ବମ୍ବେ: କଥାରେ ଅଛି ପ୍ରେମ ମାନେନା ବୟସ। ସେଭଳି କିଛି ଘଟିଥିଲା ଅଙ୍କିତା କୋନ୍ଓ୍ବରଙ୍କ କ୍ଷେତ୍ରରେ। ନିଜଠାରୁ ୨୬ବର୍ଷ ବଡ଼ ଜାଣି ବି ସେ ବଲିଉଡ୍ ଅଭିନେତା ତଥା ମଡେଲ ମିଲିନ୍ଦ ସୋମନଙ୍କ ପ୍ରେମରେ ପଡ଼ିଯାଇଥିଲେ। ବୟସାଗତ ତାରତମ୍ୟ ଅଧିକ ଥିବାରୁ ପ୍ରେମର ରାସ୍ତା ସେତେଟା ସହଜ ନ ଥିଲା। ଦୀର୍ଘ ୫ ବର୍ଷ ଧରି ଦୁହେଁ ଦୁହିଁଙ୍କୁ ଡେଟ୍ କରିଥିଲେ। ୨୦୧୮ ଏପ୍ରିଲ ୨୨ରେ ସେମାନେ ବିବାହ ବନ୍ଧନରେ ଆବଦ୍ଧ ହୋଇଥିଲେ। ଆଜି ଉଭୟଙ୍କ ବିବାହକୁ ଆଉ ଏକ ବର୍ଷ ପୁରିଛି। ଏହି ଅବସରରେ ସେମାନଙ୍କ ନିକଟକୁ ଶୁଭେଚ୍ଛାର ସୁଅ ଛୁଟୁଛି।
ମିଲିନ୍ଦଙ୍କୁ ୫୫ବର୍ଷ ହୋଇଥିବା ବେଳେ ଅଙ୍କିତାଙ୍କୁ ୨୮। ଅଭିନେତାଙ୍କ ପୂର୍ବରୁ ଅଙ୍କିତା ଅନ୍ୟଜଣେ ଯୁବକଙ୍କୁ ପ୍ରେମ କରୁଥିଲେ। ହେଲେ ତାଙ୍କର ମୃତ୍ୟୁ ଘଟିଯାଇଥିଲା। ଏଥିରେ ଭାଙ୍ଗିପଡ଼ି ଅଙ୍କିତା ଦେଶ ଛାଡ଼ି ଚାଲିଯିବାକୁ ଭାବିଥିଲେ। ଏୟାର ଏସିଆରେ କ୍ୟାବିନ୍ କ୍ରୁ ମେମ୍ବର ଭାବେ କାମ କରିବା ଆରମ୍ଭ କରିଦେଇଥିଲେ। ଏହି ସମୟ ମଧ୍ୟରେ ତାଙ୍କର ପୋଷ୍ଟିଂ ଚେନ୍ନାଇରେ ହୋଇଥିଲା।
ଦିନେ ମିଲିନ୍ଦଙ୍କୁ ଅଙ୍କିତା ଲବିରେ ଦେଖିଥିଲେ। ୯୦ ଦଶକର ଲୋକପ୍ରିୟ ଅଭିନେତା ଥିବା ଯୋଗୁ ଅଙ୍କିତା ତାଙ୍କର ବଡ଼ ପ୍ରଶଂସକ ଥିଲେ। ସେ ‘ହାଲୋ’ କହିଥିଲେ ହେଁ କିଛି ଉତ୍ତର ଦେଇ ନ ଥିଲେ ମିଲିନ୍ଦ। କିଛି ଦିନ ପରେ ଚେନ୍ନାଇର ଏକ ନାଇଟ୍ କ୍ଲବରେ ପୁଣି ଉଭୟଙ୍କ ଭେଟ ହୋଇଥିଲା। ସେମାନେ ପରସ୍ପରକୁ ଦେଖୁଥିଲେ। ସାଙ୍ଗରେ ଥିବା ବନ୍ଧୁ ତାଙ୍କ ସହ କଥା ହେବାକୁ ପରାମର୍ଶ ଦେଇଥିଲେ। କିଛି ଦିନ ପରେ ଉଭୟ ଫୋନ୍ ନମ୍ବର ଦେଇ କଥା ହେବା ଆରମ୍ଭ କରିଥିଲେ। ପରେ ପାଞ୍ଚ ବର୍ଷ ଧରି ଡେଟ୍ କରିବା ପରେ ବିବାହ କରିଥିବା ଅଙ୍କିତା ଏକ ସାକ୍ଷାତକାରରେ କହିଥିଲେ। ଏବେ ଉଭୟ ସୁଖୀ ଦାମ୍ପତ୍ୟ ଜୀବନ ବିତାଉଛନ୍ତି।
