ଖୁଣ୍ଟୁଣୀ,୪।୪(ଡି.ଏନ୍.ଏ.): ଖୁଣ୍ଟୁଣୀ ଥାନା ଅନ୍ତର୍ଗତ କୃଷ୍ଣଶ୍ୟାମପୁର (ନୂଆସାହି) ଗ୍ରାମ ସନ୍ନିକଟ ରିଜର୍ଭ ଜଙ୍ଗଲ ପାର୍ଶ୍ୱରେ ବେଆଇନ ଚୋରା କୋଇଲା ଡିପୋ ଉପରେ ସୋମବାର ସାରେ ଖଣି ବିଭାଗର ସ୍କ୍ବାଡ ଓ ଖୁଣ୍ଟୁଣୀ ପୋଲିସ ପକ୍ଷରୁ ମିଳିତ ଭାବେ ଚଢ଼ାଉ କରାଯାଇଛି। ଚଢ଼ାଉ ବେଳେ ମାଫିଆମାନେ ସ୍କ୍ବାଡ ଟିମ୍ ଉପରେ ଟେକାପଥର ପକାଇ ଆକ୍ରମଣ କରିଛନ୍ତି। ଫଳରେ ଗାଡ଼ିର କାଚ ଭାଙ୍ଗିଯାଇଥିବା ବେଳେ ୨ଜଣ କର୍ମଚାରୀ ଆହତ ହୋଇଛନ୍ତି। ଏ ସଂକ୍ରାନ୍ତରେ ଅତିରିକ୍ତ ଖଣି ଅଧିକାରୀ ବେହେରା ଖୁଣ୍ଟୁଣୀ ଥାନାରେ ଏକ ଏତଲା ଦେବାରେ ଥାନା ପକ୍ଷରୁ ଆଇଆଇସି ଭବାନୀ ଶଙ୍କର ଖୁଣ୍ଟିଆ ତଦନ୍ତ ଆରମ୍ଭ କରଛନ୍ତି। ସୂଚନା ଅନୁଯାୟୀ, ନୂଆସାହି) ଗ୍ରାମ ସନ୍ନିକଟ ରିଜର୍ଭ ଜଙ୍ଗଲ ପାର୍ଶ୍ୱରେ ବେଆଇନ ଚୋରା କୋଇଲା ଡିପୋ ହେଉଥିବା ଅଭିଯୋଗ ହୋଇଥିଲା। ଏ ନେଇ ଖଣି ବିଭାଗର ସ୍କାଡ ଟିମ୍ ସ୍ଥାନୀୟ ପୋଲିସକୁ ନେଇ ସୋମବାର ଚଢ଼ାଉ କରିଥିଲେ। ସେଠାରେ କୋଇଲା ଲୋଡ ହୋଇଥିବା ୮ଖଣ୍ଡ ମିନିଟ୍ରକ ମଧ୍ୟରୁ ୫ଟି ମିନିଟ୍ରକକୁ ଖଣି ବିଭାଗ କୋଇଲା ସହ ଜବତ କରିଥିବା ବେଳେ ଅନ୍ୟ ୩ଟି ମିନିଟ୍ରକ ସ୍କ୍ବାଡ ଆସିବା ଦେଖି ଖସି ପଳାଇଯାଇଛନ୍ତି। ଚଢ଼ାଉ ବେଳେ ଅନ୍ୟ ଏକ ସ୍ଥାନରେ ପ୍ରାୟ ୭ ଟନ କୋଇଲାକୁ ମଧ୍ୟ ସ୍କ୍ବାଡ ଜବତ କରି ସମୁଦାୟ ୨୦ ଟନ କୋଇଲା ଜବତ କରାଯାଇଥବା ଅତିରିକ୍ତ ଖଣି ଅଧିକାରୀ ରଞ୍ଜିତ ବେହେରା କହିଛନ୍ତି। ସେଠାରୁ ୨୦୦ ଶହ ମିଟର ଦୂରରେ ପ୍ରାୟ ୫୦ ଟନ କୋଇଲା ଗଚ୍ଛିତ ଥିବା ଜାଣି ପୋଲିସ ଓ ଖଣି ବିଭାଗ ସେଠାକୁ ଯାଉଥିବା ଦେଖି ଜଣେ କୋଇଲା ମାଫିଆଙ୍କ ଇଶାରାରେ କେତେକ ଯୁବକ ଖଣି ବିଭାଗର ଏକ ବୋଲେରୋ ନଂ. ଓଡି ୦୫ ବିଏଚ୍ ୬୮୩୬ ଉପରକୁ ଟେକା ମାରି କାଚକୁ ଭଙ୍ଗାରୁଜା କରିଥିଲେ। ଫଳରେ ବାଧ୍ୟ ହୋଇ ସେଠାରୁ ସ୍କ୍ବାଡ ଟିମ୍ ଫେରି ଆସିଥିଲେ। ଏଥିରେ ଦୁଇଜଣ ଷ୍ଟାଫ ଆହତ ହୋଇଛନ୍ତି। ଜବତ କୋଇଲା ଗାଡ଼ିକୁ ଖଣି ବିଭାଗ ଜଗତପୁରସ୍ଥିତ ଖଣି କାର୍ଯ୍ୟଳୟକୁ ନେଇଯାଇଛନ୍ତି।