ଖାର୍ତୁମ/ନୂଆଦିଲ୍ଲୀ,୧୯।୪: ଉତ୍ତର-ପୂର୍ବ ଆଫ୍ରିକୀୟ ରାଷ୍ଟ୍ର ସୁଦାନରେ ସେନା ଜେନେରାଲ ଓ ବିଦ୍ରୋହୀ ଅର୍ଦ୍ଧସାମରିକ ବଳ ମଧ୍ୟରେ ୪ ଦିନ ହେଲା ଘମାଘୋଟ ଲଢ଼େଇ ଚାଲିଛି। ଗୁଳି ବିନିୟମ ଜାରି ରହିଥିବା ଦେଖି ରାଜଧାନୀ ଖାର୍ତୁମ ସମେତ ଦେଶର ବିଭିନ୍ନ ଭାଗରେ ଲକ୍ଷ ଲକ୍ଷ ଲୋକ ଘରୁ ବାହାରୁ ନାହାନ୍ତି। ସୋମବାର ଆମେରିକୀୟ ଦୂତାବାସର ସୁରକ୍ଷା ଗାଡ଼ି ଓ ୟୁରୋପୀୟ ସଂଘ (ଇୟୁ) ପ୍ରତିନିଧିଙ୍କ ଘରକୁ ଟାର୍ଗେଟ କରାଯାଇଥିଲା। ସୁଦାନକୁ ନିଜ ନିୟନ୍ତ୍ରଣକୁ ନେବା ପାଇଁ ଚାଲିଥିବା ଏହି ସଂଘର୍ଷରେ କେତେଜଣ ଭାରତୀୟଙ୍କ ସମେତ ପ୍ରାୟ ୨୦୦ ଜଣଙ୍କ ମୃତ୍ୟୁ ଘଟିଲାଣି। ଆମେରିକା ପରରାଷ୍ଟ୍ର ସଚିବ ଆଣ୍ଟୋନି ବ୍ଲିଙ୍କେନ୍ଙ୍କ ହସ୍ତକ୍ଷେପ ପରେ ମଙ୍ଗଳବାର ୨୪ ଘଣ୍ଟିଆ ଅସ୍ତ୍ରବିରତି କରିବାକୁ ଉଭୟ ପକ୍ଷ ମଧ୍ୟରେ ସହମତି ପ୍ରକାଶ ପାଇଛି। ସୁଦାନ ଶସ୍ତ୍ର ବଳ (ଏସ୍ଏଏଫ୍) ବିଦ୍ରୋହୀ ରାପିଡ୍ ସପୋର୍ଟ ଫୋର୍ସେସ୍ (ଆର୍ଏସ୍ଏଫ୍) ଏହି ଦିନିକିଆ ମାନବୀୟ ସନ୍ଧିକୁ ସ୍ବାଗତ କରିଛନ୍ତି। ଏହାସତ୍ତ୍ୱେ ସେନା ମୁଖ୍ୟାଳୟ ଓ ଏୟାରପୋର୍ଟ ସମେତ କେତେକ ସ୍ଥାନରେ ହିଂସା ଦେଖିବାକୁ ମିଳିଛି। ଖାର୍ତୁମ୍ରୁ ୨୧୫ କି.ମି. ଉତ୍ତର ପଶ୍ଚିମରେ ଥିବା ମେରେଓ୍ବେର ଏକ ରଣନୈତିକ ଏୟାରବେସ୍ରେ ମଧ୍ୟ ସଂଘର୍ଷ ଚାଲିଛି।
ତଥ୍ୟାନୁସାରେ ଶନିବାର ସଂଘର୍ଷ ଆରମ୍ଭ ହେବା ପରଠୁ ଅଦ୍ୟାବଧି ୨୦୦ରୁ ଊର୍ଦ୍ଧ୍ୱ ନିହତ ହୋଇଥିବାବେଳେ ୧,୮୦୦ରୁ ଅଧିକ ଆହତ ହେଲେଣି। ଅନ୍ୟପକ୍ଷେ ମୃତକଙ୍କ ମଧ୍ୟରୁ ୧୪୪ ନାଗରିକ ଥିବାବେଳେ ୧,୪୦୦ ଆହତ ହୋଇଥିବା ସୁଦାନ ଡକ୍ଟର୍ସ ସିଣ୍ଡିକେଟ୍ ପକ୍ଷରୁ କୁହାଯାଇଛି। ତେବେ ପ୍ରକୃତ ମୃତ୍ୟୁସଂଖ୍ୟା ଆହୁରି ଅଧିକ ହେବ ବୋଲି କୁହାଯାଉଛି। ଜନବସତିରେ ଉଭୟ ପକ୍ଷର ଟ୍ୟାଙ୍କ ଓ ଯୁଦ୍ଧାସ୍ତ୍ରର ବ୍ୟବହାର ଦେଶରେ ଅସ୍ବାଭାବିକ ସ୍ଥିତି ଉପୁଜାଇବା ସହ ଅନ୍ତର୍ଜାତୀୟ ସମୁଦାୟର ଦୃଷ୍ଟି ଆକର୍ଷଣ କରିଛି। ଆମେରିକୀୟ କୂଟନୀତିଜ୍ଞ ବ୍ଲିଙ୍କେନ୍ ଦୁଇ ପ୍ରତିଦ୍ୱନ୍ଦ୍ୱୀ ସଶସ୍ତ୍ର ବଳ ମୁଖ୍ୟ ଜେନେରାଲ ବୁର୍ହାନ୍ ଏବଂ ଆର୍ଏସ୍ଏଫ୍ ନେତା ଜେନେରାଲ ମହମ୍ମଦ ହମ୍ଦାନ୍ ଦାଗାଲୋଙ୍କ ସହ ଆଲୋଚନା କରି ଶାନ୍ତି ବୁଝାମଣାର ପ୍ରସ୍ତାବ ଦେଇଛନ୍ତି। କୌଣସି ଆମେରିକୀୟ ଡିପ୍ଲୋମାଟ୍ଙ୍କ ଉପରେ ଆକ୍ରମଣ କିମ୍ବା ସେମାନଙ୍କ ପ୍ରତି ବିପଦ ସୃଷ୍ଟି ଆଦୌ ଗ୍ରହଣୀୟ ନୁହେଁ ବୋଲି ୭ ଧନୀ ରାଷ୍ଟ୍ରଙ୍କୁ ନେଇ ଗଠିତ ଜି-୭ର ଜାପାନ ସମ୍ମିଳନୀରେ ବ୍ଲିଙ୍କେନ୍ ଚେତାବନୀ ଦେଇଛନ୍ତି। ସେଠାରେ ଫସିରହିଥିବା ବିଦେଶୀ ନାଗରିକଙ୍କ ସୁରକ୍ଷିତ ପ୍ରତ୍ୟାବର୍ତ୍ତନ ପାଇଁ ୨୪ ଘଣ୍ଟିଆ ଅସ୍ତ୍ରବିରତି ପ୍ରସ୍ତାବ ମଧ୍ୟ ଦେଇଛନ୍ତି, ଯାହାକୁ ଉଭୟ ପକ୍ଷ ଗ୍ରହଣ କରିନେଇଛନ୍ତି।