ପୁରୀ ଅଫିସ,୨୮ା୧୧: କୋଟି ଓଡ଼ିଆଙ୍କ ମଉଡ଼ମଣି ମହାପ୍ରଭୁ ଶ୍ରୀଜଗନ୍ନାଥ। ସେ ବିଶ୍ୱନିୟନ୍ତା ପୁଣି ଭାବର ଠାକୁର। ତାଙ୍କ ସେବାପୂଜା, ବେଶ ସବୁକିଛି ସ୍ବତନ୍ତ୍ର। ଦୈନିନ୍ଦିନ ବେଶ ଅପେକ୍ଷା ବର୍ଷତମାମ୍ ବିଭିନ୍ନ ସ୍ବତନ୍ତ୍ର ବେଶରେ ବିଭୂଷିତ ହୋଇଥାନ୍ତି ଚତୁର୍ଦ୍ଧାବିଗ୍ରହ। ତାଙ୍କର ୨ଟି ବେଶକୁ ଦୁର୍ଲଭ ବା ବିରଳ ବେଶ ଭାବେ ବିବେଚନା କରାଯାଏ। ଏହି ଦୁଇ ବେଶ ହେଉଛି ରଘୁନାଥ ବେଶ ଏବଂ ନାଗାର୍ଜୁନ ବେଶ। ୨୫ ବର୍ଷ ପରେ ଶୁକ୍ରବାର ରତ୍ନସିଂହାସନରେ ନାଗାର୍ଜୁନ ବେଶ ଅନୁଷ୍ଠିତ ହୋଇଥିଲା। ହେଲେ କରୋନା କଟକଣା ସାଙ୍ଗକୁ ବଡଦାଣ୍ଡରେ ୧୪୪ ଧାରା ଜାରି ଯୋଗୁ ଶ୍ରଦ୍ଧାଳୁ ଦର୍ଶନ ପାଇପାରିଲେନି। ଏଥିପାଇଁ କାହାର ପ୍ରାଣ କାନ୍ଦି ଉଠିଥିବା ବେଳେ ଆଉ କେହି ବୋଧେ ଭାଗ୍ୟରେ ନାହିଁ କହୁଥିବା ଶୁଣିବାକୁ ମିଳିଥିଲା। ହରଚଣ୍ଡୀସାହିରୁ ବେଶ ଶୋଭାଯାତ୍ରାରେ ଆସିବାଠାରୁ ଓଲାଗି ପର୍ଯ୍ୟନ୍ତ ଭକ୍ତମାନେ ଭାବବିହ୍ବଳ ହୋଇପଡ଼ିିଥିଲେ। ହରଚଣ୍ଡୀସାହିବାସୀଙ୍କ ଜୟ ଜଗନ୍ନାଥ ଧ୍ୱନି ସାଙ୍ଗକୁ କିଏ ଦୀପ ଜାଳି ତ ଆଉ କେହି ନୃତ୍ୟ, ଭଜନ ଗାଇ ଲୁହ ଗଡ଼ାଉଥିଲେ।
ଭାବଭକ୍ତିରେ ଉଛୁଳିଲା ବେଶ ଶୋଭାଯାତ୍ରା
ନାଗାର୍ଜୁନ ବେଶର ସ୍ବତ୍ତ୍ବାଧିକାରୀ ହେଉଛନ୍ତି ହରଚଣ୍ଡି ସାହିର ଚକ୍ରକୋଟ ବଳରାମ ଖୁଣ୍ଟିଆ। ଶ୍ରୀମନ୍ଦିର ପ୍ରଶାସନର ଅନୁମତି ପାଇବା ପରେ ଗତ ବିଜୟା ଦଶମୀଠାରୁ ତାଙ୍କ ବାସଭବନରେ ଶୁଦ୍ଧପୂତ ଭାବେ ନିଷ୍ଠାର ସହ ବେଶ ନିର୍ମାଣ ଆରମ୍ଭ କରାଇଥିଲେ। ଶିଳ୍ପୀ ବସନ୍ତ ରଣାଙ୍କ ତତ୍ତ୍ବାବଧାନରେ ପ୍ରାୟ ୧୦ ଜଣ କାରିଗର ଏଥିରେ ସାମିଲ ଥିଲେ। ନିର୍ଦ୍ଧାରିତ ସମୟରେ ବେଶ ନିର୍ମାଣ ସରିଥିଲା। ପୂଜାର୍ଚ୍ଚନା ପରେ ଗୁରୁବାର ରାତି ୩ଟା ୨୦ରେ ବଳରାମଙ୍କ ବାସଭବନରୁ ବାହାରିଥିଲା ବେଶ ଶୋଭାଯାତ୍ରା। ଆଗରେ ଚୁନପାଣି ପଡୁଥିବାବେଳେ ଘଣ୍ଟ, ଘଣ୍ଟି, ଛତ୍ରୀ, ତ୍ରାସ, କାହାଳି ଶୋଭାଯାତ୍ରାରେ କମ୍ପିଥିଲା ହରଚଣ୍ଡୀ ସାହି। ପୋଲିସର କଡ଼ା ସୁରକ୍ଷା ମଧ୍ୟରେ ଆଗେ ଆଗେ ବାଟ କଢ଼ାଇ ଆଣିଥିଲେ ଓଡ଼ିଶୀ ନୃତ୍ୟଶିଳ୍ପୀ। ଏକ ଭାବଭକ୍ତିମୟ ପରିବେଶରେ ଉଚ୍ଛୁଳିଥିଲା ପରିବେଶ। ଗାଣ୍ଡୁଆଚଉରା ଛକ, ଦକ୍ଷିଣଦ୍ୱାର ଦେଇ ଭୋର ୪ଟା ୧୦ରେ ଶ୍ରୀମନ୍ଦିରକୁ ଏହି ବେଶ ବିଜେ କରିଥିଲା।