ଜଟଣୀ/ଯାଁଳା/ବୋଲଗଡ଼,୧୭।୭(ଡି.ଏନ୍.ଏ.): ଖୋର୍ଦ୍ଧା ଜିଲା ଜଟଣୀ ତହସିଲ ଅଞ୍ଚଳରେ ମାଙ୍କଡ଼ା ପଥର ଓ ମୋରମ ଚୋରାଚାଲାଣ ହେଉଥିବା ନେଇ ଅଭିଯୋଗ ହୋଇଆସୁଥିଲା। ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କ ନିର୍ଦ୍ଦେଶରେ ଏକ ସ୍କ୍ବାଡ୍ ଗଠନ କରାଯାଇ ବିଭିନ୍ନ ସ୍ଥାନରେ ଚଢ଼ାଉକୁ ଜୋର୍ଦାର କରାଯାଇଛି। ଏହି ପରିପ୍ରେକ୍ଷୀରେ ଶୁକ୍ରବାର ବିଳମ୍ବିତ ରାତିରେ ଭୁବନେଶ୍ୱର ଉପଜିଲାପାଳ ଦେବବ୍ରତ ସାହୁଙ୍କ ନେତୃତ୍ୱରେ ଜଟଣୀ ତହସିଲ ଅଞ୍ଚଳର ବିଭିନ୍ନ ସ୍ଥାନରେ ଚଢ଼ାଉ କରାଯାଇଥିଲା। ଇନ୍ଫୋ ଭ୍ୟାଲି ଏବଂ ଛତାବର ରାସ୍ତାରୁ ମୋରମ ଭର୍ତ୍ତି ୯ଟି ହାଇଓ୍ବା ଜବତ କରାଯାଇ ଯଁାଳା ଫାଣ୍ଡିରେ ରଖାଯାଇଛି। ସେହିପରି ଜଟଣୀ ଥାନା ଅଧୀନ କୁଦିଆରୀ ଏବଂ ବାଛରା ଗ୍ରାମ ରାସ୍ତାରୁ ଦୁଇଟି ଟ୍ରାକ୍ଟର ଏବଂ ଗୋଟିଏ ମାଙ୍କଡ଼ା ପଥର ବୋଝେଇ ମିନିଟ୍ରକ୍ ଜବତ କରାଯାଇ ଥାନାରେ ରଖାଯାଇଛି। ଏହି ଚଢ଼ାଉରେ ଅତିରିକ୍ତ ତହସିଲଦାର ରମେଶ ଚନ୍ଦ୍ର ମଲିକଙ୍କ ସମେତ ଜଟଣୀ ଥାନା ଅଧିକାରୀ ଏବଂ କର୍ମଚାରୀ ସାମିଲ ଥିଲେ। ଆଗାମୀ ଦିନରେ ଖଣିଜ ପଦାର୍ଥ ଚୋରାଚାଲାଣକୁ ରୋକିବା ପାଇଁ ଚଢ଼ାଉ ଜାରି ରହିବ ବୋଲି ପ୍ରଶାସନ ପକ୍ଷରୁ କୁହାଯାଇଛି।
ବୋଲଗଡ଼ ବ୍ଲକ ଅଞ୍ଚଳରେ ବେଆଇନ ଭାବେ ବାଲି, ଚିପ୍ସ ଓ ମାଙ୍କଡ଼ାପଥର ଚାଲାଣ ବୃଦ୍ଧି ପାଇବାରେ ଲାଗିଛି। ତହସିଲଦାର ଦାୟିତ୍ୱରେ ଥିବା ବିଡିଓ ଧୋବେଇ ନାୟକଙ୍କ ସମେତ ତହସିଲର କର୍ମଚାରୀମାନେ ଶନିବାର ଭୋର୍ରୁ ଧଳାପଥର ଫାଣ୍ଡି ନିକଟ ରାଜ୍ୟ ରାଜପଥରୁ ୫ଟି ବାଲି ଓ ଗୋଟିଏ ଚିପ୍ସ ବୋଝେଇ ହାଇଓ୍ବାକୁ ଅଟକାଇ କାଗଜପତ୍ର ଯାଞ୍ଚ କରିଥିଲେ। ଆବଶ୍ୟକ କାଗଜପତ୍ର ଦେଖାଇ ନ ପାରିବାରୁ ଗାଡିଗୁଡ଼ିକୁ ଜବତ କରି ଧଳାପଥର ଫାଣ୍ଡି ଜିମା ଦେଇଥିଲେ। ଜବତ ଗାଡ଼ିଗୁଡିକ ମଧ୍ୟରେ ଓଡି୦୨ ବିଜେଡ୍ ୬୭୭୪, ଓଡି୦୨ ବିଏ ୬୩୯୯, ଓଡି୦୨ଡବ୍ଲ୍ୟୁ ୦୭୮୯, ଓଡି୦୨ ଡବ୍ଲ୍ୟୁ ୮୨୫୧, ଓଆର ୦୪ଏନ୍ ୬୪୨୮, ଓଡି୦୨ ବିକେ ୭୧୭୫ ପଞ୍ଜୀକୃତ ନମ୍ବରର ହାଇଓ୍ବା ଥିବା ବେଳେ ଚିପ୍ସ ବୋଝେଇ ହାଇଓ୍ବା ମାଲିକ ୫୦,୦୦୦ ଟଙ୍କା ଜରିମାନା ଦେଇଥିବା ଜଣାପଡ଼ିଛି।