ସମ୍ବଲପୁର,୧୩ା୧୨(ବ୍ୟୁରୋ): ଧାନ କଟନୀଛଟନୀକୁ ବିରୋଧ କରିବାରୁ ଟାମ୍ପରକେଲା (ଅଇଁଲାମାଲ) ଗ୍ରାମର ଚାଷୀ ବିଭୂତି ପ୍ରଧାନଙ୍କୁ ଜଣେ ମିଲର୍ସ ଶନିବାର ମାଡ଼ ମାରିଛନ୍ତି। ଏନେଇ ବିଭୂତି ସମ୍ବଲପୁର ସହର ବୈଜାମୁଣ୍ଡାସ୍ଥିତ ସମଲେଶ୍ୱରୀ ଉଦ୍ୟୋଗ ମିଲର୍ସଙ୍କ ବିରୋଧରେ ବୁର୍ଲା ଥାନା ଗୋଶାଳା ଫାଣ୍ଡିରେ ଅଭିଯୋଗ କରିଛନ୍ତି। ଘଟଣାର ପ୍ରତିବାଦରେ ଚାଷୀ ସଂଗଠନ ପକ୍ଷରୁ ମିଲ୍ ମୁଖ୍ୟ ଗେଟ୍ ସମ୍ମୁଖରେ ଧାରଣା ଦିଆଯାଇଥିଲା। ମିଲ୍ ମାଲିକ ଓ ମ୍ୟାନେଜରଙ୍କୁ ଗିରଫ କରିବାକୁ ଚାଷୀମାନେ ଦାବି କରିଥିଲେ। ପୋଲିସ ପହଞ୍ଚି ବୁଝାଶୁଝା କରିବା ପରେ ସନ୍ଧ୍ୟାରେ ଧାରଣା ପ୍ରତ୍ୟାହୃତ ହୋଇଥିଲା। ଅଭିଯୋଗ କ୍ରମେ ବିଭୂତି ଶୁକ୍ରବାର ଧାନ ନେଇ ମିଲ୍କୁ ଆସିଥିବାବେଳେ ଶନିବାର ଏହାକୁ ଖାଲି କରାଯାଉଥିଲା। ଟେଷ୍ଟିଂ ସମୟରେ ଅଧିକ କଟନୀଛଟନୀ କରାଯିବ ବୋଲି ମିଲ୍ ପକ୍ଷରୁ କୁହାଯାଇଥିଲା। ବିଭୂତି ଏଥିରେ ରାଜିହୋଇ ନ ଥିଲେ। ଫଳରେ ଉତ୍ତ୍ୟକ୍ତ ହୋଇ ମ୍ୟାନେଜର ବେକକୁ ଧରି ମାରପିଟ କରିଥିବା ବିଭୂତି ଅଭିଯୋଗ କରିଛନ୍ତି। ପାଖରେ ଥିବା ଚାଷୀମାନେ ପ୍ରତିବାଦ କରିବାରୁ ତାଙ୍କୁ ମଧ୍ୟ ଗାଳିଗୁଲଜ କରିଥିଲେ। ଏହି ସମୟରେ ମାଲିକ ପହଞ୍ଚତ୍ ସମାଧାନ କରିବା ପରିବର୍ତ୍ତେ ଗାଳିଗୁଲଜ କରି ମାଡ଼ ମାରିଥିବା ସେ ତାଙ୍କ ଅଭିଯୋଗରେ ଦର୍ଶାଇଛନ୍ତି। ଏନେଇ ପୋଲିସ ୬୭୨/୨୦ରେ ମାମଲା ରୁଜୁ କରି ତଦନ୍ତ ଜାରି ରଖିଥିବା ବୁର୍ଲା ଥାନା ଅଧିକାରୀ ବି.ବି. ଭୋଇ ସୂଚନା ଦେଇଛନ୍ତି। ଏ ସମ୍ପର୍କରେ ପଶ୍ଚିମ ଓଡିଶା କୃଷକ ସଂଗଠନ ସମନ୍ବୟ ସମିତି ଆବାହକ ଅଶୋକ ପ୍ରଧାନ କହିଛନ୍ତି, ମିଲର୍ସମାନେ ଚାଷୀଙ୍କୁ ଶୋଷଣ କରିଆସୁଛନ୍ତି। କଟନୀଛଟନୀକୁ ବିରୋଧ କଲେ ଧମକ ଚମକ ମଧ୍ୟ ଦେଉଛନ୍ତି। ହେଲେ ମାଡ଼ ମାରିବା କେବେ ବି ଗ୍ରହଣୀୟ ନୁହେଁ। ସବୁ ଘଟଣାରେ ମିଲ୍ ମାଲିକଙ୍କ ସମ୍ପୃକ୍ତି ରହୁଛି। ତେଣୁ କାର୍ଯ୍ୟାନୁଷ୍ଠାନ ପାଇଁ ଚାଷୀ ସଂଗଠନ ସବୁପ୍ରକାର ଉଦ୍ୟମ କରିବ। ପ୍ରଶାସନ ଏଥିରେ ହସ୍ତକ୍ଷେପ କରି ପଦକ୍ଷେପ ଗ୍ରହଣ ନ କଲେ ଆଇନଶୃଙ୍ଖଳା ପରିସ୍ଥିିତି ସୃଷ୍ଟି ହେବା ଆଶଙ୍କା ରହିଛି।