ଖୋର୍ଦ୍ଧା ଅଫିସ,୧୮।୧: ଖୋର୍ଦ୍ଧା ଜିଲାରେ ଧାନକିଣାରେ ବ୍ୟାପକ ଅନିୟମିତତା ହେଉଥିବା ଦେଖିବାକୁ ମିଳିଛି। ଧାର୍ଯ୍ୟ ଦିନ ପରିବର୍ତ୍ତେ ଛୁଟିଦିନରେ ଧାନ ଉଠାଯାଉଛି। ମଣ୍ଡିକୁ ଧାନ ଆସିବା ପରିବର୍ତ୍ତେ ମିଲର୍ସମାନେ ସିଧାସଳଖ ଚାଷୀଙ୍କ ଠାରୁ ଧାନ କିଣୁଛନ୍ତି। ସମବାୟ ସମିତି ଏବଂ ମିଲର୍ସଙ୍କ ମଧ୍ୟରେ ମଧୁଚନ୍ଦ୍ରିକା ଯୋଗୁ ଚାଷୀ କ୍ଷତି ସହୁଛନ୍ତି। ଜିଲା ଯୋଗାଣ ବିଭାଗ ନିକଟରେ ଖବର ରହିଥିବା ସତ୍ତ୍ୱେ ବିଭାଗ ଚୁପ୍ ବସିଛି।
ସୂଚନା ମୁତାବକ, ପ୍ରତି ସମବାୟ ସମିତିି ସପ୍ତାହକୁ ଦୁଇଦିନ ଧାନ କିଣିବେ। ଏନେଇ ଜିଲା ପ୍ରଶାସନ ପକ୍ଷରୁ କେଉଁ ବ୍ଲକରେ ସମିତି କେଉଁ ବାରରେ କିଣିବେ ସ୍ଥିର କରାଯାଇଛି। ଜିଲାର ବୋଲଗଡ଼ ଏବଂ ବେଗୁନିଆ ବ୍ଲକରେ ବ୍ୟାପକ ଅନିୟମିତତା ଚାଲିଥିବା ନେଇ ଜିଲା ପ୍ରଶାସନ ନିକଟରେ ଅଭିଯୋଗ ସତ୍ତ୍ୱେ କୌଣସି ପଦକ୍ଷେପ ନିଆଯାଉ ନାହିଁ। ଏଥିସହ ଛୁଟିଦିନ (ରବିବାର)ରେ କିପରି ଏହି ଅଞ୍ଚଳରେ ଧାନ କିଣାଯାଇଛି, ସେ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଚାଷୀଙ୍କ ଧାନ ମଣ୍ଡିକୁ ଆସିବା ପରିବର୍ତ୍ତେ ମିଲର୍ସମାନେ ସିଧାସଳଖ ଚାଷୀଙ୍କ ଠାରୁ ଧାନ କିଣୁଛନ୍ତି। ରବିବାର ବୋଲଗଡ ବ୍ଲକର ଦୁଇ ମଣ୍ଡିରେ ୫୦ରୁ ଊର୍ଦ୍ଧ୍ୱ ଚାଷୀ ଧାନ ଦେଇଛନ୍ତି। ମିଲର୍ସମାନେ କୁଇଣ୍ଟାଲ ପିଛା ୩କେଜି ଧାନ କାଟୁଛନ୍ତି। ପ୍ରତିବାଦ କଲେ, ଧାନ କିଣାଯିବ ନାହିଁ ବୋଲି ଧମକ ଦେଉଛନ୍ତି। ଫଳରେ ଚାଷୀ ଉପାୟ ନ ପାଇ ଧାନ ଦେବାକୁ ବାଧ୍ୟ ହେଉଛନ୍ତି ବୋଲି କେତେଜଣ ଚାଷୀ କହିଛନ୍ତି। ଚାଷୀଙ୍କଠାରୁ ମିଲର୍ସମାନେ ସିଧାସଳଖ ଧାନ କିଣି ପାରିବେ ନାହିଁ ବୋଲି ରାଜ୍ୟ ଯୋଗାଣ ବିଭାଗର ତାଗିଦ୍ ସତ୍ତ୍ୱେ ଖୋର୍ଦ୍ଧା ଜିଲାରେ ଏହାର କୌଣସି ପ୍ରଭାବ ପଡୁନାହିଁ। ସମିତି ସମ୍ପାଦକ, ମିଲର୍ସ ମାଲିକ ଏବଂ ଯୋଗାଣ ବିଭାଗ ମଧ୍ୟରେ ମଧୁଚନ୍ଦ୍ରିକା ଯୋଗୁ ଚାଷୀ ଶୋଷଣର ଶିକାର ହେଉଛନ୍ତି। ଫଳରେ ଜିଲାରେ ଧାନର ଅଭାବୀ ବିକ୍ରି ଦେଖାଦେଇଛି। କେତେକ ସମିତିରେ ଚାଷୀଙ୍କ ନାମ ନକଲି ପଞ୍ଜୀକରଣ କରାଯାଇ ସେମାନଙ୍କ ନାମରେ ଧାନ କିଣାଯାଇ ଫଲ୍ସ ବିଲ୍ କରାଯାଉଛି। ଏହା ତଦନ୍ତ ସାପେକ୍ଷ ବୋଲି ସାଧାରଣରେ ଦାବି ହୋଇଛି। ଏହି ସମସ୍ତ ଘଟଣାର ତଦନ୍ତ କରାଯିବ ବୋଲି ଅତିରିକ୍ତ ଜିଲାପାଳ ମନୋଜ ପାଢୀ କହିଛନ୍ତି।