ଆଳି,୮ା୯(ବନମାଳୀ ସେନାପତି ): ବ୍ୟାଙ୍କ ଖାତାରେ ଅଚାନକ ହଜାର ହଜାର ଟଙ୍କା ଜମା ହେବା ନେଇ ମୋବାଇଲରେ ମେସେଜ ଆସିବାରୁ ଗ୍ରାହକମାନଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି। ୨ ହଜାରଠାରୁ ଆରମ୍ଭ କରି ୨ ଲକ୍ଷ ପର୍ଯ୍ୟନ୍ତ ଟଙ୍କା ବହୁ ଗ୍ରାହକଙ୍କ ଆକାଉଣ୍ଟରେ ହଠାତ୍ ଜମା ହେବା ପରେ ଗ୍ରାହକମାନେ ସେମାନଙ୍କ ଟଙ୍କା ଉଠାଣ ସମେତ ଚେକ୍ ଭଙ୍ଗାଇବାକୁ ବ୍ୟାଙ୍କରେ ଭିଡ଼ ଜମାଇ ଥିଲେ। ଗ୍ରାହକମାନଙ୍କ ଏତେ ଭିଡ଼ ହୋଇଥିଲା ଯେ ବାଧ୍ୟ ହୋଇ ସେଠାରେ ପୋଲିସ ପହଞ୍ଚତ୍ ୪ଟା ପର୍ଯ୍ୟନ୍ତ ବ୍ୟାଙ୍କ ବନ୍ଦ ହେବା ଯାଏ ରହିବାକୁ ପଡ଼ିଥିଲା। ଏଭଳି ଏକ ଘଟଣା ନଜରକୁ ଆସିଥିଲା ଗୁରୁବାର ସକାଳେ କେନ୍ଦ୍ରାପଡ଼ା ଜିଲା ଆଳି ବାଟିପଡ଼ା ଗ୍ରାମ୍ୟ ବ୍ୟାଙ୍କ ଶାଖାରେ। ଏହି ଶାଖା ଅଧୀନରେ ଥିବା ବାଟିପଡ଼ା, ସହିରା, ନୂଆପଡ଼ା, ସାନମଙ୍ଗ ଭଳି ଆଖପାଖ ଅଞ୍ଚଳର ବ୍ୟାଙ୍କ ହିତାଧିକାରୀମାନଙ୍କ ଆକାଉଣ୍ଟରେ ୨ ଦିନ ହେବ ଟଙ୍କା ଆସିବାରେ ଲାଗିଥିଲା। ଲୋକଙ୍କ ଭିଡ଼କୁ ଲକ୍ଷ୍ୟ କରି ପଟ୍ଟାମୁଣ୍ଡାଇ ଏସ୍ଡିପିଓ କ୍ଷମା ସାଗର ପଣ୍ଡା ଓ ଆଳି ଥାନା ଅଧିକାରୀ ସବ୍ୟସାଚୀ ଶତପଥୀ ଫୋର୍ସ ନେଇ ବ୍ୟାଙ୍କରେ ପହଞ୍ଚତ୍ ଆଇନଶୃଙ୍ଖଳା ପରିସ୍ଥିତି ଉପରେ ନଜର ରଖିଥିଲେ। ଏ ସମ୍ପର୍କରେ ଗ୍ରାମ୍ୟ ବ୍ୟାଙ୍କ ଶାଖା ପରିଚାଳକ ପ୍ରତାପ ପ୍ରଧାନଙ୍କୁ ପଚାରିବାରେ ବ୍ୟାଙ୍କକୁ ପ୍ରତିଦିନ ପାଖାପାଖି ୨ଶହ ଗ୍ରାହକ ଆସୁଥିବା ବେଳେ ଗୁରୁବାର ସକାଳୁ ହଜାରରୁ ଊର୍ଦ୍ଧ୍ୱ ଗ୍ରାହକ ଆସିଥିଲେ। ସେମାନଙ୍କ ଆକାଉଣ୍ଟରେ ଟଙ୍କା ଆସିଥିବାରୁ ତାହା ଉଠାଇବା ନିମନ୍ତେ ସେମାନେ ଭିଡ଼ ଜମାଇଥିଲେ। କିନ୍ତୁ ଯାହା ଆକାଉଣ୍ଟରେ ଯେତିକି ପରିମାଣର ଟଙ୍କା ଥିଲା ସେଥିରୁ ବ୍ୟାଙ୍କ ପକ୍ଷରୁ ଅଳ୍ପ କିଛି ଟଙ୍କା ଉଠାଣ କରାଇ ଦିଆଯାଇଛି। କିନ୍ତୁ ହଠାତ୍ ଆକାଉଣ୍ଟଗୁଡ଼ିକରେ ଏତେ ଲେଖାଏ ଟଙ୍କା କେଉଁଠୁ ଆସିଲା ତାହାକୁ ନେଇ ସେ ମଧ୍ୟ ସନ୍ଦେହ ଘେରରେ ରହିଛନ୍ତି ବୋଲି କହିଛନ୍ତି। ଏହି ଘଟଣାକୁ ନେଇ ଆଳି ଅଞ୍ଚଳରେ ଚର୍ଚ୍ଚା ଜୋର ଧରିଛି।