କୁତ୍ରା,୧୭।୨(ଡି.ଏନ୍.ଏ.): ଧାନମଣ୍ଡିରେ ଏବର୍ଷ କଟ୍ନୀଛଟ୍ନୀ ସମ୍ପୂର୍ଣ୍ଣ ମାତ୍ରାରେ ବନ୍ଦ କରିବା ପାଇଁ ଖାଦ୍ୟ ଯୋଗାଣ ଓ ସମବାୟ ମନ୍ତ୍ରୀ ସୂର୍ଯ୍ୟ ନାରାୟଣ ପାତ୍ର ଦୃଢୋକ୍ତି ପ୍ରକାଶ କରିଥିଲେ। କଟ୍ନୀ ଛଟ୍ନୀ ହେଲେ ମିଲର୍ସଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି। କିନ୍ତୁ ଏହାର ଖୋଲାଖୋଲି ଭାବରେ ଉଲ୍ଲଂଘନ କରାଯାଉଛି। ଏଭଳି ଘଟଣା ଦେଖିବାକୁ ମିଳିଛି ସୁନ୍ଦରଗଡ଼ ଜିଲା କୁତ୍ରା ଲ୍ୟାମ୍ପସରେ। ଧାନ କିଣିବାକୁ ନେଇ ମିଲର୍ସଙ୍କ ଧମକ ଦେଖିବାକୁ ମିଳୁଛି। ବିଭିନ୍ନ ଆଳଦେଖାଇ ୪ କିଲୋ ଧାନ କାଟିବା ନେଇ ମିଳର୍ସ ଚାଷୀଙ୍କୁ ଧମକ ଦେଉଛନ୍ତି। ୪ କିଲୋ ଧାନ କାଟିବୁ ନ ହେଲେ ଧାନ ଉଠାଇବୁ ନାହିଁ ବୋଲି ରୋକ୍ଠୋକ୍ ମନା କରୁଛନ୍ତି। ଲ୍ୟାମ୍ପସ କର୍ମଚାରୀଙ୍କ ସହିତ ସଲାସୁତୁରା କରି ଏଭଳି କାର୍ଯ୍ୟ କରୁଥିବା ଅଭିଯୋଗ ହେଉଛି। କୁତ୍ରା ଲ୍ୟାମ୍ପସରେ ରାଜଗାଙ୍ଗପୁର ବ୍ଲକ ଝଗରପୁରସ୍ଥିତ ରାଇସ ମିଲ ପକ୍ଷରୁ ଧାନ ଉଠାଯାଉଛି। କିନ୍ତୁ ଏଠି ମିଲର୍ସଙ୍କ ଖୋଲାଖୋଲି ଦାଦାଗିରି ଚାଲିଥିବା ଦେଖିବାକୁ ମିଳୁଛି। ବିନା ବିଏମ୍ସି ଟେଷ୍ଟ କରି ଧାନ ଖରାପ ଥିବା କହୁଛନ୍ତି। ଏଭଳି କରିବା ପାଇଁ ସାହାସ କାହା ପାଖରୁ ମିଳୁଛି ତାହା ମନରେ ପ୍ରଶ୍ନ ସୃଷ୍ଟି କରୁଛି। ଲ୍ୟାମ୍ପସ କର୍ମଚାରୀଙ୍କ ସହଯୋଗରେ ଏଭଳି ହେଉନାହିଁ ତ ବୋଲି ପ୍ରଶ୍ନ ମନ ଭିତରେ ଉଙ୍କି ମାରୁଛି। ଏହାକୁ ନେଇ ଲ୍ୟାମ୍ପସ କର୍ମଚାରୀଙ୍କୁ ପଚାରିବାରୁ ଲ୍ୟାମ୍ପସ ଏମ୍ଡି କାଟିବା ପାଇଁ କହିଥିବା ପ୍ରକାଶ କରିଥିଲେ। ଏହାକୁ ନେଇ ଏମ୍ଡିଙ୍କୁ ପଚାରିବାରୁ ଏଭଳି କହିନାହିଁ। ଆମର ବୈଠକରେ ୩ କିଲୋ କାଟିବା ପାଇଁ ନିଷ୍ପତ୍ତି ହୋଇଥିବା ପ୍ରକାଶ କରିଛନ୍ତି। ତେବେ କେଉଁ ଆଧାରରେ ୩ କିଲୋ କାଟୁଛନ୍ତି ତାହା ନିଶ୍ଚିତ ଭାବରେ ତଦନ୍ତ ସାପେକ୍ଷ। ୩ କିଲୋ କାଟି ଲ୍ୟାମ୍ପସ କର୍ମଚାରୀ ଏବଂ ମିଲର୍ସ ମାଲେମାଲ ହେଉଛନ୍ତି। କୁତ୍ରା ବ୍ଲକ ଅଞ୍ଚଳ ହେଉଛି ଏକ ଆଦିବାସୀ ବହୁଳ ଅଞ୍ଚଳ। ଏଠାରେ ୮୦ ପ୍ରତିଶତ ଲୋକ ଚାଷ ପ୍ରତି ନିର୍ଭରଶୀଳ। ମୁଣ୍ଡଝାଳ ତୁଣ୍ଡରେ ମାରି ଚାଷ କାର୍ଯ୍ୟ କରିଥାନ୍ତି। ଏଭଳି ସ୍ଥଳେ କଟ୍ନୀଛଟ୍ନୀ ଦ୍ବାରା ଚାଷୀଙ୍କ ମେରୁଦଣ୍ଡ ଭାଙ୍ଗୁଛି। ତେଣୁ ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେଇ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହେଉଛି।