କାନପୁର,୬।୧୨: ଭାରତରେ କୋଭିଡ୍-୧୯ର ତୃତୀୟ ଲହର ଆସନ୍ତା ବର୍ଷ ଜାନୁୟାରୀ-ଫେବୃୟାରୀ ବେଳକୁ ଶୀର୍ଷ ଛୁଇଁପାରେ ବୋଲି ଆଇଆଇଟି କାନପୁରର ପ୍ରଫେସର ମଣୀନ୍ଦ୍ର ଅଗ୍ରଓ୍ବାଲ ଦାବି କରିଛନ୍ତି। ଭାରତରେ ମହାମାରୀ ସଂକ୍ରମଣର ଗାଣିତିକ ଆକଳନ ପାଇଁ ବ୍ୟବହାର କରାଯାଉଥିବା ସୂତ୍ର ମଡେଲ୍ର ସେ ସହ-ପ୍ରତିଷ୍ଠାତା। ତାଙ୍କ କହିବା ଅନୁଯାୟୀ ଭାରତରେ ତୃତୀୟ ଲହର ବିଶେଷ ଗୁରୁତର ହେବନାହିଁ ବୋଲି ମିଳିଥିବା ବିଭିନ୍ନ ତଥ୍ୟରୁ ଜଣାପଡ଼ିଛି। ତେଣୁ ଜନସାଧାରଣ ଭୟଭୀତ ନ ହୋଇ ସତର୍କ ରହିବାକୁ ସେ ପରାମର୍ଶ ଦେଇଛନ୍ତି। ଦ୍ୱିତୀୟ ଲହର ବେଳେ ସୀମିତ ଲକ୍ଡାଉନ୍, କର୍ଫ୍ୟୁ ଭଳି କଟକଣା ସଂକ୍ରମଣ କମାଇବାରେ ସହାୟକ ହୋଇଥିଲା। କୋଭିଡ୍ରୁ ସୃଷ୍ଟ ପ୍ରାକୃତିକ ରୋଗ ପ୍ରତିରୋଧକ ଶକ୍ତିକୁ ଓମିକ୍ରନ୍ ଅତିକ୍ରମ କରି ନ ପାରେ ବୋଲି ସେ କହିଛନ୍ତି। ବିଭିନ୍ନ ଦେଶରେ ଓମିକ୍ରନ୍ ସଂକ୍ରମଣକୁ ନେଇ ଆତଙ୍କ ସୃଷ୍ଟି ହୋଇଥିବାବେଳେ ଏପର୍ଯ୍ୟନ୍ତ କେହି ଗୁରୁତର ହୋଇ ନାହାନ୍ତିି। ଓମିକ୍ରନ୍ର ସଂକ୍ରମଣ ହାର ଅଧିକ ହେଲେ ମଧ୍ୟ ଲକ୍ଷଣ ଗୁରୁତର ନୁହେଁ ବୋଲି ଅଗ୍ରଓ୍ବାଲ କହିଛନ୍ତି।