ପରିଣିତି ଚୋପ୍ରା ଖୁବ୍ଶୀଘ୍ର ଘର ସଂସାର କରିବେ। ସାଂସଦ ରାଘବ ଚଢ଼ାଙ୍କ ସହ ତାଙ୍କର ରିଂ ସେରିମନି ନିକଟରେ ଶେଷ ହୋଇଛି। ପରିଣିତିଙ୍କ ଗୋଟିଏ ଆଶା ପୂରଣ ନ ହେଲେ ତାଙ୍କ ମନ ବୁଝି ନ ଥାଏ। ତାହା କ’ଣ ଜାଣନ୍ତି?
ଜୋତା କିଣିବା। ପଢ଼ିବା ସମୟରୁ ତାଙ୍କର ଏଥିପ୍ରତି ଆଗ୍ରହ ରହିଆସିଛି। ନିଜର ଏଭଳି ରୁଚି ସମ୍ପର୍କରେ ସେ କହନ୍ତି, ‘ନୂଆ ବ୍ରାଣ୍ଡର ଜୋତା ଦେଖିଲେ ତାହାକୁ ନ କିଣି ମୁଁ ରହିପାରେନା। ତେଣୁ ବଜାରକୁ କେଉଁ ନୂଆ ଜୋତା ଆସୁଛି ସେ ନେଇ ମୁଁ ସବୁବେଳେ ଅପଡେଟ୍ ଥାଏ। ପୁଣି ସେଥିରୁ ହଳେ ନୁହେଁ, ଯଦି ମନ ମାନିଲା ତେବେ ୫-୬ ହଳ ଏକାଥରେ କିଣିଆଣିଥାଏ।’ ପରିଣିତିଙ୍କର ପ୍ରଥମ ସିନେମା ଥିଲା ‘ଲେଡିଜ ଭର୍ସେସ ରିକି ବହଲ’। ୨୦୧୧ରେ ମୁକ୍ତିଲାଭ କରିଥିବା ରୋମାଣ୍ଟିକ-କମେଡି କାହାଣୀ ଉପରେ ଆଧାରିତ ଚିତ୍ରଟି ଯଦିଓ ବକ୍ସ ଅଫିସରେ ଫ୍ଲପ୍ ହୋଇଥିଲା, ହେଲେ ଏହା ତାଙ୍କ ପାଇଁ ବେଶ୍ ଶୁଭପ୍ରଦ ଥିଲା। କାରଣ ନିଜର ପ୍ରଥମ ସିନେମା ପାଇଁ ତାଙ୍କୁ ୧୦ଟି ପୁରସ୍କାର ମିଳିଥିଲା। ବିଶେଷଭାବରେ ଏଥିରେ ତାଙ୍କର ଅଭିନୟକୁ ଦର୍ଶକମାନେ ଖୁବ୍ ପ୍ରଶଂସା କରିଥିଲେ। କଲେଜ କ୍ୟାରିୟର ଶେଷ ହେବା ପରେ ଅଭିନୟ କରିବାକୁ ଆଗ୍ରହ ପ୍ରକାଶ କରିଥିଲେ ପରିଣିତି। କିନ୍ତୁ କେତେକ କାରଣରୁ ସେ ୟଶରାଜ ଫିଲ୍ମସରେ ଜଣେ ପି.ଆର. କନସଲଟାଣ୍ଟ ଭାବରେ କିଛି ବର୍ଷ କାମ କରିଥିଲେ। ବାହାରକୁ ଗଲାବେଳେ ସେ ସାଙ୍ଗରେ ଲିପ୍ ବାମ୍ ଏବଂ ଫେସ୍ଓ୍ବାଶ ନେବାକୁ ଭୁଲି ନ ଥାନ୍ତି। ତାଙ୍କ ଅଭିନୀତ ପ୍ରମୁଖ ସିନେମାଗୁଡିକ ମଧ୍ୟରେ ରହିଛି- ‘ଇସ୍କଜାଦେ’, ‘ଶୁଦ୍ଧ ଦେଶୀ ରୋମାନ୍ସ’, ‘ହସି ତୋ ଫସି’, ‘ମେରି ପ୍ୟାରି ବିନ୍ଦୁ’, ‘ନମସ୍ତେ ଇଂଲଣ୍ଡ’, ‘ଦ ଗର୍ଲ ଅନ ଦ ଟ୍ରେନ୍’, ‘ସାଇନା’ ଏବଂ ‘ଉଚ୍ଚାଇ’। ଅନ୍ୟପକ୍ଷରେ ସେ ଅଭିନୟ କରିଥିବା ‘ଚମ୍କିଲା’ର ଶୁଟିଂ ନିକଟରେ ଶେଷ ହୋଇଛି।