ଖଇରା, ୫।୧(ଡି.ଏନ.ଏ.) ନିର୍ବାଚନରେ ରାଜସ୍ବ ଅଧିକାରୀଙ୍କ ବ୍ୟସ୍ତତାର ସୁଯୋଗ ନେଇ ଏବେ ଖଣି ମାଫିଆମାନେ ବାଲେଶ୍ୱର ଜିଲା ଖଇରା ତହସିଲ ଅଧୀନ ଶାରୀଶୁଆ ପାହାଡରୁ ପଥର ଓ ମାଟି ପାହାଡ ପାହାଡ ସଂଲଗ୍ନ ସରକାରୀ ଜମିରୁ ମାଙ୍କଡା ଏବଂ ମୋରମ ଚୋରିକୁ ୧୦ଗୁଣ ବଢାଇ ଦେଇଛନ୍ତି। ସୋର-କୁପାରୀ ଏବଂ କୁପାରୀ-ରାଣୀତାଲ ରାସ୍ତାରେ ଧରପଗଡକୁ ଏଡାଇବାକୁ ବର୍ତ୍ତମାନ ଖଣି ମାଫିଆମାନେ କଦଳୀଗଡିଆ-କପ୍ତିପଦା ପାହାଡ ରାସ୍ତାରେ ମୟୂରଭଞ୍ଜ ସମେତ ବିଭିନ୍ନ ସ୍ଥାନକୁ ଚୋରାଚାଲାଣ କରୁଛନ୍ତି।
ପ୍ରଶାସନ ନୀରବ ରହିଲେ ନିର୍ବାଚନ ସରିବା ପୂର୍ବରୁ ପାହାଡ ଶ୍ମଶାନ ଭୂଇଁରେ ପରିଣତ ହୋଇଯିବ ବୋଲି ପରିବେଶବିତ୍ ଓ ପ୍ରକୃତିପ୍ରେମୀମାନେ ପ୍ରକାଶ କରିଛନ୍ତି।
ଜାତୀୟ ଗ୍ରୀନ ଟ୍ରିବ୍ୟୁନାଲ ନିର୍ଦ୍ଦେଶନାମା ପରେ ଉକ୍ତ ପାହାଡରେ ପାଖାପାଖି ୯୭ଟି ଖଣିରେ ୧୪୪ ଧାରା ଲାଗୁ କରାଯାଇଛି। ଖାତାପତ୍ରରେ ବନ୍ଦ ଥିବା ବେଳେ ୫୦ରୁ ଊର୍ଦ୍ଧ୍ୱ ଖଣି ଚୋରାରେ ଚାଲୁଛି। ଫଳରେ ସରକାର କୋଟି କୋଟି ଟଙ୍କାର ରାଜସ୍ବ ହରାଉଛନ୍ତି। ସେପଟେ ଖଣି ନିଲାମ ପାଇଁ ୩ବର୍ଷ ତଳେ ଆବେଦନ କରିଥିବା ବ୍ୟକ୍ତିବିଶେଷଙ୍କର କୋଟି କୋଟି ସିକ୍ୟୁରିଟି ଟଙ୍କା ବାକି ପଡିଛି। ମାତ୍ର କେତେଜଣ ମୁଣ୍ଡଗଣତି ଖଣିମାଲିକ ଚୋରା କାରବାରରେ ଲିପ୍ତ ରହିବା ଯୋଗୁ ବାକି ଆବେଦନକାରୀମାନେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ଏବେ ବଗେଇପୁର ନିକଟରେ ପାହାତତଳି ଗ୍ରାମ ନିକଟରେ ସ୍ଥାନେ ସ୍ଥାନେ ଚୋରାପଥର ଗଚ୍ଛିତ ରହିଛି। ଏଥିରେ ରାଜସ୍ବ ଅଧିକାରୀଙ୍କ ନୀରବତା ବିଭାଗର ସ୍ବଚ୍ଛତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ପୂର୍ବରୁ ଜିଲାସ୍ତରରେ ଉପଜିଲାପାଳ ତଥା ଅନ୍ୟ ଅଧିକାରୀମାନେ ମଝିରେ ମଝିରେ କ୍ରଶରଗୁଡିକ ପରିଦର୍ଶନ କରି ଷ୍ଟକ୍ ଅନିୟମିତତା ଉପରେ ଜରିମାନା ଧାର୍ଯ୍ୟ କରୁଥିଲେ। ଏବେ ଦୀର୍ଘ ସମୟ ଧରି ସେମାନଙ୍କ ପାଦ ନ ପଡିବାରେ କ୍ରଶରମାଲିକମାନେ ପାହାଡରୁ ପଥର ଆଣି କ୍ରଶରରେ ଭାଙ୍ଗି ନିରବିଚ୍ଛିନ୍ନ ଭାବେ ବିକ୍ରି କରି ଚାଲିବା ପ୍ରଶାସନର ସ୍ଥାଣୁତାକୁ ପ୍ରମାଣିତ କରୁଛି ା ପ୍ରଶାସନ ବାଲି ଗାଡି ଗୋଡାଇବାରେ ଯେତିକି ସମୟ ନଷ୍ଟ କରୁଛି ଯଦି ସେଥିରୁ କିଛି ସମୟ ବାହାର କରି ଖଣି ଚୋରଙ୍କୁ ଧରନ୍ତେ, ତେବେ ତେବେ କିଞ୍ଚିତ ପରିମାଣରେ ପାହାଡ ସୁରକ୍ଷିତ ରହିପାରନ୍ତା ବୋଲି ପାହାଡତଳ ଗ୍ରାମବାସୀ କହିଛନ୍ତି। ସେହିଭଳି ମାଙ୍କଡା ମୋରମ ଚୋରି ମଧ୍ୟ ବହୁ ମାତ୍ରାରେ ବଢିଯାଇଛି। ଏ ସମ୍ପର୍କରେ ତହସିଲଦାର ମହେନ୍ଦ୍ର ପ୍ରସାଦ ବେହେରାଙ୍କୁ ଯୋଗାଯୋଗ କରିବାରେ ଖୁବଶୀଘ୍ର ବଗେଇପୁର ଯାଇ ପାହାଡ ଚୋରିର ତଦାରଖ କରିବେ ବୋଲି କହିଛନ୍ତି ା