଦ ପଞ୍ଚାୟତର ସିଇଓ ଅଜୟ ସିଂ କହିଛନ୍ତି, ପ୍ରାୟ ୧୫ଶହ ପ୍ରବାସୀ ବ୍ଲକ୍କୁ ଫେରିଥିଲେ। ସେମାନଙ୍କୁ ଜଳ ସଂରକ୍ଷଣ କାର୍ଯ୍ୟରେ ନିୟୋଜିତ କରାଯାଇଥିଲା। ଜୁନ୍ରେ ଭଲ ବର୍ଷା ହେବାପରେ ଏହି ପୋଖରୀରେ କିଛିମାତ୍ରାରେ ପାଣି ପୂର୍ଣ୍ଣ ହୋଇଛି। ତେବେ ମୌସୁମୀ ବର୍ଷାରେ ପାଣି ତଳକୁ ଆସି ପୋଖରୀରେ ଭରିହେବ ବୋଲି ଗ୍ରାମବାସୀ ପ୍ରକାଶ କରିଛନ୍ତି।