କେନ୍ଦୁଝର, ୧୧।୭(ଡି.ଏନ୍.ଏ./ସ୍ବ.ପ୍ର.): କେନ୍ଦୁଝର ଜିଲାର ବଡବିଲ ତହସିଲ ଅନ୍ତର୍ଗତ କାରାଖେଣ୍ଡରାଠାରେ ଥିବା ରୁଙ୍ଗ୍ଟା ମାଇନ୍ସର ପୁର୍ବରୁ ଅବସ୍ଥିତ ଏକ ସ୍ପଞ୍ଜ ଆଇରନ କାରଖାନାକୁ ଷ୍ଟିଲ୍ ପ୍ଲାଣ୍ଟରେ ପରିଣତ କରିବା ପାଇଁ ଗତ ଦୁଇଦିନ ତଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଛନ୍ତି। ଜିଲାରେ ଏକ ମେଗା ଇସ୍ପାତ ପ୍ଳାଣ୍ଟ ପ୍ରତିଷ୍ଠା ପାଇଁ ଦୀର୍ଘ ବହୁ ବର୍ଷ ଧରି ବିଭିନ୍ନ ସଂସ୍ଥା ଓ ଦଳ ପକ୍ଷରୁ ଆନ୍ଦୋଳନ ହୋଇ ଆସୁଥିଲା। ଜିଲାର ଖଣିଜ ସମ୍ପଦର ସୁବିନିଯୋଗ ପାଇଁ ମେଗା ଷ୍ଟିଲ୍ପ୍ଲାଣ୍ଟର ଆବଶ୍ୟକତା ରହିଥିବାବେଳେ ଏଠାରେ କାରଖାନା ନ କରି ଅନ୍ୟ ଜିଲା ଓ ରାଜ୍ୟରେ ଖଣି ସଂସ୍ଥାଗୁଡ଼ିକ ଇସ୍ପାତ କାରଖାନା କରିଛନ୍ତି। ଧୂଳିଧୂଆଁ ପ୍ରଦୂଷିତ ଛୋଟ ଛୋଟ ସ୍ପଞ୍ଜ କାରଖାନା ସ୍ଥାପନା ହେବା ଫଳରେ ନିଯୁକ୍ତି ସୁଯୋଗ ସୃଷ୍ଟି ହୋଇ ପାରିନାହିଁ ବରଂ ପ୍ରଦୂଷଣର ମାତ୍ରା ବଢିଛି।
ଏ ନେଇ ଆନ୍ଦୋଳନ ପରେ ଜିଲାରେ ମେଗା ଇସ୍ପାତ କାରଖାନା ପ୍ରତିଷ୍ଠା ପାଇଁ ୧୦ ମିଲିୟନ ଟନ୍ରୁ ଉର୍ଦ୍ଧ୍ୱ ଆର୍ସେଲର ମିତ୍ତଲ, ଉତ୍ତମ ଗାଲ୍ଭା ଓ ଷ୍ଟେରଲାଇଟ ସହ ଏମ୍ଓୟୁ ଦସ୍ତଖତ କରିଥିଲେ। କିନ୍ତୁ ସେ ସବୁ ସଂସ୍ଥା ମେଗା ଇସ୍ପାତ କାରଖାନା ନ କରି ଫେରିଗଲେ। ଏବେ ମିତ୍ତଲ,ଜେଏସ୍ଡ୍ଲ୍ୟୁ ଭଳି ବଡ଼ ବଡ଼ ସଂସ୍ଥା ଏକାଧିକ ଖଣି ପାଇଥିବାବେଳେ ସେମାନଙ୍କୁ ମେଗା ଷ୍ଟିଲ୍ ପ୍ରୋଜେକ୍ଟ ପ୍ରତିଷ୍ଠା ପାଇଁ କୁହା ନ ଯିବା ଏବଂ ରୁଙ୍ଗ୍ଟା ଭଳି କମ୍ପାନୀ ସହିତ ଏମ୍ଓୟୁ କରି ଏକ ୩ ମିଲିୟନ ଟନ ଇସ୍ପାତ କାରଖାନା ପ୍ରତିଷ୍ଠା ପାଇଁ ଘୋଷଣା କରିବା ମେଗା ଇସ୍ପାତ କାରଖାନା ଦାବି ଅପୂରଣୀୟ ହୋଇ ରହିବ।
