ବମ୍ବେ: ଦିନ ଥିଲା ରାକ୍ଷୀ ସାଓ୍ବନ୍ତଙ୍କୁ ଜୋର ଜବରଦସ୍ତ ଚୁମ୍ବନ ଦେଇ ଚର୍ଚ୍ଚାରେ ଥିଲେ ବଲିଉଡର ଲୋକପ୍ରିୟ ଗାୟକ ମିକା ସିଂ। ହେଲେ ଏବେ ଜଣେ ଖବରଦାତା ତାଙ୍କୁ ରାକ୍ଷୀଙ୍କ ବିଷୟରେ ପ୍ରଶ୍ନଟିଏ ପଚାରିଦେଲେ ବୋଲି ସେ ରାଗରେ ନିଆଁବାଣ ହୋଇଯାଇଥିଲେ। ଏପରିକି କେବେହେଲେ କୌଣସି ଖବରଦାତାଙ୍କୁ ସାକ୍ଷାତକାର ଦେବେ ନାହିଁ ବୋଲି ଶୁଣାଇ ଦେଇଥିଲେ।
ବିବାହ କରିବେ ମିକା। ଏଥିପାଇଁ କରାଯାଉଛି ସ୍ବୟଂମ୍ବର। ଟେଲିପରଦାରେ ଖୁବ୍ଶୀଘ୍ର ‘ସ୍ବୟଂମ୍ବର- ମିକା ଦି ବୋଟି’ ଦେଖିବାକୁ ମିଳିବ। ନିକଟରେ ମିକା ଏହି ଶୋ’ର ପ୍ରମୋଶନ କରିବାକୁ ଦିଲ୍ଲୀ ଯାଇଥିଲେ। ସେଠାରେ ଆୟୋଜିତ ଏକ ଖବରଦାତା ସମ୍ମିଳନୀରେ ରାକ୍ଷୀଙ୍କୁ ନେଇ ତାଙ୍କୁ ପ୍ରଶ୍ନ କରାଯାଇଥିଲା। ଏହି ପ୍ରଶ୍ନ ଶୁଣି ମିକା ବହୁତ ରାଗି ଯାଇଥିଲେ।
ମିକାଙ୍କ ସ୍ବୟଂମ୍ବରରେ ରାକ୍ଷୀଙ୍କୁ ଜଣେ ପ୍ରତିଯୋଗୀ ଭାବେ ଦେଖିବାକୁ ମିଳିବ କି ବୋଲି ଜଣେ ବରିଷ୍ଠ ଖବରଦାତା ତାଙ୍କୁ ପ୍ରଶ୍ନ ପଚାରିଥିଲେ। ଏହାଶୁଣି ମିକା କିଛି ସମୟ ଚୁପ ରହି ସେଠାରୁ ଉଠି ଚାଲିଯାଇଥିଲେ। ପରେ ସେ ଉକ୍ତ ଖବରଦାତାଙ୍କ ସହ ଶୋ’ର ଅନ୍ୟ ସଦସ୍ୟଙ୍କୁ ଏକ କୋଠରୀକୁ ଡାକିଥିଲେ। ସେଠାରେ ସେ ସମ୍ପୃକ୍ତ ଖବରଦାତାଙ୍କୁ ଗାଳିଗୁଲଜ କରିଥିବା କୁହାଯାଉଛି।
ଏଭଳି ଘଟଣା ପରେ ମିକା ଖବରଦାତା ସମ୍ମିଳନୀ କରିବେ ନାହିଁ ବୋଲି ରୋକଠୋକ ଶୁଣାଇଦେଇଥିଲେ। ହେଲେ ଶୋ’ ନିର୍ମାତା ଅନୁରୋଧ କରିବାରୁ ସେ ପୁଣିଥରେ ସାକ୍ଷାତକାର ଦେଇଥିଲେ। କେବଳ ଏତିକି ନୁହେଁ ଟିମ୍ ପକ୍ଷରୁ ମିକାଙ୍କ ରାଗକୁ ନେଇ ଉପସ୍ଥିତ ଖବରଦାତା ମାନଙ୍କୁ କ୍ଷମା ପ୍ରାର୍ଥନା କରାଯାଇଥିଲା।
କହିରଖୁଛୁ, ୨୦୦୬ରେ ଏକ ପାର୍ଟୀରେ ମିକା ରାକ୍ଷୀଙ୍କୁ ଜବରଦସ୍ତ ଚୁମ୍ବନ ଦେଇଥିଳେ। ଏହି ଘଟଣା ସେତେବେଳେ ଚର୍ଚ୍ଚାର ବିଷୟ ପାଲଟିଥିଲା। ହେଲେ ମିକା ଏନେଇ କେବେହେଲେ ମୁହଁ ଖୋଲି ନାହାନ୍ତି।
