କାହାର ଭାଗ୍ୟ କେତେବେଳେ ବଦଳିଯିବ ସେ ବିଷୟରେ କିଛି କହି ହେବନାହିଁ। କଥାରେ ଅଛି, ଆଜି ଯିଏ ରାଜା କାଲି ସେ ଚାକର। ଆଉ କାଲି ଯେ ଚାକର ଆଜି ସେ ରାଜା। ଦୁନିଆରେ କିଛି ଲୋକ ଅଛନ୍ତି ଯେଉଁମାନେ କଠିନ ପରିଶ୍ରମ କରି ଭଲରେ ରହିଥାନ୍ତି। ଆଉ କିଛି ଲୋକ ଥାନ୍ତି ବିନା ପରିଶ୍ରମରେ ରାତାରାତି କୋଟିପତି ହୋଇଯାନ୍ତି। ସୋସିଆଲ ମିଡିଆରେ ସେମିତି ଏକ ଘଟଣା ଭାଇରାଲ ହେଉଛି। ଯିଏ କି ମାତ୍ର କିଛି ସମୟ ମଧ୍ୟରେ କୋଟିପତି ହୋଇଯାଇଛନ୍ତି।
କେରଳର କୋଟାୟାମରେ ରହୁଥିବା ୭୭ ବର୍ଷୀୟ ସଦାନନ୍ଦ ଅଲିପାରାମ୍ବିଲ ପନିପରିବା ଆଣିବା ପାଇଁ ଦିନେ ସକାଳେ ଘରୁ ବାହାରି ଯାଇଥିଲେ। ସେ ୫୦୦ ଟଙ୍କା ନେଇ ବଜାରକୁ ଯାଇଥିଲେ। ଯେତେବେଳେ ସେ ପନିପରିବା କିଣିସାରିଲେ ସେ ଦୋକାନୀ ହାତକୁ ୫୦୦ ଟଙ୍କିଆ ନୋଟ୍ଟାଏ ବଢ଼ାଇ ଦେଲେ। ଦୋକାନୀଙ୍କ ନିକଟରେ ଖୁଚୁରା ନ ଥିଲା। ତେଣୁ ସଦାନନ୍ଦ ନିକଟରୁ ଏକ ଲଟେରି ଟିକେଟ କିଣି ଆଣିବା ପରେ ଦୋକାନୀକୁ ତା’ର ପାଉଣା ଦେଇଥିଲେ। କିଛି ସମୟ ପରେ, ସେ ଜାଣିବାକୁ ପାଇଲେ ଯେ ସେ କିଣିଥିବା ଟିକେଟ ଉପରେ ଲଟେରି ଲାଗିଛି। କିଛିକ୍ଷଣ ମଧ୍ୟରେ ସଦାନନ୍ଦ ୧୨ କୋଟି ଟଙ୍କାର ମାଲିକ ହୋଇପାରିଛନ୍ତି।
ସଦାନନ୍ଦ ବୃତ୍ତିରେ ଜଣେ ଚିତ୍ରକାର। ସେ କରୋନା ମହାମାରୀରେ କାମ କରିବା ବନ୍ଦ କରିଦେଇଥିଲେ। ଫଳରେ ଘରର ଖର୍ଚ୍ଚ କରିବା ତାଙ୍କ ପାଇଁ କଷ୍ଟକର ଥିଲା। ବର୍ତ୍ତମାନ ଲଟେରି ଜିତିଥିବାରୁ ସେ କହିଛନ୍ତି, ପ୍ରଥମେ ଏହି ଟଙ୍କାରେ ଏକ ସୁନ୍ଦର ଘର ନିର୍ମାଣ କରିବେ।
ପରେ ବଳକା ଅର୍ଥ କିପରି ଖର୍ଚ୍ଚ କରିବେ ସେ ସ୍ଥିର କରିବେ। ଏକ ରିପୋର୍ଟ ଅନୁଯାୟୀ, ଟ୍ୟାକ୍ସ ଏବଂ କମିଶନ କାଟିବା ପରେ ସଦାନନ୍ଦ ପ୍ରାୟ ୭.୩୯ କୋଟି ଟଙ୍କା ପାଇବେ।