କେନ୍ଦୁଝର ଜିଲାର ଖଣିଜ ପଦାର୍ଥ ଉତ୍ତୋଳନ କରୁଥିବା ରୁଙ୍ଗ୍ଟା ମାଇନ୍ସ ଏହି କାରାଖେଣ୍ଡରାରେ ୭୯୨୦କୋଟି ଟଙ୍କା ବ୍ୟୟରେ ଏକ ଷ୍ଟିଲ ପ୍ଲାଣ୍ଟ ପ୍ରତିଷ୍ଠା କରିବ ଯେଉଁଥିରେ ୫,୨୩୪ ଜଣ ନିଯୁକ୍ତି ପାଇପାରିବେ ବୋଲି କୁହାଯାଉଛି ା ମାତ୍ର ଏହି କମ୍ପାନୀ ଢେଙ୍କାନାଳଠାରେ ୧୧ହଜାର କୋଟି ଟଙ୍କାରେ ଏକ ବଡ କାରଖାନା, କେନ୍ଦୁଝର ଜିଲାରୁ ଉନ୍ନତମାନର ଲୁହାପଥର ନେଉଥିବା ଟାଟା କମ୍ପାନୀ ଯାଜପୁରରେ ୪୭,୫୯୯ କୋଟି ଟଙ୍କାରେ ଓ ଏଠାରୁ ଲୁହାପଥର ନେଉଥିବା ଜିନ୍ଦଲ ଅନୁଗୋଳ ଜିଲାରେ ୨୪,୬୫୨କୋଟି ଟଙ୍କା ବ୍ୟୟରେ, ସମ୍ବଲପୁରଠାରେ ଭୂଷଣ ୫୫ହଜାର କୋଟି ଟଙ୍କାର କାରଖାନା କରୁଥବା ଜଣାପଡିଛି। ମାତ୍ର କେନ୍ଦୁଝର ଜିଲା ପାଇଁ ଷ୍ଟିଲ ପ୍ଲାଣ୍ଟ ଘୋଷଣା ଉପହାସ ବୋଲି ଆଲୋଚନା ହେଉଛି। ଘସିପୁରା ବିଧାୟକ ବଦ୍ରିନାରାୟଣ ପାତ୍ରଙ୍କୁ ପଚାରିବାରୁ ରୁଙ୍ଗ୍ଟା କମ୍ପାନୀ ବର୍ତ୍ତମାନ ଛୋଟ କରି ପ୍ଲାଣ୍ଟ କରୁଛି ପରବର୍ତ୍ତୀ ସମୟରେ ଏହି କମ୍ପାନୀ ବଡ଼ ଆକାରରେ ହେବ। ରାଉରକେଲା ଷ୍ଟିଲ୍ ପ୍ଲାଣ୍ଟ ମଧ୍ୟ ଛୋଟରୁ ବଡ଼ ହୋଇଛି। ଏହି ସମୟରେ କାରଖାନା ହେବା ଜିଲାବାସୀଙ୍କ ପାଇଁ ଶୁଭସଙ୍କେତ ବୋଲି ସେ କହିଛନ୍ତି। ତେବେ ରୁଙ୍ଗ୍ଟା ଭଳି ସଂସ୍ଥା ଦ୍ୱାରା ପ୍ଲାଣ୍ଟ କରାଯିବା କେତେଦୂର ଯୁକ୍ତି ସଙ୍ଗତ ବୋଲି ଜିଲା ପ୍ରେସ୍ କ୍ଲବର ଉପସଭାପତି ପ୍ରଦୀପ ମହାନ୍ତି କହିଛନ୍ତି।